WHAT THE BIBLE SAYS!

Border fencing, Sairang Rail Station, border trade, ram development tihahte hian Bible-in a sawi thu (What The Bible Says) te hian ṭangkaina an nei em le? Israel fate’n Kanaan ram an luh dawn khan hmasawnna ropui lutuk an chang dawn a ni. Pathian chuan thu a chah khauh hle a. Kanaan rama lo awm sate chu pakhat mah zuah lova thah mang vekna order a pe a ni. An thah mang lohva an inawm pawlh chuan Pathian dangte biakna lama an hruai kawi a hlau a ni (Deut. 7:1-6). He Pathian thupek hi tunah tak hian kan chhût thuipui a ngai ta hle.

Mi tam tak hian hmasawnna (development) hi kan virpilh lutuk ta niin a lang. Hmasawn chu duh mah ila, kha hmasawnna khan kan hnam nunah thil ṭha lo eng nge a thlentir theih tih hi kan ngaihtuah lo khawp mai. Chu chuan kan Kristian nunah eng nge a thlen theih leh ang tihte hi dâwn tel a ngai. "Mizote hian hlauh tur hi kan hre leh lutuk a," ti liam puat puat lah inti thil hre deuh zingah hian kan tam. Kan hnam pumpui tana thil hlauhawm lo thleng thei hmuh thiam loh leh hlauh nachang hriat loh hi a pawi dawn asin!

Engkim hretu Pathian chuan a mi Israel-te Kanaan ram lut tûr kha a ngaihtuah khawp a. Lo awm sate kha "Tiboral vek rawh u, an hruai sual ang che u ang a, min zui lai hi min pênsan ang," a ti a nih kha. Pathian hi khawvel hmangaih em emtu a ni nâ a, a lo nationalist veng veng khawp mai! Tihian ngaihtuah ta ila: Zo fate hi hnam dang pawlhsawp lutuk loh hian awm ta ila nge ṭha ang a, hnam dang hian min rawn pawlh ta nûlh nûlh se, kan hnam nun leh kan sakhaw nunah ṭha zâwk ang? He pawinṭ-ah hian kan chiang vâk tur a ni phawt mai. Hmasawnna kan sawia kan ngaihtuah hian kan hnam leh ram tana Pathianin ṭha min tihpui tur hi i ngaihtuah tel ngei ang u.

Heng pawinṭ tê tête hi i en teh ang. India sorkar chuan kan Zoram hi ram dang laka min hung a duh, defence lam te, thil ṭha lo lo lut tur invenna pawh a ni ang. Mahse, kan ram poliṭiks chuan a duh hauh lo. Party zawng zawngin border fencing hi an induh loh hmuh nia! Ramri hung him loh leh vên him loh avanga misual leh thil sual a lo luh nasatzia hi! An ngaihtuah lo em ni? Ruih theih thilte hi chu khawvel problem a ni a, him piala awm chu beisei chi a ni bik lo. Mahse, eng vang emawa misual leh thil sual lo lut nasa lutuk hi kan chhiat phah mêk a nih hi! Mizote hi mi dang chîm tlak kan la ni lo! Border fencing hi awm se, ṭha taka venhimna inthuah se la, kan ziaawm khawp ang.

Sairangah rel a lo thleng ta. Zin a va awlsam sawt êm! A va ṭha em! Mahse, kan Pathianin min hlauhthawnsak chu phai lam mi an tam lutuk dawn tih hi a ni! He thil ṭha hian thil ṭha lo, pawi thui lutuk a thlen thei. Phai lam mi, kan sakhaw milpui pawh ni lo an tam hian Mizoram hian kan ṭhatpui ang em? Hmana 1978, 79 vela Gauhati lama Assamese leh Bengali intihhlum chiamte kha a bul chu Railway an ti asin! Railway hna reng reng kha Calcutta-ah an la vek si a, NF Railway hêtkuaṭar ni hek. Kar lovah Assam-ah pawn lam mi an tam ta lutuk a, a puak keh ta a ni.

Ram leilung fate kan la ang tihte hi chu ṭawngkam ṭha mai a ni ngei dawn. Kan sorkarte hian huaisen taka an bih chian a, na têk tâwka an dodal a ngai dawn. Mizo deuha phai lam mite awka nêma lungawi mai i ni tawh lo ang u. Kanaan ram luh dawna Pathianin Israel fate a fimkhurpui thu hi i theihnghilh lo ang u. Chawhmeh man a to si, chhim lam kawngkapui a inhawn hunah chuan Kolkata aṭangin thil tinrêng tlawm takin kan lei thei ang i ti ngawt a ni maw? Phai mite min chiahpiahna tur kawngka zau em em a inhawng nghal a ni tih hre ta che! Vai fa kan pung thûr thûr dawn! Inngaihna sual hi hmasang ata tawh fuih kan ngaih lohna lam a lo ni sa si! Kan Kristiannain engtin tak tuar ang maw! Tourist Deptt chuan pawn lam aṭangin zinmite’n min rawn tlawh hum hum se, sorkar leh mipui tan sum kawng a ni an ti. A dik. Mahse, Mizote hi tourist tam tak dâwl zo character kan la nei lo. Khawvelah tourist-te hi ram sum hnar an ni thei; mahse, a lo dawngsawng thei character kan neih loh chuan chhiatna zakhua tho a ni.

Engtin nge kan tih tak ang? Kohhran a chet a ngai. Pathianin khawvel a hmangaih em em a, development nasa tak a pe tih a nih loh kha. A Fapa a pe tih a ni (John 3:16). Pathianin Mizote hi min hmangaih em em a, a Fapa chanchin ṭha min pe a nih kha, 1894 January 4-ah khan. Kha ngei kha kan hmasawnna tur chu a ni. Pathian thu hmun dangah chuan, "Hei hi a ni khawvel hneha ngamna chu, kan rinna hi," tih a ni (I Johana 4:5). Rinna nghet nei ila pawn lam mi lo lut hi kan tan an hlauhawm lo vang. Mahse, kohhran hian tih hleihtheih loh leh tuipui loh bawk kan nei. Vanram kai kan lungkham lutuk a, mahse, kai thei tak tak turin Isua lalna hnuaiah kan inpe si lo. Kan Lal Isua’n Juda hruaitute a sawiselna kha? Saphun siam turin ṭhahnem an ngai, mahse, felna te, rinawmna te, khawngaihna te in ngaihsak si lo a ti (Matt 23:23). Thosi thli faia sanghâwngsei lemtute a ti thûl (Matt 23:24). Kohhran hian felna te, rinawmna te, thianghlimnate hi inzirtir takmeuh ila, hmasawnnain a chhe zawnga min ei theihna lakah hian kan him ang.

Pathianin Israel fate Kanaan ram lut turte khauh taka thu a pe ang khan, min chîmtu mi dang lakah kan him theih nan Pathianin hmanrua min pek hi kohhrante hian i hmang takmeuh ang u.

- F. Lal Thanzuala. 9436141242