THO LA, DING TA CHE

Tin, Isua'n a hnênah, “Tho la, i âwngphah la la, kein kal tawh rawh,” a ti a (Johana 5:8).

Dam lohna te, hlawhchhamnate dang zo tur khawpin mihring hi a chak tawk zo lo. Mi fing an her liam a, mi ropuite khawvel a tawp a, mi hausate nun a sei bik lohna khawvelah hian beidawnnain kan chungah thla a zar reng a, beidawnnain a hneh theih loh chu mi beidawng duh lote hi an ni.

Vawi khat tal i bei a dawng tawh em? I la beidawng lo a nih chuan hlawhtling tûrin beih pawh i la bei chhin lo hrim hrim tihna a ni ang. Mi neih ang neih ve tumin kan theihtawp tak meuh kan chhuah chung pawhin kan hlawh chham a; hetihlai hi chuan a hrehawm ṭhin a ni ti raw!

Hringnun hi tuman kan zawh tluang pêt pêt vek lo va, kan hmaah harsatna, beidawnna leh hlawhchhamna te hian min bawh buai fo a. Kan mimal nunah te, zirna lamah te theihtawp tak meuha kan beih pawha hlawhtlinna hian min hêl bik em ni, tih tûrin kan hlawhchham leh ṭhin a, chu chuan kan duh loh leh tum ngai miah loh, ruihhlo lama tlan te pawh a awl viau reng a ni.

Kan chhungril nun a ruak a, chu kan nun ruak hnawhkhah tumin zu inah te kan tlak a, chu chuan beidâwn lehzualnaah min hruai lut a. A zualzapui vailênhlo tih ang maiin, beidawnnain min sal bet a, kan in a, kan inchiu a; hmeichhiat mipatnaah kan inhrithla a, kan hlim em? A teuh lo. Taksain a tuar a, chhungte lakah kan inthlahrung a, in chhung aiin khawlaiin min hip na zawk a. Chaw kan ei ṭha lo va, kan taksa a chau tial tial a, Biakin dar rîin min ko harh zo tawh si lo. Ka ṭhalaipuite u, hetianga khawsa tur hian kan nu leh pate’n min chawi seilian lo asin. Tho la, ding ta che.

Bazar hmun lûn laiah i tlu a, rang takin i tho leh thei a. Ngati nge hlawhchhamna vanga i tlukna ata kha i thawh leh mai lo vang le? Ruihhloa i tlukna aṭang khan i tho leh thei asin. I kuta kaiin, kal dan zirtirtu che i nu leh pa mittui hru hul tûrin i lo puitlingta. Mizo lanu val rualte hi ruihhlo laka thâmral mai mai tûr atân hian Lalpa’n min chher chhuak lo ve. Kan nun hlui chuan min liam san a, kan nun hluia kan chên reng ṭhin a vang hian alawm kan tlansan theih ṭhin loh ni. Khawvel mi ropui leh mi fing hriat hlawh tak takte pawh hi ruihhlo avanga talbuai tawhte an ni asin. Tho la, ding ta che.

Hringnun hi a ngai rengin a kal lo a, a hmasa ber pawh a hnuhnung ber thei a, vawina kal san la, naktukah a kalsan ve ang che. Beidawnnain a hrin chhuah chu maw, inkhawm ṭhinte nun kan teh a, an hnên aṭangin lungawina kan hmu lo va, mahni nun erawh kan teh phal leh si lo. Zing ṭawngṭai ṭhinte nun pawh engmah a ni chuang lo, kan ti ṭhin a; hei hi mi beidawngte sal beh tumtu kan hmelma Setana thangvalh kan bawh per mek chu a ni.

Dam lohna kan chungah a lo thleng a, dam chhuak dawn lo hiala kan inngaih hunah chuan e, Biak ina inkhawm ṭhin te, zing ṭawngṭaia kal ṭhinte hi a ni, an ṭawngṭaisaknate kan mamawh a, kan thlamuanpui leh ṭhin ni. Kan sawiselte kan duh leh si-na khawvela hian, beidawnna kawng aiin beiseina kawng a thui zawk tih hre nawn fo ila, vawina mi nung, naktuka ruang ni mai ṭhin mihringte nun hi zawng a tawi em a ni. Beiseina kawl êng nei turin he hringnuna thil ropui tak mai chu–Pathianin kan tih sual aṭanga dingchhuak tûr leh, hma lam pan thei tura hun duhawm min la pe hi a ni.

Khûp zawi leh bán uai thlate dingchhuak leh tura kan tân Krista chu kan chakna a ni tih hai der tlattu nun hian hlawhtlinna tlang aṭang pawhin hlimna a chang pha ngai lo vang. Ruihhlo ngawlveina hmun aṭang phei chuan a va pik leh zual dawn tak em. Dam lai hrem hmun, vân chang pha chuang si lo hian, dam chhan nei lo hian, dam chhung nite chhiar ral turin ransa ang mai kan ni hlauh dah ang e.

Mahni kêa ding tûrin Mizo ṭhalai huaisen kan ni lawm ni? Mi fel ni tûrin mi fate nih kher a ngai lo va, Mizo nulate tân rin chhan tlak ni tûrin hnam dang tlangval nih lah a ngai hek lo. Kan ram leh hnam timawia timawi lotu kan ni. Kan thu lova kan nun kan hman mekah hian e, nimina pawh ka hmu asin, ti a, kan vui liam tak hi an va tam ta em. Thlânmuala lungphun hi chhiar ila, kan kum rualpui, keini aia naupang lungphun tamzia aṭang hian keini ngei pawh hi thihna hian min man thei reng a ni tih hi a va chiang tak em.

Ka pa khan ka kuta kaiin kal dan min zirtir em, ka hre lo va, nun kawng dik zawh turin pa zilhhauna lah ka dawng hek lo. Ram dang, hnam dang karah kum tam ka vahvaih a, beidawng leh ṭâmchhâwla ka awm lai khan harsatna leh mangânna tawnga zir thiam tura ka hringnun zirlai ka zir mek a ni tih reng ka ngaihtuah thleng phak ngai bik lo. Chu harsatna avang chuan tah hriamin ka awm a, harsatna chu hêl aiin sut tlang a, a nih nih nih mai hi ka zir chhuak ta.

Ka ṭhian, beidawnnain i chungah thla zarin, hrehawmnate chuan kiansan ngai lo che mah se, ni a tla a, a pil hlen lo va, a lo her chhuak leh ṭhin angin, kan dam chhungin harsatna hian min chên chilh reng bik lo vang, tiin, a êng zawngin thlir tlat ang aw. Chu chuan chhelna min siam a, tumruhna leh hma lam pan hram hram duhna chuan lawmnaah min hruai thleng leh ṭhin. Beidawnna rilru puttirtu che kha thihsan la, beidawnna paltlang tûrin i chak tâwk a ni.

Tho la, ding ta che.

-Zothansanga

Chhiahtlang Kawn Veng