Social media vang nge mipui duhthlanna?
“ZPM hi social media campaign thiam vang chauhva sorkar an ni,” tih hi opposition party-te ṭawngkam sawi zin pawl a ni. Vawiin thlengin social media (WhatsApp, Facebook, Instagram, Threads leh X) hmangin sorkar hmalâkna pelhsawlh deuh an hmuh apiang vawrh chhuah hi an hna pui ber a ni. A chângin Chief Minister fiamthu leh chetzia an bei a, a chângin party thutlûkna an sawisel thûl. Kan CM pawhin fiamthu ti-tak deuhvin, "Kan sam khuih dân thlengin an sawisel a ni," a lo ti hial tawh reng a.
Mahse, tunlai Mizo mipui, a bikin ṭhalai ngaihtuahna zau zâwk leh thil chîk thiamte chuan social media platform-a content chhuah apiang an awih ngawt tawh lo tih hi oppostion lam hian an ngaihtuah tel ta lo a nih hmel. Mipui hian thil thleng leh sorkar hmalâkna hrang hrangte hi tehfung hran hmangin an chhût thiam tawh.
WhatsApp group hrang hrang, member 1,000 pawh tlin lohnaah zing, chhun, zan zawma sorkar beitute hi mi 20/30 bak an ni lo va; an thu leh hla hian kawngro a su lem lo tih hi hre ngat se an zak zawk ang.
Mipuite hian March 1, 1966-a kan ram buai chhan dik tak leh a nghawng an hre tawh a. February 20, 1987-a state kan nih hnu, kum 39 lai kan interek hran hnua kan dinhmun dik tak pawh an hre chiang tawh. Kawngpui tam tak a chhiat êm êm laiin, hruaitute thlâm leh picnic spot mawi leh nuam taka siamte pawh an hmu ru vek a ni. Jhum cultivation tihtawp tumin NLUP hnuaiah sum sem a ni a; mahse, vawiinah tlâng ram lo (jhum)-ah bawk sawhthing leh hmarcha thar chhuah a pûng tual tual a nih si hi. NLUP dawng tawh zawng zawngte'n SEDP an dawng leh ta vek em? A vaimim chi zawng phei chuan sawi lang lo law law zâwk ang. A zahthlak!
Policy thar chungchangah, a chângin ‘kan thup rih’ an ti a, a chângin ‘kan duang mek’ an ti bawk. Mipuiin an hriat duh chu thutiam ni lovin, a taka hmalâkna leh a rah chhuahte (result-oriented action) an hmu a ni zâwk.
Social media-ah sorkar beihna ring viau ṭhin mah se, mipui ngaihdan tak tak chu AMC inthlanah khan vote hmangin a lo lang chhuak tawh a. LC/VC by-election-ah pawh an inmawngzawm ru viau chungin, thutlukna tak tak a danglam phah nasa chuang lo. Min hre chiangtute hi social media noise aia ram hmasâwnna leh rawngbawlna dik tak thlahleltu, neutral-te an ni tlat.
Sorkar hmasâwnna leh thawh hlâwkna hi a lang thei chin infrastructure chauhva teh ngawt tur a ni lo. Sorkar hna lak dân fiahna (transparency), aikal kalphung tihtawp, office hun vawn dik leh hlawh hunbi taka pêk chhuah te hi kalphung thar (systemic change) ropui tak a ni zâwk.
Social media hi sawiselna leh zawhna thlenna atâna hmanraw ṭangkai tak a ni meuh mai. Mahse, destructive criticism ngawt aiin, kawng ṭha zâwk leh policy duang chhuak tura constructive criticism leh rawtna thlentu zâwk nih hi ram leh hnam ṭhan chhohna atân a pawimawh zâwk a ni.
Social media-a viral content leh au thâwm aiin, mipui ni tin nunah eng chen nge hmasâwnna tak tak a thlen tih zawk hi sorkar leh opposition-te pawhin ngaihtuahna an senna tur chu a ni.
- Thangtea Thawmte