Ṭhat theih miah lohna bawm

August 22, 2026 khan Thenzawlah lehlângin kan kal a. Hmuifâng tlâng kan tlan lai takin ka thinlungah hla phuah tur a lo lang a, August 24, 2026 zing dar 8:30 khan ka ziak ta mawlh mawlh a, ka ziak zo ta mai a. A thlûk chu Pu Rosangliana (Zorock) siamtir tur a ni tih a lo lang nghal a, Pu Zorocka chu ka hrilh a, hla thute ka thawn a. Ani pawh a lo phûr êm êm a, hna hmasaah neiin a lo buaipui nghal a. A thlûk mawi taka siamin, amah ngeiin thiam takin a sa nghal a, mipuite ngaihthlak theih turin October 15, 2026 khan kan tlangzarh ta a ni.

Lalpa hla min pek ‘Ṭhat theih miah lohna bawm’ tih hla hi kan ram leh hnam dinhmun, kan nunphung, kan politics leh kan thlarau nun chungchanga ngaihtuahna thûk tak min neihtîrtu tur hla a ni. He hla thuchah laimu ber chu, party politics avanga inṭhen darhna, mahni hmasialna, tangka sum ngainatna leh ṭhat theih miah lohna laka kan ram leh hnam chhanchhuahna tûra hriattîrna leh Pathian lalram sawrkar din tûra chona thuchah a ni.

1. Kan ram leh hnam a dam mawlh lo,

Eirukna luipuiin min lên mêk e!

Lanu val rual ruihhlo salah an tâng,

Chhan chhuahna jubilee dar kan nghakhlel.

Kan ram leh hnam a dam mawlh lo: Hei hian kan ram leh hnam dinhmun chu damlo ang, hnam nunphung, rilru, thlarau leh rorelna lama natna a kâwk a. Chuvang chuan, rinawmna a tlahniam a, hmangaihna a dai a, dikna leh felna pawh a bo mek tih puan chhuahna a ni.

Eirûkna luipuiin min lên mêk e: Luipui lian takin a hma zawna thil awmte a lên bo ang hian eirukna chuan ram leh hnam nunphung ṭha te, dikna leh rinawmna te a tihchhiat nasatzia puan chhuahna a ni. Eirukna hi pawisa ruk mai a ni lo, mipui chanvo dik tak pêk loh, thuneihna hman sual, mahni hlâwk nana mipui rawngbawlna hman leh dik lo taka induhsakna te hi a ni.

Lanu val rual ruihhlo salah an tang: Kan ṭhalai tam takte dinhmun chhiatzia leh hlauhawmzia hai rual a ni lo. Ṭhalai kan hnam hmachhuan turte ruihhlo salah an tân avangin kan nih tur angin kan din chhuah theih loh thu sawina a ni.

Chhan chhuahna jubilee dar kan nghakhlel: Jubilee chu zalênna, chhan chhuahna leh dinhmun thar neihna entîrna a ni. Leviticus 25-ah, jubilee kum chu salte zalênna leh rochan rama kîr lehna hun pawimawh tak a ni. He hlaa jubilee dar chu kan ram leh hnam natna, eiirukna, ruihhlo leh sual sal tânna aṭanga chhan chhuahna hun nghahhlelhna thu puan chhuahna a ni.

2. Hei leh chen saltânna khur hi,

Sual tinreng bul ngei chu a lo ni e;

Tangka sum ngainatna thang hlauhawm hi,

Chhung tinte min rûm ṭhaihtu a lo ni.

Hei leh chen saltânna khur hi: Zofate chu zalênna nei thei lovin, harsatna leh beidawnna party politics hnuaiah hun rei tak kan awm tawh a. Mipuite chu party politics–eirukna, mahni hmasialna leh sum ngainatnaah sal ang maia tâng kan ni tih puan chhuahna a ni.

Sual tinreng bul ngei chu a lo ni e: He thu hi a dawt leh tlar, tangka sum ngainatna chungchang nena chhiar zawm tûr a ni. Bible-in 1 Timothea 6:10-ah, sum ngainatna chu sual tinreng bul a nih thu kan hmuh angin, party politics hmanga sum ngainatna a awm thu puan chhuahna a ni.

Tangka sum ngainatna thang hlauhawm hi: Thang chu sa man nana an hman, a chhûnga lût tân chuan chhuah leh harsa tak a ni. Party politics chu tangka sum ngainatna thang hlauhawm tak nena khaikhinna a ni.

Chhung tinte min rûm ṭhaihtu a lo ni: Sum ngainatna thang–party politics chuan chhungkaw tin hi min chim a, chhungkua inṭhenna, rinawm lohna leh mahni hmasialna leh lungngaihna thlenga min hnûk luttu a ni.

3. Zonunmawi sira hnawltu chu,

Party politics ngei hi a lo ni;

Tlawmngaihna aia mahni hmasialna,

Sem sem dam dam tih rêng a rem mawlh lo.

Zonunmawi sira hnawltu chu: Zonunmawi tih hian Zo fate nunphung mawi, tlawmngaihna, inhmangaihna, inṭanpui tawnna leh lungrualna sawina a ni. Zonunmawi sira hnawltu tu nge ni ta, tih zawhna a ni.

Party politics ngei hi a lo ni: Hei hian a chhanna chu party politics hi Zonunmawi hnawltu bul a nih thu sawina a ni. Party politics avangin chhûngkhat, khawtlang leh kohhran pawh a inṭhen ṭhin. He hla thuchah hi politics-a telna zawng zawng demna ni lovin, party politics ruihchilhnain a nghawng ṭha lo sawina a ni.

