Tlungvel EMRS kha!

Mizoramah hian sorkar laipuia Ministry of Tribal Affairs hnuaia hmun kilkhawr zawka schedule tribe naupangte'n a thlawna zirna ṭha an dawn theihna tura ruahman Eklavya Model Residential School (EMRS) 11 a awm a. EMRS zinga pakhat–Tlungvel EMRS sak dan hian ngaihtuahna a ti kal thui tak zet.

Tun hnai khan Mizoram State Project Monitoring Committee chuan media mite sawmin Tlungvel EMRS hi an tlawh a. He Tlungvel EMRS hi December ni 20, 2021 khan sak zawh tawh tura tih ni mah se, tun thla October ni 3 thleng kha chuan 78% vel thawh zawh a ni tawh a. Hetihrual hian, contractor hnenah sorkar chuan Tlungvel EMRS sakna tur pawisa a pek tur aṭangin 94% a pe tawh thung a; a pe kim thuak tawh tihna a nih chu.

Data aṭanga a lan danin, hetiang hian sorkarin Tlungvel EMRS sakna tur pawisa chu hnathawktu contractor VRS Construction hnenah a lo pe tawh a ni.

MNF sorkar laiin:

March ni 9, 2020-ah Rs 36,84,556, July ni 8, 2021-ah Rs 5,16,86,765, January ni 17, 2022-ah Rs 3,55,05,000, March ni 29, 2022-ah Rs 1,90,73,000 leh, January ni 23, 2023-ah Rs 4,32,22,900 a ni a. A khawihtu nodal department chuSocial Welfare Department an ni.

ZPM sorkar lain:

May ni 7, 2024-ah Rs 1,05,17,100, August ni 29, 2024-ah Rs 2,96,52,300, February ni 12, 2025-ah Rs 1,05,17,100 a ni a; hengahte hian nodal department chu Social Welfare an ni. October ni 31, 2025-a sum pek chhuah Rs 50,70,000-ah erawh chuan nodel department chu Planning an nit hung.

A vaiin hna thawh tawh (physical achievement) 78% velah pawisa pek tawh (financial achievement) 94% awm tawh a ni a. Hnathawh loh bill siam lâwka contractor hnena pawisa pek tam tham tak a awm ngei niin a lang. Tu sorkar pawh ni se, a viltu turte hian an vil dan an uluk a ngai hle tih a lang a, vilpui deuh pawh an ngai a ni maithei.

Heng EMRS-te hi kan ram tana hmasawnna pakhat mai ni a ni lo va, kan tu leh fate tana thil pawimawh em em zirna kaihhnawih a nih avangin he thil hi sorkarin a ngaih pawimawha a ngaihven ṭhat lehzual a ngai hle a. Ram mipui hian kan ngaih thutak lehzual a ṭul hle bawk a ni.

-HriatHriati Pa, Aizawl