Eng nge chanchin?
Pathian zahngaihna azarah kum tawp lam kan lo thleng leh ta reng mai. Kan chhungte, ṭhiante, ṭhenawm khawveng hluite leh a dangte nena kan inhmuh nikhua hian chibaite kan inbuk a, chanchin kan inzawt luam thin. A hlimawmin a nuam ve a ni. Hetianga chanchin inzawh luam hi kum tawp lamah hian a nuamin a remchang hranpa thin a. Hetihlai hian, ṭhenkhat, a ṭha lam sawi tur nei lo, hmabak êng lem lote tan erawh mittui nen emawa chhan/sawi a ngai ngei ang.
Kan nu hian a buaipui nasa, hah pawh a hahpui viau ang, chuvang chu a niin ka hria, kan fapa kha doctor zir turin a inziak tling ve a, Mami pawh tunah chuan lehkhathiam tak a lo ni ve der tawh mai. Hmâna kan ṭhian pakhat pawh kha vawiinah chuan kohhran rawngbawltu ṭha tak a lo ni dêr tawh mai. Hriselna lam thuah kan tha viau, buaipui ngai em em kan awm lo, a lawmawm. Tunah chuan ṭanpui ngai ni loin, mite ṭanpui theitu kan lo ni ve reng tawh mai. Kan thawhlawmte pawh a pung a, lak aiin pekin lukhâwng a nei kan tih ve theih lai tak a ni. Nang pawh chibai le, kan ṭhat lai a ni e.
Keini chhung chu harsatna, buaina, chhiatna, etc. tawk kan ni, hunpui hman pawh kan châk lo hle, mahse, kan hman ve tho chu a ngai dawn si. Kum dangahte kha chuan kan tluang ve viau ṭhin asin maw le. Kan ṭhenawmpa pawh pa ṭha tak a ni asin, mahse, harsatna nasa tak maiin a tlakbuak tlat mai. Tih sual kan nei lo, uluk takin kan hun leh nun te kan hmang. Mahse, kan thil tawn chu kan beisei leh rin loh ang daih a ni. Bible-a Joba kha min tihre chhuak rum rum e. Keini chu kan ṭha lo tlat mai, hriathiam kan ngai, kum tawp chibai inbûk pawh kan remchang teh chiam lo a ni e.
Pathian chu engkim chunga roreltu a ni. Mi hausa, mamawh belh tawh lo tih hriat reng reng, mahse, malsawmna thuah hnih thuah thum thlenga dawng nawn awn awn kan hmu ṭhin ang. Hetihlai hian mi harsa, rethei, harsatna, vanduaina tâwk zui zel ta tlat kan hre ṭhin bawk ang. Rawngbawltu ṭha tak mai, mahse, buainain a man tak tlat an awm bawk ṭhin. Hetihlai hian, kan rin loh tak maite’n malsawmna an dawng thûr thûr ṭhin bawk. Heng neuh neuhte han ngaihtuah hi chuan, a va mak ve aw, kan ti vawng vawng ṭhin. A rorel dan hi hriatthiam a har a, mahse, ngun taka a thute kan zir chuan eng emaw chen chu a hriat theih
Tunlaiah chuan engkim deuhthaw hi a awlsam; internet, AI, etc. hmangin kan mamawh leh hriat duhte kan nei thei a ni. Hetihlai hian, mihringina a theih bak a awm ta tlat mai; chu chu hriat lâwk loh vanduaina, harsatna te a ni. Pumpelh theih a ni lo, min huap vek. Piangthar ṭha deuhte’n a dawnsawn dan, tawrh dan an thiam ṭhin a, inring lâwk miah lo tan chuan chuti hlauh chu a ni thei.
Engpawhnise, hla pakhatin, ”Their should be sunshine after rain,.. so, why worry now,” a tih ang khan, khawdur chhe tak mai pawhin kian hun a nei a, chu mi hunah chuan ni êng mawi tak chu a lo lang leh thin. Chuvang chuan, harsatna dawtah chuan a ṭha lam beisei tlat ila, tichuan, a tawrh dan kan thiam thei ngei ang. Kan khawvel hi a chânga nuam, a chânga hrehawm a ni; chu chu min duan dan, kan nihphung a ni ti ila a sual hran awm lo e.
- Lalchhandama Colney, Ph–9862982321