Ka thlarau zawkin le

‘Ka thlarau zawkin le’ (Zakaria 4:6) thupuia hmangin March 30, 2026 khan Pu Lalduhoma, CM-in party inkhawmah mithar lak luh pahin thu a sawi a. I han sawi zauin, a thusawi pawimawh laite i han tuihnih dawn teh ang.

Zerubabela dinhmun ang tawngtu ZPM sawrkar

Pu Duhoma chuan Bible thu sawiin, saltâng chhuak hmasa ber an lal fapa Zerubabela hovin Jerusalem Temple din leh an tum a, nimahsela, an chhehvela mite’n an hêk reng a; tunlai ṭawng takin 'stay order' an hmu reng mai a nih kha.

Amah mimalin chakna a nei lo. Temple sa turin mihring bakah sum leh pai a nei lo va, chutia beidawng taka a kun reng lai chuan zawlnei Zakaria hmangin a hnenah Pathian thu a lo thleng a. Zerubabela hnenah chuan Pathianin, "I chakna leh thiltihtheihna ni lovin, ka thlarau zawkin le," tiin, Zerubabela chakna leh remhriatnate avanga temple din thei lo khan Pathian thlarau awmpuina vang zawkin temple din turin chunglam ruahmanna a lo thleng ta zawk a ni, a ti.

Babulon lalin temple sak nan lal sum bâwm a hawng ta ang khan, hmana Zerubabela ten Pathian remruatna an tawng ang khan, vawiinah keini hian a takin khatiang kha kan tawng ve ta a ni, a ti bawk.

Kan theihna leh remhriatnate vang ni lovin, Thlarau a rawn inlar a, kan kut a tihmui a. Assam Rifles khawpui aṭanga sawn chhuahte kan hunah a lo thleng ta mai a ni. Healthcare cashless tura kan lo sawi ṭhin thlengin, ka thlarau zawkin le titu Pathian awmpuina zarah kan lo ti thei ta zel a. Thlarau inlarna thil pakhat kan sawi zin loh pawl tak chu Territorial Army hi a ni. State dangte’n an awt em em, engtin nge in tih bik, min ti ṭhin. Keini’n engtin vak kan tih loh kha mawhphurtuah Lt. Col. Pu Clement-a kan ruat a, ani’n General te leh hmuh tur ṭulte dawrin, ani ṭangkai taka thawhna zarah Mizo nula leh tlangval hlang awmna tur changtlung tak kan la nei zel dawn a ni, a ti.

Sum leh pai enkawl kawnga Pathian thlarau puihna

CM hian sawrkar sum enkawlna lamah Pathian thlarau awmpuina an chan dan lam hetiang hian a sawi. Tun hma khan sawrkar hnathawkte’n an GPF pûk duhin tute emaw recommend a ngai ṭhin. A ti thei deuh hlawh neia rawih ngai hial te pawh a ngai ṭhin a nih kha. Khangte kha keiniah chuan a ni ta lo. Miin dam lohna avang te, fate nupui/pasal neihna tur te, in leh lo chei leh zauh te an lo ngai ṭhin a. Nikum April ni 1 aṭanga tun thla ni 9 chhung ringawt GPF kan pek chhuah pawisa hi nuai hlirin 1,25,985 a tling, a ti. Pension ni se, kan hunah ringawt mi sing hnih chuang fe kan chinfelsak tawh a. Tar pension tihpun te, hetiang ti theia kan awmte hi kan beisei phak bak a ni, tiin a sawi.

Gain rank-ah 4-na

Tunah chuan zuk dil pawh ni miah lovin lawmman kan minister-te’n an dawng ṭeuh tawh mai. Opposition-a kan awm lai khan Pu Sawivunga hian session-ah, Mizoram hi India ramah leiba ngah lamah engzatna nge kan nih, tih kha a zawt a. CM Pu Rama khan India rama leiba ngah lamah pakhatna kan ni tiin a chhang a, 2022-23 kum mai kha a la ni. Kan GSDP aṭanga 53% kan leibat a ni. Kan thawh chhuah zawng zawng aṭanga a zatve aia tam a nih chu. Chu dinhmun zahthlak tak aṭang chuan lak chhuah kan lo ni ta.

