1984 HARHNA HLUTZIA KHA

Kan pianthar tirh lam chuan mi hlimte hi kan hmu thiam vak lo va, piangthar si lova lâm vang maia 'uphuk lungmuan' ve mai maiah kan dah a ni deuh ber ṭhin. Chutiang bawk chuan mihlimho lahin piangtharho kha Pathian thlarau chang ve lovah min dahin min do deuh tlat ve bawk a. Hun eng emaw chen chu kan inla hrang deuh rân ṭhin. A boruak erawh zawi zawiin a dai chho ve zel a. Khatih lai Zoram khaw tam takah khan hemi piangtharte leh mihlimte inpawm loh tawnna boruak hi a awm ve hlawm bawk. Kan han piangthar chho kha chuan, kan nu leh pa te, chhandam campaign tawng ve pha lote kha chu kan hmuh ang hmu ve lo, piangthar ve lova inkhawm ve mai mai riâkah dahin kan vei let em em ṭhin nghe nghe a ni. Hei hi Presbyterian Kohhran chhung bik boruak pawh a ni thei bawk.

Hetihlai hian, kum 1984 harhna khan Zoram a rawn nuai ta a. 1984 harhna lo thleng kha a hlut em emna chu–mihlim leh piangthar inkar kha a rawn thlei rem ta vek mai kha a ni. Kha harhna aṭang kha chuan piangthar inti, lâm duh loh chu sawi loh, lengkhawm hla rêng rêng pawh sa duh mang hauh lote kha min sawi lâm a, ṭhenkhat phei chu a lâm nasa leh a chang sangah an ṭang a. Mihlim, solfa hla do tlat ṭhinte pawh kha solfa hla tui takin an lâmpui ta zel a; a duh duhah an ṭang ta bawk.

Kei ngei pawh lâm do ber pawl kha ka lâm ve ta lâwp lâwp a. Chuta ṭang chuan hlimna leh piantharna hi kohhranah a kal kawp chho ta reng a. Chumiin a hrin kal zel chu, ṭhalaite hla, zaipawl sak mi hlate pawh khuangpui leh khuang tê nen, khuang hniha rawnin kan lâmna hla ber a ni chho ta zel a. Zaipawl member ngei ngeite pawh lâm hma hruai leh a chang sangah an ṭang ta zawk hi a van ropui em!

He harhna boruak ka chan ve aṭang hian kei pawhin hun kal tawha kan nu leh pa te, chhandam campaign-a piangthar ve lote pawh khan Pathian an lo hmu ve ngei a, a hun zelah Pathianin amah kan hriatna leh kan rinna tichak turin kohhranah harhna a thlentir mai ṭhin a lo ni, tih ka pawm thiam phah ta viau nghe nghe a ni.

Chutiang chuan, Zo fate hi Pathianin harhna chi hrang hrang min pe zel a. El Bethel harhna te, Kelkang harhna te leh harhna dangte pawh min pe zel a. Khang harhnate kha Pathian min pek ngei a ni a, sawichhiat tur a lo ni hauh lo. Keimahni a changtute hi kan chak loh ṭhin avanga a changtu tam berte’n Thlarau Thianghlimin min hruai leh min thlenpui a tum thleng zo lovin kan chak lohsan leh mai ṭhin a ni zawk ang. Kohhranah harhna a thlen nasat poh leh Setana hian tihbuai leh kaihlek dan tur a zawng nasa ve ting mai ṭhin si a.

Mitdel sai en an sawi ṭhin ang kha kohhrana mi chi hrang hrangte’n Pathian chatuan mize thûk lutuk, mihring hriat vek phak rual loh chu kan hriat leh kan pawh dan hi a ni fo va. Mitdel sai en pawh, pakhatin a nawn a khawih a, "Sai chu ṭin ang a ni," a ti a. A dangin a ke a khawih a, "Sai chu ban ang a ni," a ti a. A dangin a beng a khawih a, "Sai chu sisêp ang a ni," a ti a. A dangin a pang a khawih a, "Sai chu bang ang a ni," a ti a. An hmuh dan chu inang lo vek a, mahse, an zavaia hmuh chu sai thuhmun ngei a ni si.

Chutiang deuh chuan, Pathian Thlarau Thianghlimin min khawih harh dan kan sawi fiah thiam dan hi a inang vek lo ṭhin a ni ber awm e. Kan inthurualna ber erawh Pathian chu hmangaihtu, a huna a mite Thlarau Thianghlima min tiharh ṭhin, hnaih leh zawng duh lotute erawh tilui ngai lo, mihring duhthlanna sang tak pe ṭhin a ni, tih hi a ni vek ang.

Ṭhenkhatin duh lo chung la chhuak lui anga an insawi pawh hi anmahniin lak chhuah theih tura an hnaih sa vang a ni fo vang. Hetihlai hian, Pathian Thlarau Thianghlim hian a ram tizau tura a mi hman duh bik, a bêlruat, tirhkoh Paula a lak chhuah dan kawnga lak chhuah a nei ve bawk ṭhin tih pawh kan hre ṭheuh bawk.

"Hmu tawh reng inti ka ni lo va, famkim tawh reng inti pawh ka ni hek lo; Krista mi man chhan chu ka man thei dah law maw, tiin a ûmin ka ûm zâwk a ni. Unaute u, manah ka inngai lo. Amaherawhchu, he thil pakhat hi ka ti ṭhin, hnung lama thil awmte chu theihnghilha hma lama thil awmte chu banin, Krista Isuaa Pathian chung lam koh chhan lâwmman chu hmu tûrin, tiam chin lam chu ka pan ṭâlh ṭâlh a ni. Chutichuan, puitling apiang chutiang rilru puin i awm ang u; tin, eng kawngah pawh rilru danglam pu in lo nih chuan, chu pawh chu Pathianin a la hriattîr zâwk ang che u. Engpawh ni se la, kan thlen chin aṭang khan hma i sâwn zêl ang u.” (Phil 3:12-16)

- PC Hmangaihzauva