Ruihhlo i do zel phawt mai ang u
Vanglaini chan-chinbu hi ka lo chhiar uluk viau ṭhin a. A bik takin article-te hi mite'n an ngaihdante an puan chhuahna a ni a, mipui nawlpui tan hmasawnna turte a awm ṭhin avangin hmaih loh hram hram ka tum ṭhin.
Kumin October khan Vanglainia thu ziak ngun tak Pu K. Hmingthankaia thuziak "Ruihhlo kan do thawm a ring em em: Kan do ṭhelh deuh a ni lo maw?" tih pawh kha uluk takin ka chhiar a. Theihtawp chhuaha ruihhlo dova ngaihtuahna sengtute leh che chhuak ṭhinte tihnual thei a nia ka hriat avangin thil awmzia han sawi ka duh viau va. Mahse, Pu Zoramchhana’n rawn chhangin, thil awmzia a sawifiah avangin ka insûm leh ta zawk a ni.
Pu Zoramchhana'n a chhanna kha Pu Hmingthankaia khan a rawn chhang let ve leh a. A hmaa Pu Zoramchhana'n a chhanna kha Pu Hmingthankaia hian a la na hle niin a lang - a inhrosa tluan zak ni berin ka hria! Aw le, kei chuan ka sawi duh zawk chu, kan ramah ruihhlo a hluar em avang leh ruihhlo ngai an tam em avang hian ruihhlo donaah te, ruihhlo ngaite chhan chhuak tur leh ruihhlo la ti ve lote veng turin theihtawp kan chhuah tlang tih hi a ni. Chung hmalaknate chuan rah ṭha a chhuah zel bawk. Sawrkar, kohhran leh pawl dangte ṭangrualin Hulhliap SSC an ti a, ruihhlo ngai eng emaw zatin an sim phah a, tun thlenga ṭha zui ta zel pawh eng emaw zat an awm.
Kohhran hrang hrangin ruihhlo ngaite chhan chhuah nan theihtawp an chhuah a, camping, crusade te an ti a, in lam leh khawlaiah kal chilhin hma an la bawk a; chungah pawh chuan tam tak chhan chhuahin an lo awm tawh. Home leh centre aṭangin mi eng emaw zat ṭha takin an chhuak tawh bawk. Central YMA leh group, joint leh branch YMA hrang hrangin theihtawp chhuahin ruihhlo an do a; ruihhlo tam tham tak, cheng vaibelchhe têl takmeuh hû an man tawh. Kan Police leh Excise lam te, Assam Rifles lam ten a maka maka tam an man tawh a, Operation Jericho hmangin tam tak man a ni tawh bawk. Tunah chuan ruihhlo pawh a vâng hret a, a man a to deuh tawh nghe nghe.
Heng zawng zawng hi ruihhlo do hlawhtlinna a ni – hlawhchhamna a ni lo. Ruihhlo tam tak man a ni tawh chungin a la awm zel tho, a la awm zel ang. A la awm zel avang hian ruihhlo dona a hlawhchham ta tihna a ni lo, rawn lut a la awm zel miau alawm. Ruihhlo ngai tam tak chhan chhuah an ni tawh chungin, la ti mek tam tak an awm tho. Ni e, an la awm zel, la sim ve lo leh ti thar an awm zel miau tlat a ni.
Ruihhlo kan do zel ang a, theihtawp kan chhuah zel ang. Do rêm erawh a harsa tak zet a, theih loh tluk a ni hial zawk ang. Chuti chuan ti ila, tia sawi hi chu a awl, a taka hmalatute hian a harsatzia an hre chiang thung. Ruihhlo dova kan hma laknate mi ṭhenkhatin an lo sawisel a nih pawhin, thâ thlah thei kan ni lo va, theihtawp chhuahin i do zel phawt mai ang u.
-Zodinsanga