THIHNA

Bible-in, "Pian hun a awm a, thih hun a awm," (Thuhriltu 3:2) a lo tih ang khan engkim hian hun a lo nei a. William Shakespeare-a lemchan Hamlet-ah khan Lalnuin Hamlet-a hnenah, "I pa thi tawh kha kawng lak vaivut zinga chhar chhuah leh theih i beisei em ni? Thil nung zawng zawng hi thi tura piang vek kan ni a, hun ral thei chhung aṭanga chatuan hun la pakai vek tur kan nih hi i theihnghilh ta em ni," tia a sawi ang khan, thi tura piang kan nih vang hi ni maw, ṭap chunga khawvel êng kan hmuh ni. Pian ni-ah hian han lawm vak tur pawh a nih chiah loh hmel avangin ṭap chhungin khawvel eng kan hmu a; mahse, kan chhungte erawh lawmin an hlim hle thung si.

Thihna hi mihringte thil tawrh zinga na ber leh rapthlak ber a ni ang. A thiate chuan engmah hre tawh lovin thawhlehna nghakin an muhil a ni mai a. Mahse, hetah hian tawp mai lovin, a thia chhungte, ṭhiante, amah hmangaihtuteah nghawng neiin khawharna, nguina, lunglenna, tawpna, ṭahna te a thlen hian a rapthlakzia a tar lang chiang.

Thanpuii Pa'n, "Thusawitu tam tak chuan nupa ṭáng ṭhen natzia sawi nan 'Koki lehlam sah thlak ang a ni' te an ti ṭhin a. Kei erawh chuan ‘Koki khing hnih sah thlak nena tehkhin zawk tur alawm’ ka lo ti rilru ṭhin a... Kum 12 chhung ka lo tuar tawh leh ka zirlai, mahse, ka thiam theih si loh 'Nun khawhar leh lunglen' chu Zikpuii nu hian a han hre ve dawn ta chu a ni a, ka va han lainat tak em," tia (Thu leh Hla Dec. '94) a sawi hian thihna rapthlakzia leh a nghawng natzia a tar lang chiang viau mai.

R Zuala thawnthu tawi, ‘Daw ve ngai hek lo’ tihah khan thihna tuartu tuar nat dan tur a hriatthiam theuh deuh ruakin ka hria. Kha thawnthuah khan a nupui boral thut avanga a thil hmuh dan leh thlir dan chu hetiang hian a chham chhuak a:

1. Ka han hawi vel a, engmah danglam chu a awm hauh si lo. In te, thing te, kawng te, ṭhenawm te zawng zawng an kim thlap a , ni chu a ên ngaiin a la êng reng a, khua lah a vawh ngaiin a la vawt bawk a; mahse, engmah a awm tawh si lo.

2. Kan inah chuan a khatin mi an leng ṭuai a; mahse, a ruak huai mai si.

3. Ṭhenrualin min lenpui a, an zai tlut tlut a; mahse, a reh vung vung si a… Lainate’n min han hnem a, an thu sawi chu ka bengah chuan a ri ngei mai a, ka thinlung erawh chu a thleng pha hauh si lo va. An thu sawi chuan ka tan awmzia reng reng a nei thei hauh lo mai.

4. ’Khuareiin min hnem ngai e’ an tih ṭhinte chu awih ngaihna reng reng ka hre lo.

5. Fiamthuin nuihzatthlakna a zep bo va, mut hian nawmna leh hahdamna min pe phal ta lo.

6. Khawvel hi eng eng emawin khat mah se la, mawina te, hlimna te, lungawina te erawh chu a lo awm hauh lo a nih hi… Ka mit hian mawina chu a hmu dêr ta lo.

7. Ka nun chu a rit hluah hluah a, zawh loh phurritin a delh bet a, ding chhuak zo lovin a la thaw ṭêk ṭêk a ni ta ber. (‘Khawithlar’ R. Zuala Thu leh Hla Lawrkhawm).

