MNYF Operation Enchhin leh RTI
MNF ṭhalaite'n Operation Enchhin kalpui an tum thu media hrang hrangah kan hmu a. Chu an hmalakna tur chu RTI hmanga sawrkar department hrang hranga zawhna zawh a nih hmel a, Health Department-ah bul ṭanin, zawhna tam tak an theh lut nghal tawh ni awm tak a ni.
MNF ṭhalaite thil tih tum hian ṭhatna a nei maithei a. Mahse, ka rilrua rawn lut nghal zawk chu–thil ṭha tih an duhna vang ni lovin, sawrkar beihna tur zawn tumna vang leh sawrkar hnathawkte tihbuai a, chhanna dik lo palh hlek a awma sawrkar beihna atana hman nghal tumna vang a ni ang tih hi a ni a. Whatsapp group velah pawh kan lo sawi ve nak nak a, ka rilrua rawn lut hi min ṭawmpui hlawm viau mai.
Tuna kan opposition party-te hian RTI hmanga zawhna chhanna chu Minister ten an en a, an pawmpui hmasak a ngai, tiin sawrkar an dem chho mek niin ka hria. Chutiang chu MNF ṭhalaite phei chuan 'dik taka mipui rawngbawltu SPIO te ngei pawhin harsatna nasa tak an tawh phah thu leh Mizorama la thleng ngai lo niin an sawi nghe nghe a ni awm e.
RTI Act thlawhchhan hian thil ka lo dil ve fo tawh a. Mizoramah chuan RTI Act hmang hmasate zinga mi ka nih ve ka ring a, tunah erawh chuan ka ti peih tawh meuh lo. Ka chian em em pakhat chu–Congress sawrkar lai leh MNF sawrkar lai pawh khan RTI hmanga zawhna SPIO ten an chhanna tur kha Minister-te an entir hmasa ṭhin a, Minister ten an pawmpui phawt ṭhin. Tuna ZPM sawrkara Minister-te pawh hian an tih ngei ka ring, an lo ti ve a nih pawhin Congress leh MNF sawrkar laia Minister-te tih ang thovin an ti ve tihna a ni mai. Opposition party worker-te hi chuan han dem viau thei an ni lo, an sawrkar laia an Minister-te pawhin an ti dan tho a ni.
RTI hmanga zawhna chhanna hi pek chhuah hmain a Department changtu Minister-in an lo en phawt hi a âwm ka ti viau mai. Kei pawh hi Minister ni ta ila, ka tih dan tho tur a ni–ka Department-a SPIO ten RTI zawhna an chhanna chu en hmasak ngei ka duh ang. A chhan chu, RTI zawhna chhanna pek chhuah tur Department-in a chhan dante lo hriat ve hi a changtu Minister tan chuan a pawimawh tlat.
Opposition party worker-te phei chuan sawrkar beihna atan hman an tum ṭhin avangin, lo inrin lâwk nan leh hriat lâwk nan Minister-in an lo hriat hmasak hi a ṭul ve tlat. Hei hian SPIO ten an chhanna tur Minister-in a tihdanglamtir emaw, a duh anga a chhantir tih lam a kâwk lo. Chhanna lo hriat lâwk ve lam zawk a ni. Minister-in a duh anga a chhantir emaw, chhanna a tihdanglamtir erawh ṭha ka ti hauh lo.
MNF ṭhalaite hian Operation Enchhin an kalpui hi rilru thianghlim tak pua an tih a nih ka ring hauh lo nachungin, rilru thianghlim tak pu chunga an tih ni thei se ka duhsak khawp mai.
- Lalduhmawia