OFFICE AṬANGA VAWI HNIH INCHHUAHTIR THU

Patling leh patling chhan mumal tak pawh sawi loa office aṭanga vawi hnih ngawt inchhuahtir hi a mak ngawt mai!

Aizawl veng hmawr lamah hian ram ruak a awm avangin kum 2024 aṭang tawh khan in hmun atan tiin ka buaipui a, vawi eng emaw zat Revenue Minister leh officer-te pawh ka hmu tawh nâin, ka la hlawhtling thei chuang lo. Revenue Department hi ‘Department ṭawp’ taka sawi a ni ṭhin a, chutiang taka a ṭawpna erawh ka la hriat ve ngai loh avangin chu lam chu sawi tur ka hre lo viau a. Tunah erawh chuan hei a ṭawpna lam ni chiah lo deuhin, officer dawr harsa ang reng tak mai a takin ka han tawng ve ta. Ram âwl ka dil chungchangah hian thawnthu thui tak sawi tur a awm tawh a, ka dilna hi a hlawhtling emaw, hlawhtling ta chiah lo pawh ni se, kan rahbi rah chhoh dante hi ka la chhinchhiah zel a, ziah hrim hrim pawh ka tum bawk a.

In hmun dil hi keini tan chuan a vawi khatna a ni bawkin engkim inzir chawpa buaipui kan ni a, hetia kum hnih vel lai buaipui ngai tur a nih pawh hi a chhan kan hrethiam chuang lo nâin, a tawpna kan la thlen miau loh avangin buaipui chhunzawm zel chu ṭulin ka hria a. Chumi buaipui bawk chuan July 1, 2026 (Nilaini)-ah Lunglei aṭangin Aizawl ka pan a, Pathian zarah tluang taka thlengin July 3, 2026 (Zirtawpni) chhun dar 12:10-ah Pu B. Lalchhanzova, Revenue Minister hmuin April 30, 2024-a ka dilna chu hmuh lehin vawiin thlenga kan la hlawhtlin loh thu pawh ṭawngkamin ka sawi a.

Revenue Minister chuan kan ram dilna lama Revenue officer hnenah chuan ‘Dear Pu xyz, hei hi lo enpui teh aw’ tia min ziah sakin seal a chhu a, hming a sign hnan a. Chu ka dilna lehkha, a hming sign-na ngei chu a phone chuan a thla lain WA lamah a thawn nghal bawk a. Tikhan han kal la, a lo buaipui mai ang che, a tih angin min kawhhmuh office-ah chuan ka tlan chho leh ta a. Revenue office ka thlen chuan officer room-ah chuan luh nghal a theih leh theih loh ka han zawt a, tiffin a ei mek a, lo nghak lawk ta che an tih avangin Personal Assistant kiangah chuan ka ṭhu a. Minute 5 vel ka ṭhut hnuah chuan pawn lam aṭangin pa pakhat hi a rawn kalin ‘Pu hi a hmuh theih em’ a rawn ti a, tiffin a ei mek thu an hrilh chung pawh chuan a lut lui ta tho a. A rawn chhuah leh hnuah chuan PA chuan ‘Ka pu, nang pawh va lut ve tawh mai rawh’ min tih takah chuan ka lut a. Nimahsela, ka beisei loh tak maiin ‘Ka pu, ka la hman lo a, min lo va chhuahsan leh phawt mai rawh,’ a tih vang chuan ka chhuak leh ta mai a. Ka hma chiaha lut kha engvanga minute 5 vel lai a awm a, keiin minute khat 1 pawh ka hmuh hmaa min chhuahtir leh mai si tih chu ka hrethiam chiah lo deuh.

Office room aṭanga inchhuahtir chhan hi chi hrang hrang a awm thei a, nimahsela, a chhan min hrilh si loin min chhuahtir tlat bawk si! Ka hmelchhiat vang nge, ka incheina a mawi loh vang ni ang tih te thlengin ka ngaihtuah a. Kamis inbilh zaih a, smart shoe bun bawk hi chuan chhiahhlawh chei ang zaihin kan nalh ve ṭhin a, kum 10 vel lai liam tawhah khan chutiang chuan ka lo inchei ve ṭhin a, office ṭhenkhatah phei chuan min hai avangin ṭum thum lai salute ka dawng nghe nghe. Tun ṭumah erawh kamis ban bul hain jeans kekawr ka ha a, chapal dum (en thuak chuan pheikhawk pum ang deuh hi) hi ka bun bawk a; mawi lo tak chu a ni hran lo a, nalh lutuk tia han sawi tur pawh chu a ni hran lo. Kum 2016-a kekawr bul (ka ha lui ve kher a) nena office pakhata ka kal pawh khan ṭha takin min lo dawngsawng tho kha a ni a, min melh hrek hrek kha min lawm lohna ka hmuh chhun a ni. Tuna min chhuahtir chhan tur hi keimah lamah chuan ka hrethiam hauh lo mai.

