PI PU ṬAWNGKAM PAHNIH KHAT CHAUH
Kan pi pute kha thil sawi reng rengin a nih ang fawk fawka sawi chu ṭawng mawi lo, ṭawng chaltlaiah an lo ngaih ṭhin avangin thu an lo khuh ṭhin a. Hengahte hian i'n lo thlir thuak thuak teh ang aw.
Boral: Mi an thihin, 'a thi' tih bâwng chu ṭawng mawi lo leh chaltlai deuhah an ngaih avangin, 'a thi' tih aia’n, 'a boral' tih an hmang ṭhin. Ṭawngkam dangin, 'A chat ta’, 'A tlin ta lo,’ 'Mihring a tling zo ta lo,' 'A kal ta,' 'A awm ta lo,' adt. an hmang ṭhin bawk. A tlangpui thuin, 'A thi' tih ai chuan, 'A boral' tih chu ṭawngkam ngaihthlak nuam zawkah ngaiin an hmang deuh ber ṭhin.
Tunlai erawh chuan mi ṭhenkhatin, "Boral tih chu kan Bible lehlin ṭawngkam hman danah, chatuana boral sawina a ni a, chuvangin, 'boral' ti lovin 'thi' tih zawk tur," an rawn tih thar leh sasâwi avangin mitthi an awmin a 'boral' tih aiah a 'thi' an ti leh ta bawl bawl thung a. Chutiang chuan vantlang aurinnaah pawh an au ta khawl khawl mai a nih hi.
A dik tak chuan, mitthi an awm a, a boral kan tih hian chatuan boralna lam sawiah chuan tumah chu kan inngai thung si lo va, chu lam kan ngaihtuah hek lo. Tin, he ṭawngkam avang mai hian tute thlarau chan mahin a chhiatin a ṭhat phah chuang awm hlei lo va. Kei chuan ‘boral’ tih hi ka la thlang zawk fan a, ka la ti zel bawk. Nang pawh chutiang chuan ti ve rawh, ka tihna lah a nih hek loh. I thu thu ni rawh se.
Ka ṭhian nu: Kan sawi tawh angin, mahni nupui pasalte ngei pawh hi a nihna ang dawt dawta 'ka nupui/ka pasal,' han tih bâwng bâwng chu ṭawng chaltlaiah ngaiin, a pehhêl zawng deuhin, 'ṭhiannu/ṭhianpa,' 'kan nu/kan pa,' tiin an lo sawi ṭhin.
He ṭawngkam mawi tak hi tunlaiah tute emaw, sapho sawi dan lain, "Sapho pawhin an nupui pasalte chu, 'my wife/my husband' an ti mai a. Chuvangin, mahni nupui/pasalte chu 'ka nupui/ka pasal' tih mai tur, kan nu leh kan pa emaw, kan ṭhian nu leh ṭhian pa pawh an ni lo," tih ṭana ṭangin an rawn hnial kalh thar leh a. Chuvangin, kan pi leh pute’n ṭawng chaltlai leh ṭawng mawi lova an lo ngaih ṭhin ang zawkin, ‘ka nupui, ka pasal' an rawn ti leh ta bâwng bâwng hlawm a nih hi.
Kei chuan tun thleng hian, 'Kan nu hi ka nupui,' han tih bâwng mai chu ka la hreh tlat a, vawi khat mah ka la ti lo va, ka ti ngai lo vang. Tih ahnehin miin a nupui emaw, a pasal emaw inhmelhriattir nan a, 'Ka nupui/ka pasal' an tihte hian ṭawng uangthuangah ka la ngai deuh tlat ṭhin zawk nia. Mahni nupui/pasalte, 'Kan nu/kan pa,' tih emaw, 'Ka ṭhiannu/ka ṭhianpa' kan tih avanga hringtu nu leh pa emaw, ṭhian dangte nena ngaih pawlha buai ta hi ka la hmu hauh lo. Hringtu nu leh pate chu, 'Ka nu/ka pa' kan ti mai a, 'Kan nu/kan pa,' tih nen chuan a dang daih a ni.
- PC Hmangaihzauva