OPERATION TRIDENT A ROPUI THLAWT (Operation Enchhin: Kan Enchhin Ang!)

Mizoram leh a chhehvêla ruihhlo tawlhrûkna lian tak takte leh a zung kaihhnawihte chhui chhuah kawngah Operation Trident hi hmalâkna hlawhtling tak leh pawimawh tak a ni. Agency hrang hrang pathum — Mizoram Police, Narcotics Control Bureau (NCB) leh Enforcement Directorate (ED) te thawhhona ṭha tak avangin ramri leh international border hrûla ruihhlo bulthûm sumdawng lian ber berte chu an birûkna hmunte thlengin khawrh chhuah an ni.

Hetianga agency hrang hrangte thawhhona hmanga beihpui thlak a hlawhtling theihnaah hian, Home Minister Pu K. Sapdanga'n fing tak leh felfai takin ruahmanna a siam a, kaihhruaina a duang hi fak a phû a. Duh ni ngat se, he hmalâknaah hian inchhûang ngam tur a ni.

Prevention of Money Laundering Act (PMLA), 2002 Section 17 hnuaiah Aizawl, Champhai, Lawngtlai, Churachandpur leh Guwahati-a bank account 1,424 an freeze a. Ruihhlo sumdawnna leh narco-hawala sum chet velna chhui zui nghalin, ₹17.82 crore hu sum neih hlut zawng provisional attachment an ti bawk. An hmalâkna hnuaiah hian India leh Myanmar ramria sumdawnna khaw pawimawh tak Zokhawthar te pawh a tel a ni.

Operation Trident hnuaiah hian NCB leh Central agency-te bawk hian pawisa fai ₹12 lakh leh detonator 500 te pawh an man bawk. Agency pathumte thawhhona hmanga mihring an man zawng zawng hi sawm pariat (18) an ni a. Hawala operator te, mule account neitu te, front business-te leh mini-ATM counter operator-te pawh chhui tel vek an ni. He hmalâknaah hian ruihhlo tawlhrûkte man mai ni lovin, an sum hmuhna, sum chêt velna leh an tawlhrûkna kawng zawng zawng chhui zui vek a ni.

Mizoram, Manipur leh Assam huam chhunga hmun 38-a agency hrang hrangte thawhhona hmangin a ruala luhchhuahna kalpui a ni a. Hei hi intelligence thurûk pawimawh takte uluk taka in-share tawn a, ruahmanna felfai taka siam a nih avangin a hlawhtling thei a ni.

Target-te tlanchhiatna hun pe lo va, thil pawimawh tak takte thup bo a nih hmaa man theih a ni hi he operation hlawhtlinna langsar tak pakhat a ni. Mizoram Police leh Central agency-te hmalakna ngawrh tak hi 'Drugs-Free Mizoram' leh 'Drugs-Free India' atan a hmalâkna pawimawh tak a ni.

Sorkar hmalakna hlawhtling tak tak a awm lai hian, social media hmanga mipui bum tumna leh thu dik lo thehdarh a awm ve leh tlat hi thil pawi tak a ni. Opposition lam mi ṭhenkhat chuan political mileage an hmuh theih nân emaw, sorkar leh minister-te tihhmingchhiat an tumna atan emaw, thlalak awm sate chu thubuai leh thil thleng dang nen inkungkaihna nei angin lantîr an tum ṭhin.

Minister-te hi mi hrang hrangin thla an lakpui ve ṭhin a. Mi pakhatin minister thla a lo lâkpui ve mai avangin amah leh thubuai inkungkaih anga puh ngawt hi thil dik lo leh ngaihdan âtthlâk tak a ni. Dan anga hmalâkna kalpui a, dan anga mantute hi Mizoram sorkarna chelh mêk leh department kaihhnawihte an ni a. Sorkar chuan thil dik lo tihte chhuiin, dan bawhchhiate hremna a thlen mêk lai hian, minister-te tihhmingchhiatna atana thlalâk awm sa hman hi politics khelhna kawng dik lo leh hnuaihnung ber a ni hial ang! Mipui bum tumna politic 'chhe-mi' hi i sim hram teh ang.

'Operation Enchhin' ve thung!

Operation Trident hlawhtling taka kalpui a nih hnuah MNYF lam aṭangin 'Operation Enchhin' tih thupui hmanga hmalakna a lo lang ve nghal bawk.

Hmalakna pahnihte hi an tum leh an kalphûngah a danglam hle thung. Operation Trident kha ruihhlo do leh ram humhalhna kawnga sorkar leh agency-te thawhhona hmanga hmalakna a ni a. Operation Enchhin erawh mipuite'n sorkar hna thawh dan, a thawh hlâwkzia leh a rah chhuahte langtlâng taka lan chhuahtir tumna a ni awm e.

Opposition hmalakna hi sorkar tihmualpho tumna satliah mai ni lovin, thil dik lo awmte siamṭha tura kawhhmuhna, hmasawnna kawnga sorkar hruaitute kaihhruaina leh mipui tana hlâwkna tak tak hring chhuaktu a nih hi mipuite duh ber a ni. Constructive opposition hi a nihna takah chuan sawisèlna mai a ni lo, thil dik lo awmte kawhhmuh rualin, a siamṭhat dan leh a ṭhat zawk theihna tur kawng kawhhmuh tel a ni.

Sorkar pawh mipuiin kan 'enchhin' a, ṭha tawk rihin kan hria. Opposition pawh an 'Operation' hmangin kan enchhin ve thung ang. Engpawhnise, sorkar a ni emaw, opposition a ni emaw, tu zawk nge mipui tana thawk tak tak a, rah chhuah ṭha zawk chhawp chhuak thei tih hi a pawimawh ber chu a ni. Ram leh hnam tana hna thawktu dik tak apiang chu mipui hian an thlang tling mai ṭhin. Chutiang bawk chuan, mipui tana hlâwkna leh hmasâwnna tak tak thlentu apiang chu mipuite'n an ngaihhluin an thlawp tlat zel dawn a ni.

- Thangtea Thawmte