KAN TUI HI A THIANGHLIM TAWK EM? Water quality investigation by Loroto School, Lunglei
PHE connection aṭanga tui kan dawn hi eng ang chiaha thianghlim nge? Chhuan so lohva in mai hi a pawi lo em? Chhuan so hi a ṭangkai em? Filter leh water cooler kan hmante hian eng tiang chiahin nge min ven?
Loroto Play School, Lunglei Farm Veng-a Class IX zirlaite chuan zir chianna September – October, 2026 chhung khan neiin, hetah hian Lungleiin kan tui tlan ber Pialthleng tui leh, PHE Department-in an sawngbawl hnua kan tuizem a rawn thlen hnu leh, a inkara a thianghlim zawng te chu District Water Testing Laboratory, PHED Lunglei nen ṭang kawpin zir chianna neih a ni.
Mita hmuh tham loh
Thil hrang hrang zingah natna thlen thei Bacteria (Coliform/E.Coli) chungchangah hian, tui sawngbawl thianghlimna hmunpuia tui endik a ni a. Tin, tui sem a nih a, kan tuizema a khawh luh hma chiah hian pipe-a mi tui lo dawh a ni bawk. Heng tuiahte hian natna thlen thei bacteria hi hneh taka thenfai a ni tih hmuh chhuah a ni. Hetihlai hian, kan tuizema awm tawh, in chhunga kan tui herh hawna (tap) aṭanga kan herh chhuah leh water cooler ṭhenkhatah te erawh bacteria a lo tam hle mai. Hengahte hian connection tui tho a luang lut si a.
Hnehsawh taka thah tawh kha kan tuizemte a lo balh tawh chinah chuan natna hrikte hian nasa takin a lo tibawlhhlawh leh thei tawh niin a lang. Kan tuizem leh water cooler te hi tihfai leh tihthianghlim ngun an nih loh chuan, connection aṭanga tuiin a ken ni si lo, heng natna thlen theite hi an lo khawl ṭeuh thei zawk a, an inthlah punna hmunah kan siam daih thei niin a lang.
Water cooler
Water cooler ṭhenkhatah pawh hian single-stage sediment filter pakhat, lei nâwi leh bawlhhlawh lian zualpui lo thlifimtu chauh hmang kan awm nualin a lang. Hengte hian natna hrik leh mita hmuh loh bawlhhlawh tam tak a lo thlifim hran lo a, mit lâwnga ena fîm taka kan ngaihah pawh turbidity (tuia bawlhhlawh tam zawng tehna) a la sang em em tho a ni.
Heng single-stage sediment filter aṭang hian RO + UV system filter-ah te luan luhtir a, tihthianghlim ngei ni se. RO (Reverse Osmosis) hian single stage sediment filter-in a lo dan zawh loh bawlhlawh tê tak tê tê kha a lo la thlifim leh a, UV hian natna hrik a lo that bawk. Hetianga filter system hmang thlapte tui enfiah a ni a, mineral water nen thianghlim lamah chuan an thuhmun reng tih hmuh chhuah a ni. Chutihrual chuan, a filter-te thlak leh tihfai ngun erawh a ngai thung.
Water cooler leh kan tui herh chhuahna (tap)-a bacteria (E.coli) kan hmuhte hian mihring hriselna atan harsatna tam tak a thlen thei a. Kawṭhalo leh pum lama harsatna bakah, naupangah UTI (Urinary Tract Infection)–zun kawnga hnái awm a thlen theih avangin ngaih pawimawh a ṭha hle mai.
Tui chhuan so
Tui chhuan so hi a ṭha hle. Pialthleng aṭanga tui lak hi PHE Department-in an sawngbawl hma hauh, luia mi ngei tui hi chhuan so leh chhuan so loh endik a ni a. Chhuan soah chuan kan bacteria ente a awm miah lo a, chhuan so lohah erawh a tam hle thung. Hei hian chhuan so chuan nasa takin natna hrik thahna kawngah min pui tih a tichiang.
Hetihrual hian, turbidity (tui nut zawng) tehnaah chuan a la sang tho mai. Department-in an sawngbawl hnu hi chuan a ziaawm tho rualin, duhthusamah chuan filter hram hram chu a la him e.
Filter chungchang
Filter ṭha leh man to neih hi duhthusam a ni a, mi zawng zawng tan neih erawh a har maithei. Kan tui in turte hi a theih hram chuan connection tui emaw, tuikhur tui pawh ni se, puan thianghlima lo thlitfim (filter) tê tê hnuah chhuan so leh a, chu chu tui in tur kan dahnaah emaw, kan filter -ah emaw chhûn luh leh ṭhin ni se (filter leh tui dahna a thianghlim bawk tur a ni), kan hriselna kawngah nasa taka min puih a beiseiawm.
Natna hrik bakah kawng hrang hranga tehna kalpui a ni a, ngaihdan leh thlir dan hrang hrang pawh a awm ang. Engpawhnise, khawi hmunah pawh awm ila, kan chhawr ṭangkai theih tur leh hma kan lak theih tur chin hi mipuite hriat atan kan han tar lang ve a ni e.
Thihna em thlen lo, nun tihrehawm si, hriselna atana harsatna thlen thei, sum leh pai leh hun kan khawhralna tam tak hi kan tui in thianghlim tawk loh avang hian kan tâwk thei. Kan phâk ang tâwka kan tui in tur kan tihthianghlim hian nasa takin min pui dawn a ni.
- Lalhlimpuia Pachuau, Principal, Loroto School, Lunglei