Tlawmngaihna aia mahni hmasialna: Tlawmngaihna Zo fate rochan hlu chuan mahni aiin mi dangte mamawh a ngai pawimawh a, mahni hlâwkna aiin khawtlang ṭhatna a dah chungnung. Mahni hmasialna erawh chuan mi dangte chanvo leh an mamawh a hnâwl a, mahni hlâwkna a zawng hmasa ṭhin. Hnam nunah tlawmngaihna a bo chuan inhmangaihna a tlahniam a, lungrualna pawh a bo ṭhin.

Sem sem dam dam tih reng a rem mawlh lo: Kan ram leh hnama party politics-ah chuan sem sem dam dam tih a rem lo, mahni hmasialnain a tuam vel a. Inpumkhatna aiah inṭhenna, inhmangaihna aiah inhuatna, tlawmngaihna aiah mahni hmasialna a ni.

4. Lal Isua’n hmun rêng a chang lo,

Lal leh thuneih inchuhna bâwm a ni;

Hmangaih inremnain hmun a chang lo,

A ruh no no chhuakah tihna a ni.

Lal Isua’n hmun reng a chang lo: He thu hi thlarau lama ngaihtuahna thûk tak min neihtîrtu a ni. Party politics-ah chuan a takin Lal Isua’n hmun a chan theih loh thu sawina a ni.

Lal leh thuneih inchuhna bâwm a ni: He thu hian party politics chu thuneihna inchuhna hmun, politics chu mipuite rawngbawlna atana hman tûr a nih laiin, mahni inchawimawina leh mahni hlâwkna atana hman tumna a nih thu sawina a ni.

Hmangaih inremnain hmun a chang lo: Hmangaihna leh inremna hi Pathian lalram ze dik chu a ni. Party politics-a thuneihna inchuhna avanga inhuatna a lo awm chuan hmangaihna leh inremna atan hmun a awm lo ṭhin. Hnam inpumkhatna dik tak chu mi zawng zawng ngaihdân inang vekna ni lovin, ngaihdân inang lo chung pawha inhmangaih leh inzah tawn theihna a ni.

A ruh no no chhuakah tihna a ni: A ruh no no chhuak tih hian party politics chu inpâwngnêkna hmun, a âwmnêm leh chak lote tlawm ṭhinna a nih thu sawina a ni.

Thunawn:

Zote’n party sawrkar kan duh tawh lo,

Pathian lalram sawrkar kan din dawn;

Ṭhat theih miah lohna bâwm sîrah hnâwlin,

Lungrualna Zion lamlian kan sial dawn e.

Zote’n party sawrkar kan duh tawh lo: He thu hi Zo fate party politics avanga inṭhenna leh mahni hmasialna kalsan tûra kohna a ni. Party sawrkar tih hian, party bil hlâwkna leh party thuneihna humhalha mipuite chanvo hlamchhiahna sawrkar sawina a ni.

Pathian lalram sawrkar kan din dawn: Pathian lalram sawrkar tih hian party sawrkar ni lo, Pathian lalna, dikna, felna, hmangaihna leh inremnaa rorelna sawina a ni. Matthaia 6:10-ah Lal Isua’n, “I lalram lo thleng rawh se,” tia ṭawngṭai tura zirtir kan ni. Rom 14:17-ah pawh Pathian lalram chu felna, remna leh Thlarau Thianghlima lâwmna a nih thu kan hmu.

Ṭhat theih miah lohna bâwm sîrah hnâwlin: Hei hi hla hming atâna thlan a ni. Ṭhat theih miah lohna bawm tih hi a ngialngan taka ngaih chuan ṭhatna awm thei lo party politics system chhûngah hian thuneih inchuhna, eiruk duhna, tangka sum ngainatna, mahni hmasialna, mi dangte huatna leh inṭhenna te a awm vang a ni. ‘Sirah hnawlin’ tih hi mihring hnâwlna ni lovin, kan party politics nunphung hlui leh thil ṭha lo zawng zawng kalsan tûra sawmna a ni.

Lungrualna Zion lamlian kan sial dawn e: Hei hi hla thunawn tâwpna leh beiseina ropui tak chu a ni. Zion chu Bible-ah Pathian mite’n Pathian awmpuina an channa leh amah nena inzawma an chenna hmun a ni. He hlaa ‘Zion lamlian’ tih hi Pathian duh zâwng lama kan ram leh hnam kalna tûr, lungrualna leh inpumkhatna kawng tur sawina a ni. ‘Lamlian sial’ tih chu kawng awm sa zawh mai ni lovin, kawng thar siam, buaina leh harsatna tihbo leh hma lam hun ṭha zâwk rorelna atana inbuatsaih tura sawmna a ni.

Kan hnam chu party politics leh pâwl hrang hrangah inṭhen mah se, lungrualna Zion lamlianah chuan hnam pumpuiin kan kal ho thei ang a, hmangaihna, inremna, dikna, felna leh tlawmngaihna kawng kan zawh tawh ang. He hla hi a thu a ṭha hle mai titu mai ni lovin, “Thu tak in hria ang a, thu tak chuan bâwih ata a bân ang che u,” (Johana 8:32) tih kha a takin kan nunah lo thleng mawlh rawh se.

Rev. Dr. Zaichhawna Hlawndo