Minute rei lo te hnuah chuan PA chu lutin, a rawn chhuah leh pah chuan ‘Ka pu, va lut rawh le’ a tih takah chuan rang taka thoin ka lut zui nghal mai a. Nimahsela, officer chuan ‘Ka pu, ka la hman lo a, min lo va chhuahsan leh rawh aw’ a tih leh ta thut mai si a, hrilhhai tak chuan ka chhuak leh ta hnu hnu a! Hemi ṭumah hi chuan ka zak ta hle mai a, la hman lo turin amah lah chuan engmah khawih leh buaipui lai a neih ka hmu bawk si lo. Min dawngsawng duh lo hrim hrim em ni zawk ang tiin ka ngaihtuah a, ni ta se la eng nge a chhan ni ang? A chhan tur ka hre lo a, ṭum hnih lai min chhuahtir chhan kha vawiin thlengin ka la hre thiam thei lo a, ka rilru takah chuan min thamlo hle a nih dawn hi ka ti hial.

Revenue office hi a ṭawp an lo tih ṭhin hi hetiang hi em ni ang, an officer-te hi biak thiam an ngai riau bik em ni tihte ka ngaihtuah a. He officer hi kumin January thla khan ka dawr tawh a, chutah pawh chuan ṭum khat chu ‘ka la hman lo’ tiin a room aṭangin min chhuahtir tawh bawk a. WA lamah pawh he kan in hmun dil chungchangah kan inbe nual a, kan inbiakna thu leh hla pawh hi kei chuan ka la kawl ṭha vek a, ani pawhin a duh chuan a phone screen aṭang khan minute 5 chhung vel han thai chho se la a hmuh mai ka ring. Mi sual a ni chu ka ti hauh lo nâin, hetianga room aṭanga amah dawr tur ṭum thum lai min chhuahtir ang hian mi dang a chhuahtir ve ṭhin tho ang em tih chu ka thil hriat chak tak a ni.

Room aṭanga inchhuahtir hi amah bak mi dangah ka la tawng ngai lo a, ka tawn leh pawh ka ring lem lo. Chief Minister leh Minister hrang hrangte pawh an room-ah kan lo hmu tawh a, amah aia buai tak takte pawh kan lo dawr ve zauh zauh tawh ṭhin. Chutianga officer buai tak takte pawh chuan min la chhuahtir ngai hauh lo a, min lo nghak lawk rawh aw, an tih loh pawhin, an kutin lo ṭhu turin min hrilh mai ṭhin a ni ngai a. He officer hi chuan mi dang tumah an awm lo chungin ṭawngkam fiah pangngai takin amah chhuahsan rih turin ṭum thum lai min hnar ta bik a nih chu. A intihzahawmna nge ni ang a, min dah pawimawh loh vang zawk ni ang tihte pawh ngaihtuahnaah a awm. Kan thil dil, amah kan hmuh duhna chhan ber hlawhtlin leh hlawhtlin loh chu thuhran a ni a; chutia a hnena thu kan thlen hma hauha min han chhuahtir mai chu a chhan hriatthiam a har hle mai.

Kum 57 chhung vel min lo awp tawhtu Sap ze ṭha lo kan la chhawm zel – min mamawhtute laka intihzahawm der hi vawiina kan officer-te hian an la ching zel a nih ngai chuan kan ram hi ram nuam a ni har ngawtin a rinawm. Kan Kristianna pawh hian nuihzat a la hlawh ngei hian ka ring tlat a, mi dang tana malsawmna nih chu vana rah ang hial a ni telh telh ang. He officer pawh hi a awmna kohhranah chuan mi fel tak leh ṭangkai tak a ni mai thei a, a hnathawhna hmuna amah mamawha pantute laka a awm danah erawh Krista rawngbawltu anga ngainatna ngah tak chu a nih hmel loh khawp mai.

- Mahmuaka Chhakchhuak