Thihna hi chu a râpawm bawk a ni ang, kan Lal Isua Krista meuh pawh kha a thih dawn kha chuan a hreh ve hle a nih kha. Hezekia damlo pawh zawlnei Isaia kaltlanga Pathian thu lo thleng chuan, "...dam chhuak lovin i thi ngei dawn si a," tia a hrilh meuh chuan bang lam hawiin a let a, Pathian auin a ṭap zawih zawih bawk (2 Lalte 20; Isaia 38)! R. Zuala paw’n a thawnthu, ‘Daw ve ngai hek lo’ tihah khan, “Beiseina nei hauh si lovin thlanmual chu ka thleng ta zut a, lungngaih leh beidawnna chauh ka hawn leh ṭhin, mahse, ka kal leh bawk ṭhin. He hmun hi a zau lo. Awm chu an ṭhahnem hle a, vui leh vai lah an awm hek lo. Fit ruk leh fit thuma zau an chan chuan an lungawi hliah hliah mai a ni. Thlan lungte chu ka chhiar lâwr ka chhiar lâwr ṭhin a. Nupui fanau hmangaih thiam te, nu ngilnei te, tlangval chhuanawm te, nula rinawm te, fa thuawih te an ni vek a. Khawvelah hian mi ṭha chauh an awm si lo va, a ṭhate chauh hi an thi ṭhin em ni le? Mi sualte hi khaw’nge an phûm ve le? Mi sual thlanlung pakhat mah a awm ve si lo. Rei fe ka ngaihtuah hnu chuan mihringte hian mitthite hi kan er lo a nih hi, an chanchin pawh a ṭha thei ang berin kan tar chhuak zel a lo ni hi ka ti ta a,” tih hian thih chu thil châkawm tak a ni lo tih a tar lang ṭha hle.

Zawlnei Eliza erawh zawlnei Jezebeli hlaua tlanchhiain Pathian hnenah thih a dil thu Bible-ah kan hmu lawi a. Hei hian hlauhna, lungngaihna, beidawnna te hian thih châkna leh thih duhna hial a thlen thei tih a tichiang ang. Mahni nunna la ta mai pawh tam tak sawi tur an awm a nih hi maw! Thih hlauh loh ringawt mai chu a lehlam zawng taka ngaihtuah chuan a rapthlak hle; amaherawhchu, "Thihna hi chatuan hmun kawngka hawnna chahbi rangkachak a ni," tia John Milton-a'n a lo sawi angin, Kristiante tan chuan nung tura thihna ti pawhin a sawi thei ang. "Chatuana nung tawh chuan thih a hlau ngai lo," tiin William Penn chuan a lo sawi ve bawk. Tertullian-a phei chuan "Thihna hi rangkachak tawlailir, Pathian hnen min phur thlengtu a ni," a ti hial. Natna ṭihbaiawm tak tak avanga ná te, unconscious-a awm, engmah hre tawh lo te, tihdam theih tawh loh natna tuara rûm vawng vawngte tan chuan dam reng ai chuan thih an thlang zawk mai thei. Anmahni hmangaihtu tan phei chuan kan hmangaihte na tuar hmuh reng chu a hrehawm ngawt ang. Natna hre tawh lova thihte hi hetiang mite tan chuan malsawmna a ni thei hial maithei. Hetiang a nih avang hian mercy killing (khawngaih thah)-te pawh an sawi ṭhin kha.

Mahse, thihnaah hian mahni intihlum, he’ng inâwk hlum, tûr hmanga inti hlum, ka châkna vang leh nawmna thlakhlelh vanga ruihhlo vanga inti hlum te leh, vanduai vanga natna leh tawhsual tawh vanga thite zawng zawngte hian nakinah dinhmun inang changin Pathianin a buatsaih van ramah hmun an chang tlang vek ang em? Kan chhan tur leh kan chhan theih pawh a ni lo maithei. Eng pawh ni se, Bible chuan Pathian chu sual hawtu, mi sual inchhirte ngaidam ṭhin leh hmangaihna leh khawngaihna khat Pathian a nih thu a sawi a. Pathian mite chenna tur lei thar chu Thupuan buah kan hmu a; tin, mi sual an thih mangna hun leh hmun tur Bible aṭangin kan hmu bawk.

American progressive metal band 'Dream Theater' hla pakhat "The Spirit Carries On" tih hla ka ngaihthlak apiangin Mary Elizabeth Frye hla 'Do not stand at my grave' tih leh William Shakespeare-a hla 'Fear no more' te hian thinlung an rawn luah nghal ṭhin a; a tawpah Carrie Underwood hla sak 'Temporary Home' ah bawk ka tawp leh nge nge ṭhin.

Where did we come from?

Why are we here?

Where do we go when we die?

What lies beyond

And what lay before?

Is anything certain in life?

They say, life is too short

The here an the now

And you're only given one shot

But could there be more

Have i lived before

Or Could this be all that we've got?

(The Spirit Carries On)

Thihna chungchangah zawhna kan nei fo lo thei lo va; a chhan chu thihna tuartute lah biak zui theih an ni tawh ṭhin si lo. A tawngtute ber an reh vung vung a nih chuan thih hnua awm zui zel dan tur hian rilru a luah lo thei lo a ni ang.

