KAWNG AWLSAM A NI LO

Zoram politics khawvelah hian ‘kih hnawk’ tih hi sawi a awm fo va. Tute sawrkarin emaw ruahmanna felfai tak nei lovin sawrkar an kaihruai a, an hnathawh buarchuar tak mai chu a siam ṭhat leh hna thawktute’n, "Kan hmaa mite kih hnawk a tam lutuk a, kan kal hleithei lo a ni," tia an sawi ṭhin aṭanga he ṭawngkam hi rawn chhuak a ni awm e.

Kan hriat ṭheuh angin kan sawrkar kal tateah khan party induhsakna a nasa em em a, eng hamṭhatna thil maiah pawh khan an party ni ve lote tan chuan inrawlh ngamna chi a ni lo hrim hrim mai a. Ram inrêlbâwlna thilah ruahmanna mumal tak pawh nei lovin an kal bawrh bawrh mai a tih theih awm e. Sawrkar hnathawk tur an lakte pawh kha, an thiam avanga la ni lovin, an party mi leh sate an nih avanga lak an ni tlangpui a. Chuvangin, sawrkar office-a hnathawh chu felfai ngaihna a awm lo a ni. Dan leh hraiin awmzia a nei lo a, dan lo kha dan zawk emaw kan ti hial a nih kha. Entir nan, sawrkar hnathawk aikal lak tihte kha keini ang duang chuan danin a phal emaw kan lo ti hial a ni. Leibate lah chu a maka maka tam an nei a, electric bill-te pawh mipuiin thla tin ba miah lova kan pek ṭhin pawh sawrkar berin a lo ba zel mai a, an hnua sawrkarna rawn changte tan chuan phur ritna tur hi a tam tak meuh a ni.

Heng ang tehnuai karah chuan eng party pawh sawrkar se la, kan ram leh hnam hmasawnna kawng zawh turin kawng awlsam a ni dawn lo tih chu tlang hriat sa a ni. A chhan chu, kan sawrkar kal tate rorel dan aṭang khan tluang taka kal hleihtheih hi a ni dawn lo hrim hrim a. Chuvangin, tuna sawrkarna changtute hian an hmaa mite kih hnawk then tur tam tak awm chungin ram an kaihruai a ni.

Hetihlai hian, a kit hnawktute lah chuan, "Keini’n tih ngaihna kan hriat loh an rawn ti thei zel mai hi a va lawmawm em," tih ahnehin, anmahni aiin thil an ti ṭha zawk ang tih hlau ni awm tak hian eptu party-te hi an awm emaw tih mai tur a ni si a. Keimahni aiin kan ram an kaihhruai ṭha zawk ang a, an sawrkar chhungin kan ram hian hma kan sawn bik lutuk ang tih hi an hlau ni berin an lang ṭhin a ni. Chuvangin, eptu party-te hian sawrkar laite hi an kal tluan theih loh nan tihbuai an tum ve char char a nih ber hi maw le.

Kan sawi tak ang khan, kan ramah hian siam ṭhat tur a tam em em a, hmasawnna kawng zawh tak tak tur chuan huaisen taka an kal a ngai a, thil ṭha nia an hriatah chuan tu mitmei mah veng loa an kal a ngai a ni. Mi tam tak huat leh ngei nih pawh an hlawh a ngaihna chin a awm a nih hi.

Aikal lak tihtawp ri ngawt pawh tih namai a ni lo a. Offices kal hunbi dik taka kal tura sawrkar hnathawkte an nawr a ngai bawk nen; a va hautak tak em ve aw. Kum tam tak an lo tih dan han bansantir tumte kha, leiba rulh tur tam em em bawk si nen, kawng awlsam zawng a ni mawlh lo a ni. Nimahsela, Pathian chakna rinchhana kal an nih avangin Zoram khawvel thim tak kha a eng ve det det ta e. Mipui lam pawh kan lawmna thawmthang ri a ring sawt viau zel a, kan thawpikna ata chhanchhuah mekin kan awm a, hma lam hun eng nei vein kan inhre ta a nih hi.

Kawng awlsam a ni lo chung pawha ZPM sawrkarin mi rethei leh kut hnathawktute hmakhua ngai taka dinhmun ṭha zawk, min hruai thleng hi kan lawm em em a ni. Kut hnathawktute thlai thar min leisakte leh mi harsa zawkte’n damdawi in awmna man lungkham ngai lova kan han awm thei tate hi, kan ram hruaitute chungah lawmthu kan sawi mawlh mawlh a ni e.

Chuvangin, kan ram hruaitute u, mi ṭhenkhatin beisei an pha lo tiin sawisel che u mah se, huai takin hma lam pan zel ula, kan ram ṭhatna turah chuan hlauh nei suh u. Kut hnathawktute leh mi retheite hi in hnungah kan rawn ding zel ang a, in kalkawng hi kawng awlsam a ni lo tih kan hriatpui che u a ni.

- Hausanga Hauzel