Thlarau zawk hnathawh a lo thleng a, chu chuan sawrkar laipui beng a thleng a. Sum enkawl thiam vang efficiency in financial management-ah nuai singthum sangnga min rawn pe ringawt mai a ni. GPF te, pension-ah te pe chhuak reng mah ila, a ram leh a felna kan zawn hmasak chuan kan mamawh dang pek belhchhahna chu a lo kal mai.

16th Finance Commission-in kum 5 chhunga kan sum insem dan tur an ngaituah a. Kum 5 lo awm leh tura India ramah sum insem dan tur an han rel leh a. A hlawkna chang tam dan tur ranking an han siam a. Gain rank-ah chuan 4-na niin, India ram state zingah sum chang tam ber 4-na kan ni leh ta a ni.

AMC ṭha zawk leh eiru lo ber state

Ṭhuang thuma zirna aṭanga eiruk tlemna ber state kan ni tate hi a lawmawm. Kan leibat zat tam anga langte hi SASCI vang a ni a. Hei hi loan hming pu ni mah se, grant in aid ang deuh a nih thu kan Finance Minister nen kan inbiaknaah pawh a lo sawi. Loan anga a kal rih avangin leiba pung angin a lang mai a ni, a ti.

CM hian RLB (thingtlang VC-te hmasawnna thawhna tur) chungchang a sawi a. RLB nuai 3,450 first installment 2021-22 chiah sawrkar hmasain a lo hai chhuak a. 2021-2022 second installment aṭangin tun financial year thlengin nuai 36,200 kan hai chhuak vek thung a ni, a ti.

Solid Waste Management Centre (SWMC), Tuiriala paihna tur siam nan AMC-in JCB pathum a nei sa reng a, mimal JCB hawhin Rs. 1.26 crore an seng a, thil mak tak a ni. SIPMIU-in a thlawnin AMC hnenah tipper 50 leh pik-up 4 an pe a. October 2022-a an neih kha a kum lehah hralh an duh ta mai a. Cheng nuai 24 chuanga an neih kha cheng nuai 5 awrhin an hralh leh. Thil dik lo hi kan do tur a ni a. AMC Sports Complex, Bawngkawn chungchangah mi 16 hnena hna inpek chungchang thlengin thil dik tawk lo tam tak a awm mek niin a lang.

Ka thlarau zawkin le tih thupui kum tam tak lo vahvaihpuitu

A thusawi tirhah CM hian kum tam tak a changthlan ‘Ka thlarau zawkin le’ tih chu a lo vahvaihpui thu a sawi a. CM atana duhtu hi hmân aṭang tawhin an tam ber ṭhin a, amah hnaih bertu aia mark sang tak a hmuh ṭhin thu sawiin, mimalin duhtu ngah ṭhin mah se, party ruihchilhna vangin voter-te’n mahni party-ah lunglengin, an hruaitu an duh vak tawh lohte pawh an zui leh mai ṭhin. Chutiang avang chuan rei tak nghakin, ama chakna leh theihna ni lovin, Pathianin a thlarau zawka a thuam hnuah chu dinhmun chu a lo luah ta a ni tih a sawi a ni.

Thubelh

CM Pu Duhoma thusawi hi a dik hle a ni tih hriatna chu, Mizo zinga chanchinbumi senior leh hlun, hriat hlawh tak Pu HC Vanlalruata hian ka hnenah ngei a sawi tlat. Pu HC Vanlalruata hian Senhri kar tin chhuak, a hun laia chanchinbu lar tak ṭhin kha kum 1990 bawr chho khan a enkawl ṭhin a. Ṭum khat mai pawh ni lovin, ṭum hnih/thum lai opinion poll kan la a. Pu Duha hi khawi party President mah ni lo chung khan Chief Minister atana mipui duh berah hian pakhatna a ni ziah ṭhin a ti.

- Hruaia Kawlni