PHONE EN HI

Eng zung chak takin a kah ên, phone leh TV êng te hi chin tâwk nei lova kan en chuan mitin a ṭhat loh phah thei a, mit kan vawn uluk a ṭul hle a ni.

Lalpa’n mitnaute min pek hi a thil siamte hmuh theihna tur a lo ni a, van dumpâwl ruih te, tuifinriat dumpawl te, khawmuala ramngaw hring dup te leh a thil siam dang zawng zawngte kan en hian kan mitin a chhiatpui ve lo va, a ṭhatpui zawk a ni.

Mihring thil siam chhuah screen êng te, lehkha ziakte kan en nasat hle chuan kan mi tin a ngeih ve lo. Phone leh TV te hi kan nunin a ṭangkaipuina turah chuan kan en tur a ni. Mahse, nawmchen (enjoyment) leh inawm tlei nan kan en reng mai chuan, chu chuan kan taksaah ṭhat lohna tam tak a thlen thei a, hengahte hian kan rilru fim hmang chuahvin insiam ṭhat theih a ni.

Phone entute zingah zaah mi sawmhnih velte chu phone en nasa an ni a, an rilrua an vei zawngte chu an chhu lut zung zung a, rei lo teah an thu thawnte chu mite’n engtin nge an tih, thil thar lo thleng a awm leh tawh em, tiin an en leh thuai thin a, rei an rial hman lo.

Phone inawm tlei nana en nasate zingah a tam zawk chu mahni inthunun thei lo, mahni ṭhatna turin hun vawn dik pawh ti thei lo an ni. An hun âwlte hnathawh nan leh thil ṭangkaia hmang lovin phone en nan an inhmang nasa a, chungho zingah chuan mi thatchhia te, thinrim hmang te, thuawih duh lo te, zelthelna nun nei te, mahni chauh inngaihtuahna te, mahni thu duhte an tam hle. Hengte hi phone en nasate nuna lo thleng mek chu a ni.

Phone entute zingah a tam zawkte chuan ngawi rengin an en a, an ngaihdan pawh an chhu lut ve lo, chungte chu silence reader an ni a. Ngaihdan chhut luh ve zel kha ṭul an ti lo va, chungte zingah chuan mi fing pui pui, mi taima tak tak, nun invawng ṭha an tam hle a ni.

Phone entute zingah lamhláa chhungkhat laina, ṭhian ṭhate hnenah ‘In dam tlang em?’ tih nachang hre lo an tam ṭhin a. Ni tin, chawlhkar tin inbiak pawhna hun kan pek chuan chu chuan inpumkhatna ṭha min thlen thuai ang a, mi bengvar kan lo ni mai dawn a ni.

Phone hi kan hriselna tichhetu leh kan nun tichhetu a nih theih avangin hman fimkhur a ṭul a. Mite sawichhiatna ai chuan kan nun kaihruaitu atan hmang ila, chhung tinte hian kan fate phone en chungchangah inkhuahkhirhna khauh tak kan kalpui a ṭul tak meuh a ni.

- H. Neihchungnunga, Durtlang