Khi hla châng khatna leh châng hnihna khi Lalduhzuala hla phuah nen pawh hian a inzul viauin ka hria:

Eng dawn ang maw hmanah khuanu hian,

Hringnun a duan lai khan;

Hrailêng awmhlei dung a thûl em ni,

Hringnun hi a lo duan le.

Aw, enga'n nge maw Khuanu hian,

Hringnun hi a lo duan le?

Thâmral leh mai tur hian em ni le?

Duh vang rêngin kan piang si lo.

Mîm ang piangin sial ang kan sei lian,

Hai ang tara fam ralin;

Aw, dam chhan hi nei tak ang maw,

He khawvel sual khurpuiah.

Khawi lamah ṭuan rem ang i maw,

Hringnun hi a ral hunin;

An sawi pialral hi awm tak ang maw?

‘Tah chuan engtin zel ni maw?

I used to frightened of dying,

I used to think death was the end,

But that was before

I'm not scare anymore

I know that my soul will transcend.

I may never find all the answers,

I may never understand why,

I may never prove,

What i know to be true,

But i know that i still have to try.

(The Spirit Carries On)

He hla phuahtu hian thih a lo hlauh tawh ṭhin thu te, thihna chu mihringte tawpna ni maia a hriat thin thute a sawi. Amaherawhchu, tunah chuan chung a hriat dan leh pawm dante avanga hlau tawh lovin, a thih hnuah pawh a tharau chu a la thawh kân ngei tur thu chu amah chiangin a inhre tlat a. Heta ‘My soul will transcend’ a tih hi Mizote’n thih hnu piah lam chungchanga kan rin dan leh Kristian tam zawkte rin dan nen pawh a inhnêk rem hmel hle – thih hnua thlarau, mihring aṭanga chhuak, mihring taksa ang la pu, mahse, danglamna erawh nei deuh si awm zui zel tura ngaihna chu. Mahse, Bible aṭang hi chuan mihring thlarau a tih hi chu atira Pathianin mihring hmasa ber a siam laia nunna nei tura ‘Nunna thaw’ a thawk luh kha ni maiin a ngaih theih. Chu chu thih hnuah a petu Pathian hnenah a kir leh mai a ni ang. Ramhuai erawh Bible aṭangin an awm ngei a ni tih a hriat theih.

Zawhna chhanna zawng zawngte chu hmu kim vek dawn lo mah se, thil zawng zawngte chu hre thiamin hre kim vek dawn lo mah se, a chhan leh a vang, a bul a tawp, a nihna leh nih lohna emaw, ni tura a lo rin leh beisei, fin fiahna leh tih chianna emaw te chu hmuh vek kher dawn lo mah se, tumna leh rinna hmanga ke pen mai chu a tih thei awm chhun niin a hria a nih hmel.

If i die tomorrow

I'd be alright

Because I believe

That after we're gone,

The spirit carries on.

Move on be brave

Don't weep at my grave

Because i am no longer here

But please never let

Your memory of me disappear.

Naktukah ka/kan lo thi a nih pawhin ka/kan tha ang. A chhan chu ka/kan thih hnuah ka/kan thlarau chu a la awm chhun zawm zel dawn a ni tih a ring tlat si. Chuvang chuan amah ngainatu leh sûntute chu a thlanah sûna ṭap lovin, huaisen taka hma lam pan tura hrilhin, amah chu thlan chhungah a awm tawh loh (tur) thu a sawi a nih hi.

Amaherawhchu, an thinglung aṭanga paih bo leh theh chhuah, theihnghilh leh hriat zui tawh loh erawh a hlau hle a, chutiang thil chu thleng lo se a duh thu a chham chhuak tel a ni:

Move on be brave

Don't weep at my grave

Because i am no longer here

But please never let

Your memory of me disappear.

Helai châng leh Mary Elizabeth Frye poem ‘Do not stand at my grave and weep’ tih nen pawh hian a inzûl viau mai:

Do not stand at my grave and weep

I am not there; I do not sleep.

I am thousand winds that blow,

I am the diamond glints on snow,

I am the sun on ripened grain,

I am the gentle autumn rain.

When you awake in the morning's hush

I am the swift uplifting rush

Of quiet birds in circled flight.

I am the soft stars shine at night.

Do not stand at my grave and cry

I am not there; I did not die.

