PIANTHARNA DIK

Kum 1982 khan zirtirna mak tak tak maiin Mizoram a tuam hneh hle mai a. Piangthar tawh tana tluk leh theih tawh loh va, tho leh fate kan ni a, kan thi thei tawh dawn lo, tih angreng zirtirna mak leh danglam tak mai boruak chuan Pastor Vanlalkima Sailo, Kolasib-a awm pawh a ṭhâwng hle a ni ang, a rilruah ‘Piantharna dik’ tih thu chu a ri ta tluk tluk mai a.

Tichuan, Thlazing (August) ni 18, 1982 zing dar 9:00-ah chuan a rilrua a lo vei leh a thinlunga riak reng mai ‘Piantharna dik’ tih chu hlaa chantir turin hetiang hian a han ziak ta a:

I nun kawng dik zawht urin, aw Lalpa,

Ka tling zo lo i hruaina lo chuan;

Ngaihtuahna thianghlim leh fel,

Awn dan mawi leh ṭha,

Min zirtir leh ang che.

Aw, i kraws bul ka rawn bêl, aw Lalpa,

Inngaihtlawmna min pe la,

Thinlung sak titui ang che,

Piantharna dik min pe la tunah ngei hian.

I kraws bulah ka sual zawng, aw Lalpa,

Ka rawn hlan e, min lo lawm ang che,

Chapo leh uanna bo se;

Nungchang mawi leh ṭha,

Min zirtir leh ang che.

Lawma zai lo tur hi ka lo ni lo,

Ka sualna zawg min ngaihdam vangin;

Kraws thiltihtheihna changin,

Ka nun zawng Lalpa,

Ka kawltir tawh vangin.

Miin Pathian a hnaih zawh poh leh Pathian ṭhatna chuan ama sualna hriat chhuahtirin, ama sualna chu chiang taka tar lansakin a awm ṭhin. Tichuan, misual chuan kraws a thlir lo thei lo. Tichuan, kraws-a khenbeh Isua Krista, sualna rêng rêng nei lo leh ama sualna tlêng faia silfai theitu bulah lo chuan lum luhna tur dang a nei lo a ni tih inhriain, chak lo leh rethei tak chung pawhin Isua Krista chu a pan ṭâwk ṭâwk a ni.

Tichuan, hmangaih Pathian chuan lo kuangkuahin nun thar a lo pe a, ‘Pa-in min hmangaihna chu a va nasa em! Pathian faahte min vuah tak hi’ tih ang khan, hmangaihtu Pathian chuan a faah min lo pawm ta ni. A va ropui em, Lalpa chu fakin awm rawh se.

Ka pianpui nungchang min timualphotu,

Ka chhandamtu Kraws min timawitu,

Misual beisei bo, hremhmun hmabak mai,

Chhandamtu ngaiin ka lo rûm e.

tia Pastor C. Saikhuma’n hla a lo phuah chu a nunah a takin a lo thleng a ni ber mai.

Tichuan, a nunna chu Pathian nen a inzawm tawh a, a nun innghahna pawh Pathian Isua Kristaah chauh a ni lo thei lo va. Isua Krista chu a tlinna, a mawina leh felna a ni a, ama nun kawng dik zawh turin pawhin a hruaina leh awmpuina leh ṭanpuina tel lo chuan tih theih engmah a nei lo a ni tih inhriain, ‘Ka tling zo lo i hruaina lo chuan’ tiin a au chhuak hial ṭhin. Khawvel mite anga awm chu a biak Pathian nun nen a inrem theih loh avangin, engkim neitu leh siamtu Pathian hnenah chuan ngênngâwl takin ngaihtuahna thianghlim leh fel, awm dan mawi leh ṭha zirtir turin a dil ṭhin bawk a ni.

Krawsa khenbeh Isua Krista chu thlirin bêl mah se la, a nuna sual awm zawng zawngte chu a la tla fai vek bik lo va. Amaherawhchu, sual huatna leh lungtenna erawh a nei tawh si. Tichuan, a thinlungah sual leh ṭha chu an indo nasa ta hle mai a. Mite’n a sualna lai an kawh chhuah ṭum te, a sualna ni miah lova an hêk ṭumte chuan a mihring mihringnate lo chhuakin, phuba lâk hial a châk rum rum châng lah a tam. Mahse, Pathian chu mi inngaitlawm tak leh fel tak a ni tih a hriatna chuan a beng hniamin a hnûk hniam leh ṭhin.

Chutianga a nuna sual awm chapona te, uanna te leh a dangte nen chuan Isua chu ni tin a pan ṭhin a. Pathian nungchang ang a neih theih nan bâng lovin a ṭawngṭai bawk ṭhin. Misualte hmangaihtu leh simna dik tak ngainatu Pathian chuan a sualna zawng zawngte chu ngaihdamsakin a lo pawm thei zel a ni tih a hriatna chuan a thinlung a tilawm a. Tichuan, sual huatna nasa zawk nei zelin, a nun pumpui chu Pathian tan a hlan ta ṭhin a ni. Hei hi ringtu nun chu a ni.

(He hla phuahtu Pastor Vanlalkima Sailo, tuna America rama awm mek nen hian hman ni khan Facebook kaltlangin kan inbia a. A hla thupui hi ‘I nun kawng dik’ tih ni lovin, ‘Piantharna dik’ tih a nih thu min hrilh a ni. A phuahtu thupui vuah ang hian sawia ziah zel theih ni se la a ṭha hle mai).

- Zoliansanga Tlau