Sihhmui Tlawng lei ‘Faith Bridge’
February ni 17 chawhnu lama Chief Minister Pu Lalduhoma lei (bridge) hawn tak, a hmingah 'Faith Bridge (Rinna Lei)' an tih, Sihhmui Tlawng lui chunga lei hian ropui taka hawn a phu a, sawrkar tan pawh inchhuanna tham a nihzia ilo thlir teh ang.
ZPM sawrkar tirh phatah Manipur nena kan inrina Tuivai lei 'Unity Bridge (Inpumkhatna Lei)' chu dawh kaia hawn a lo ni tawh a. Kum 1997 tuilianin a lak hnuah dawh kai leh miah lova kum 20 chuang fe sawrkar kal ta tumahin an dawh kai leh miah loh, siam thar lehnghal kha sawrkar thar tan achievement ropui tak a ni.
Sihhmui Tlawng lei pawh hi sawrkar kal ta hun hmasa lamah vawi tam tak politics-a party inbeihna a lo ni tawh ṭhin a. ZPM sawrkar rei lo te chhunga mipuiin an chhawr ṭangkai mek, hawn a lo ni ta hi thil lawmawm tak a ni. Sihhmui Tlawng lei–bailey bridge khahi ṭum 3 lai a lo chim tawh a, thih phah hial te an lo awm tawh a nih kha.
Lengpui Airport panna kawngpui pawimawh tak leh Mamit District mipui zawng zawngte chhuahka lei hi December ni 2, 2012 khan a chim a, khatih lai sawrkar hotu lu ber CM Pu Lal Thanhawla khan motor phurrit lutuk dan phal chin baka rit phurin a zawh vanga chimah a puh a nih kha–a vawi khatna chu.
October ni 31, 2014-ah a chim leh a, hemi ṭuma a chim chhan chu khatih lai CM Pu Hawla bawk khan, "A kilhna misualin an ruk vang," niin a sawi leh a nih kha–a vawi hnihna chu.
December ni 2, 2015-ah a chim leh a, khatih lai opposition party MNF aṭang khan an MLA Pu Lalruatkima te ho kha phûr em emin an zuk thleng thla a, Congress sawrkar beih nan tak an zuk hmang ṭhin a nih kha–a vawi thumna chu. June ni 16 2016-ah Tlawng lei bailey bridge chu an siam zo leh thei hram a ni.
Hetia bailey bridge pawh sawrkarin a buaipui tawk viau lai hian tuna Faith Bridge hi cheng nuai 795.89 senga dawh turin M/S Tantia hnenah work order pein, CM Pu Lal Thanhawla khan kum 2 chhungin kan zo ang tiin July ni 17, 2009 daih tawh khan a lo sawi tawh a. Mahse, harsatna hrang hrang vangin chuti maiin an zo thei ta lo. A ban an phunna lai a lo nghîng thei tih vel, technical thil neuh neuh te a awm a, dawh kai a ni thei ta reng reng lo a. MNF ho khan kum 7 chhung pawha lei pakhat siam zo thei lo tiin Congress sawrkar kha an bei nasa ṭhin a nih kha.
Kum 2018 tawp lamah MNF an lo sawrkar a, helai lei dawh turin Podder Infotech Pvt. Ltd. chuan March 2021 aṭangin hna an ṭan a, sum cheng vbc 36.99 ruahman niin March 2023-ah zawh tur tih a ni. Mahse MNF term chhung hian dawh zawh a ni ta bik chuang lo.
Tichuan, ZPM sawrkar a lo piang a, he kawng pawimawh tak National Highway 44A/108 ni bawka lei–steel arch (semi through) dawh hna tawktu Podder Infotech Delhi te hian ṭan lain, kum 2024 December thla tir khan an inpeih ta a. Mahse, he lei (bridge)-in harsatna a lo tawk fo tawh ang thoin, lei khai kângtu cable (hrui) pakhat chat avangin dawh kai theih a ni leh ta lo. Thla 3 vel tal nghah ngai turin an sawi leh ta a ni.
Tichuan, lei dawh kai tum hmasak khan Hindu sakhua inthawina nen an lo hlan tawh a. A tluan tak loh vang khan lei dawhtu company lamin Kristian puithiam ngeiin hlan se, an tluan tawh an rin angin, sawrkar leh department ten hma an la a. Lengpui Presbyterian Kohhran Pastor Rev. Lalchungnunga Hauhnar-in ṭawngṭainain lei hi a hlan hnuah, April ni 7, 2025 Thawhṭanni zing dar 7 velah dawh kai hna ṭanin, tlai dar 4 velah dawh kai inbeisei khan tluang takin chhun dar 12:50 velah an dawh kai thei ta a ni. A hmingah Faith Bridge (Rinna Lei) han tih pawh hi a âwm hle a ni.
He project atana Ministry of Road Transport & Highways (MoRTH)-in cheng vaibelchhe 36.99 a ruahman chu tunah mipuiin ṭangkai takin an zawh ta mup mup a. Kalphung thar sawrkarah chuan sawrkar kal ta hun laia chim fo, bailey bridge pawh an buaipui tawk viau kha RCC-in lei ropui leh mawi tak Chief Minister-in an hawng ta kha sawrkar tan chuan achievement ropui tak a ni.
- Hruaia Kawlni