Thihna hi a tlangpuiin a negative zawngin kan thlîr tlangpui niin a hriat a. William Shakespeare-a play Cymbeline tihah chuan poem rilru khawih deuh mai "Fear No More The Heat O, The Sun" tih kan hmu a. He poem-ah hian 'thihna' chu thlîr dan dang deuhin min thlîrpui a, hriat a nuam hle:

Fear no more the heat o' the sun

Nor the furious winter's rages;

Thou thy worldly task hast done,

Home art gone and ta'en thy wages:

Golden lads and girls all must,

As chimney–sweeper, come to dust.

Turni hrang vanga rum ngai lo,

Sikpuikhaw vawt tuar tawh lovin;

Khuavel sum pai zawn ngai lo,

Run a ram, thawhrim rah chanin,

Tleitir sakruang mawina chu,

Vut leh vai iang phiatfaitu chu.

Fear no more the frown o' the great,

Thou art past the tyrant's stroke;

Care no more to clothe and eat;

To thee the reed is as the oak:

The sceptre, learning, physic, must

All follow this, and come to dust.

Sakhmel kawl ang hnim hlau lovin,

Ngur rawng vanga nat awm lo;

Dam chhung khawsak lungkham pelin,

Phairuang iang sasua a lem lo,

Mi-mang, chhantling, daktawr te chu,

Vut leh vaiah, hringmi zawng chu.

Fear no more the lightning–flash,

Nor the all-dreaded thunder-stone;

Fear not slander, census rash;

Thou hast finish'd joy and moan:

All lovers young, all lovers must

Consign to thee, and come to dust.

Kawl phe hrang vanga zam lo,

Chung khaw ri, mu ang thawngah pawh;

Rel leh sel vanga zam lo,

Rial ang ral: lunglawm, lungzur pawh,

Hmangaih zun ngai tleitir zawngte,

Vut leh vaiah, hring fa zawng te.

No exorciser harm thee!

Nor no witchcraft charn thee!

Ghost unlaid forbear thee!

Nothing ill come near thee!

Quit consummation have,

And renowned by thy grave.

Huai sual tihbuai theih loh,

Dawithiam khawpui–engmah,

Huai thlah zalen chu nangmah,

Sualte tih buai phak loh,

Tawpna vawrtawp changin,

Laimi hriat zawng–i thlan.

Khi hla atang khi chuan mihring nun tihrehawmtu zawng zawngte kianna leh min khawih buai theihtu zawng zawngte ralna–thihna chu kan ngai thei hial dawn a lawm maw le! "Chuvangin, mi nung la damte aiin mitthi thi tawhte chu awhawm ka ti zawk," tia Bible (Thuhriltu 4:2)-ah pawh kan hmu hial kha maw. Thihna chu a tawpa roreltu dik emaw, mi zawng zawng ang khata min hrût rualtu ti pawhin a hriat theih bawk ang, “Mi fingte pawh an thi a, mi â leh mi mâwlte pawh an boral ve ve a, an sum mi dangte an hnutchhiah ṭhinte chu a hre si a,” tih Sam 49:10-ah kan hmu a. K. Hminga paw'n "Thihna hmaah angkhata kûn za ṭheuh tur hi tu nge inthlei thei" a tih kha.

Khawvelah hian khualzin mai kan nih avangin kan awm reng dawn loh tih hriain, mi dang tan malsawmna nih tum la, thil ṭha tih tum rawh. Sam 49:11&12-ah chuan, “An rilru ngaihtuah dan chu, an inte chu kumkhuaa awm tur ang leh, an awmnate chu chhuan zawng zawng thlenga awm tur angin a ni; an ramte pawh anmahni hming vek an puttir ṭhin. Nimahsela, mihring hi chawimawiin an awm reng lo va; sa boral ṭhinte ang mai hi an ni e,” a lo tih kha.

Chapo suh, nangmah chauh inngaihtuah suh, sum leh pai leh nihna te thlakhlelh avangin thil dik lo ti suh; khawvela thil awm zawng zawngte hi an la ral vek dawn. Pathian ṭih la, a thupekte vawng rawh.

Khawvel hmaah i chanchin–thawnthu i ziak mek a ni tih hria la. Thawnthu ṭha nge thawnthu ṭha lo i hnutchhiah dawn inngaihtuah la; thawnthu ṭha tak ziak ngei turin inbuatsaih ang che. Sam ziaktu chuan "Kan dam chhung kumte hi thawnthu angin kan titawp ṭhin," a lo tih bawk kha.

Carrie Underwood-i’n mawi tak maia a sak ‘Temporary Home’ hla hian khawvel hi kan khualzinna ram a ni tih a han tarlang nawn leh teh se:

This is my temporary home

It's not where I belong

Windows in rooms that I'm passing through

I'm not afraid because I know this was

My temporary home.

- Zoliansanga Tlau