Zorama sualna pung zel tinêp turin

France rama lawngchawlhna Dunkirk (Dunkerque)-ah chuan Germany sipaite leh Kumpinu sipaite an indo va. German sipaite chuan Kumpinu sipaite chu ar dawih zawk ûm takin an ûm dâwr dâwr a, an that mang lo chauh a ni.

Indona hmuna an hotupa Field Marshal Montgomery-a'n British sorkar hnena report a pek lehnaah chuan , "Khami ṭum khan German kan hneh lo a ni mai lo, a hmaa indo dan tur kan relna hmun London White Hall aṭang daiha hneh lo sa kan ni," a tih ang deuhin, Mizorama sualna rah chi hrang hrang kan hmachhawn mek hi a ṭobul leh a lo pian chhuahna chu Mizoram khaw tina chhungkaw tinte’n kan naupangte kan enkawl danah kan hneh lo sa a, kan tlawm sa a ni i ti teh ang.

Kan rama sualna inlâr dan chi hrang hrang–tualthahna, sum ngainat luatna, rûkrûk, eiruk, hmeichhiat mipat hman sual, ruihhlo ngawl vei, mahni intihhlum, Pathian ngaihsak anna leh dan bawhchhiatna zawng zawng hi chhungkua aṭanga lo zi chhuak vek a ni. A bikin nu leh pate’n mawh kan phur a; nu, a mal chunga a fa sên chawia a hnute nena lo châwmtute hian mawh an phur zual (hmeichhe lam tan a na deuh em aw, ṭhahnemngaih vangah min lo ngaihsak dawn nia).

Nausen an nih aṭanga zirtirna leh ngaihsakna ṭha an dawn loh avanga sualna kawng zawh engzat tak awm ang maw le! Kan thurin inghahna Bible chuan, "Engkim tan hun ruat a awm" (Thuhriltu 3:1) a lo tih angin naupang zirtirna leh kaihhruaina a hun taka pek hian an dam chhung nun dan a kai hruai ṭhin tih hi hre ngawt lo va, a taka hman a ngai a ni. Thufing pakhat chuan, "Thir chu a lin laiin dêng rawh," a ti a; kan tu leh fate a hun laia enkawl loh leh thlahthlam an nih chuan chhungkua, kohhran, khawtlang leh ramah nghawng ṭha lo a neih phah ṭhin a ni tih hi phat rual lohva chiang a ni.

Kristian ram inti mah ila, kum za chuang pawh he ram hi Kristian lo ni mah ila, chhungkaw lungphûm aṭanga kan Kristianna hi kan tuh ngheh loh chuan ram leh hnamin a rah ṭha lo chu kan seng tho tho dawn. Tuna kan tu leh fate kan rilru tina leh min rûmtirtu, min tizak ngawih ngawihtute hi dem mai an awl ta zawng a nih hi. Mahse, a bul takah chuan kan in chhungkhur inawp dan, a bikin naupang zirtirna leh enkawlna lama kan inthlahthlamna hian ṭhangthar lo kal zel turte awm dan an hril a, kan chi tuh rah kan seng chho mek zawng a nih hi.

He lamah hian Zoram, kan ram hi a damlo mek a, damdawi dik tak chawh fuh a, enkawl a nih loh chuan kan hmabak a thim chho zel dawn niin a lang. Kan tu leh fate, kan thu hnuaia an awm lai leh duh duha kan tih theih lai leh , a ṭul huna kan velh theih hun lai hian zirtirna leh kaihruaina ṭha an dawnsawn theih hun hi a bul kan ṭan ṭhat leh theihna hun a ni. A huna zirtirna leh enkawlna ṭha kan pek loh avanga sualna chi hrang hrang lo pung zel a ni tih hi zêp chi a ni lo. Naupang enkawlna hna hi an pian hlim aṭanga kum 13 vel an nih thleng nu-in duh tawka a kaihhruai chuan an dam chhung hun nun dan a hril tawh niin mithiamte chuan an sawi. "Kum 15 hnu lamah chuan kan ûm pha tawh lo vang," an ti a, an duh angin an tâl chho tawh ṭhin. An upat hnua zirtir leh zilh tum chu thir ling ni lo, a daih hnua chema chher tum ang a ni tawh ṭhin.

Mizoram khawtlang nun siam ṭha turin kohhran, NGO leh sorkar ṭangrualin bei nasa teh ṭhin mah ila, an naupan têt lai aṭanga an thinlung kan hneh si loh chuan kan hlawhtlin tak tak a rinawm loh. Kan inneih laia Pastor R. Laltawna thu min chah hi a dik ngawtin tun hnu hian ka hria: "Chhungkua hi chaw ei lai leh mut hunah, Biak inah nen kim theih hram tum ila, a hnu lamah chuan buai leh harsa lutuk a awm tawh ngai lo," a ti. DL Moody chuan, "Mite hian ka nu ang nu nei se la chuan tân in awm a ngai lo vang," a lo tihte hian naupan têt laia inenkawlna a pawimawhzia a tilang.

Bible-a Timothea anga pi leh nu te aṭanga kawng dik zawh tura buatsaiha kawhhmuhtu kan va mamawh tak em! Upat sual tinrêng dai hnua insiam ṭhat leh inthawi dam nana camping leh crusade, rescue centre emaw ringawt hi chuan nun dan ṭha leh piantharna neih a harin, Setana hian a zuam bik ni te hian ka ring ṭhin. Dr. Kenneth Chaffin chuan, "Khawtlang sualna hian chhungkuaah zung nghet takin a kaih tih hre lova tihreh kan tum chuan kan hlawhchham ang," a lo tih hi a dik ngawt mai. A lêra ṭhuaia siam ṭhat theih a ni lo.

Pathian pawh hian mihring kutah kan tih theih chin a dah a, a hun laia kan tih loh chuan pawi thleng thei tam tak a awm a ni. Chutiang chuan Mizoram khawtlang nun duhawm leh ṭha nei turin a lêra ṭhuai mai lovin, a bulthûm–chhungkua, kohhran leh khawtlangah a thara ṭan lak a ṭul tak zet. Chutianga hma thar kan lak hun hunah kan Zoram sualna pung zel hian nêp lam a pan chho ang a, Zo nun mawi leh ṭha, Kristianna nun rimtui nena inchawhpawlh boruak chu thlifim angin a lêng vel thei tawh ang.

- M. Biaknghinglova