Written by
- Rev. Dr. K.Thanzauva
ARUNACHAL PRADESH VS MIZORAM EDUCATION LEH COVID 19 DONA KAWNGAH
November 27, 2020 khan India Today chuan Arunachal Pradesh chu India rama small states zingah hmasawn ber (most improved small state in education) leh Covid 19 dona kawngah tiṭha (the leading small State in the fight against COVID-19) lawmman a pe ta mai kha ka rilru chuan a pawm chiah lova; Hindu tamna state an nih vang mai a ni ang ka ti a. Tichuan, ka han zir chiang deuh a, pek ve mai awm tak ni hian ka hre leh ta deuh a.
Covid-19 dona chungchangah chuan Arunachal aiin mitthi kan nei tlem zawk, Mizoramah 9 kan neih laiin Arunachal chuan 59 lai an nei. Hri kai lai 4,303 kan awm laiin Arunachal-ah chuan 16,782 an awm a; tuna enkawl lai 94 kan awm laiin Arunachal-ah chuan 61 an awm. Amaherawhchu, Mizoramah chuan lockdown kan ti nasa zawk a, Covid-19 lockdown avanga harsatna turte- entirnan nitin in hlawhfa, taxi, summo, bus, hotel leh private school lamte chhawmdawlna engmah tih kan nei lo. Management lamah kan chak loh avangin pakhatna kan ni pha ta lo niin a lang.
Education lamah chuan literacy rate-ah kan sang zawk a, higher education-ah kan ṭhang nasa zawk. Amaherawhchu, lehkhathiam zingah Hindi ṭha taka hmang thei kan tlem hle laiin Arunalchal-ah chuan lehkha thiam zawng zawng deuh thawin Hindi an hmang thei a. English pawh an ngam deuh zawk. MST (Mathematics, Science leh Technology) lamah pawh an hniam lo. North Eastern Regional Institute of Science and Technology (NERIST) hi an state sawrkarin kum 1979 khan NEC kal tlangin rawtna a lo thlen tawh a, tichuan kum 1984 ah MHRD (Ministry of Human Resources Development) chuan a din ta kha a ni a, hei hian Mathematics, Science and Technology lam pawh hmansawnna a thlen a ni.
Kum 2007 khan Baptist Kohhran khawmpuiah Speaker-ah ka ṭang a, Mizoram rawn um pha tur chuan kum 30 in la mamawh ka ti a, mahse hma an rawn sawn ṭha hle a, kei ni lam thung hi kan ṭhan dan a ṭha lo hle. Kan zirlaite hi tun mamawh (required skill) kan pet ṭha lo a ni.
Inclusive Development-ah tiṭha berah min thlang a, hei hi chu kan traditional social structure vang a ni. Kum 1950-ah District Council pawh kan neih hma khan BMS missionary Rev. Carter chuan sapram aiin Mizoramah mipui an hlim tlang zawk a lo ti tawh a ni. Health, Economy and Entrepreneurships lamah small states zingah hmasawn berah min thlang a. Keimahniin kan nihna chu kan hre chiang a, cancer leh HIV-AIDS min chim dan leh tih buai nasatzia kan hria.
Economic development-ah hmasawn viauin min sawi ṭhin a, kan hmasawn dan hi lazam kang ang chauh ni. Kan intodelh lo, sum hnar nghelnghet kan nei lo. Lairila min ṭhamtu, ka ngaihtuah chian apianga min ti-khur der dertu chu education kan kal pui dan hi a ni. District Council-in mission kut aṭang education a lak aṭangin education quality a tla hniam a, ram buai lai (1966-1972) khan school 300 vel khar a ni a, education a sawprawp zova. UT/ State kan ni chova education chu politic khelh nan kan hmang a. Tunah chuan Elementary education chu private sector-in a lem zo a, Aizawl khawpuiah chuan Elementary school a zirlai 80% chu private school-a kal an ni.
Statistic han thlir lawk ila. Hetiang hian kum 2017-'18 academic year enrolment awm dan a ni:-
Naupang za zela 40.7 chu sawrkar, deficit leh aided school-ah an kal a; za zela 59.29 chu private school a kal an ni. Result lam thlir leh ta ila, kum nga chhung MBSC result lak khawm 2015-2020 chu hetiang hi a ni:-
Private school aṭangin 52.89% distinction-ah an passed laiin sawrkar aṭang chuan 10.15% chauhvin distinction-ah an passed. Private school aṭangin first class-ah 53.63% an passed laiin sawrkar school-ah chuan 19.76 an passed a, private aṭangin 43.49% second division-ah an passed laiin sawrkarah chuan 30.51% an passed. Private aṭangin 30.56% third division-ah an passed laiin 39.18% sawrkar aṭangin an passed.
Tuna a landan chuan Elementary education-ah chuan private school-ah kan innghat tihna a ni. Private school-te hi kan ngaihthah chuan Zofate hian rual kan ban dawn lo. Mizoram educa-tion hian tunlai naupangte hriatna leh thiamna (required knowledge and skill) a pe lo a ni. Sapṭawng thiam a ṭha, mahse a dang Hindi leh Mizo ṭawng tlahtlam chuang lovin.
By heart system (rote learning) kan kal san mai theih loh laiin, creative-constructive learning kan kalpui a ṭul. Technological revolution hian Mathematics, Science and Technology (MST) lam min hawi tir (focus) loh theih loh laiin nun thim (life skill) kan thlahtlam tur a ni hek lo. Tunah hian in enfiah a hun tak zet a ni.
- Rev. Dr. K.Thanzauva