HLIMNA KAN TIH HI...

Rom lal leh mifing ni bawk Emperor Marcus Aurelious-a khan, "I hring­nuna hlimna kha i thil ngaihtuah dan azirin a awm" a ti a. A dik viau awm e, kan ngaihtuah dan a zir hian kan hlimin kan hlim lo mai niawm tak a ni. 

Karl Marx-a khan pâwn lama kan lan chhuah dan leh kan chet dan hian chhungrila kan chhia leh ṭha hriatna hi a siam a ni a ti bawk a. Kan ngaihtuah dan ang hian kan nunga kan khawsa mai ti ila a dik thui viau awm e. 

Hlawhtlinna, hausakna leh hriselna kan ngaihtuah chuan chu chuan kan rilru a hruai a, chumi nei thei tur chuan ngaihtuahna kan sêng a. Chumi neih theih dan tur chu kan ngaihtuah a, kan thawk chhuak a, kan zawng a, kan um a, kan nei mai ṭhin. Chutiang bawkin hlawhchhamna, natna leh retheihna te hi kan ngaihtuahna bawm chhungah an awm tlat chuan chutiang dinhmunah chuan kan awm reng mai bawk a. Taksa natna te pawh mi thiamten an tia lawm, kan ngaihtuahna hian a lo kaihruai thei khawp mai a, miin dam a tum tlat chuan chu a ngaihtuahna chuan a taksa natna pawh kha dam thei turin thui tak a pui thei a ni an ti. 

A tak takah chuan hlim­na hi kan thil neih lamah a innghat ber lo va, kan rilru puthmangah hian a innghat daih zawk a lo ni. Mi ṭhenkhat chuan kan thil awh zawng tak nei ila kan hlim reng tawhin kan ring a, engemaw chen chu kan hlim ngei tak naa mahse a tluantling em lo fo. Mi hausa rethei, mi rethei rilru hausa hi an tam riau he kan chenna planet-ah hian, chumi awmzia chu kan hlim leh hlim loh hi kan thil neih ropui leh len lamah a lo ni ber lo va, kan thil thlir danah leh kan ngaihtuahnaah hian a awm zawk a ni. Mi hausa vuivai reng nih ai chuan mi rethei chantawka lungawi nih pawh a thlanawm zawk mai thei a ni.

Khawvela kan awm chhung hian mihring hian hlim hi kan duh a, kan zawng a, kan bei a, kan thawk a, kan chet velna tam ber hi nun hlimna kan zawnna kalkawng vek emaw tih tur a ni. Mahse hlimna hi pawisaa lei fel ngawt theih emaw a ni bik lo va, thinlungah hian a awm zawk a ni. Kan thil neih lamah a innghat lo va, kan rilru puthmang leh kan thil thlir danah a innghat zawk a ni. Tirhkoh Paula anga "Kei zawng eng ang pawhin awm mah ila lungawi zel ka ching tawh" ti thei tute hian chhungril aṭanga chhuak hlimna tlo zawk chu an nei mai a lo ni. Khai le, hlim i duh chuan i thil thlir dan kha her danglam hret rawh le.