Candidate aiin a ruattu en tur

USA inthlan kan sawi sup sup laiin Mizorama kan khaw­pui Aizawl enkawltu tur hi ngaihtuah a hun tawh zawk e. 

USA President tur lo ṭawngṭaipui tawk kan awm bawk a, anniho hian kan khawpui enkawltu tur te hi an ṭawngṭaipui ve hi ka phut tlat a ni kei zawng. Kan AMC inthlan turah hian ṭum dang ang bawkin mi hming ṭha tak tak party lamin an han sawm kual sang sang a, mipuiin kan en tur chu 'A sawmtu" lam hi a ni zawk tawh a ni. 

MNF-in candidate an lo nei chhe deuh a nih pawhin an hotupa Pu Zoramthanga hi kan duh tlat chuan MNF candidate hi vote tho tur a ni a, chutiang bawk chuan a lemlam zawng pawhin MNF candidate sawm chhuah kha eng ang taka pa ṭha pawh lo nimahse an hotupa ber Pu Zoramthanga kan duh si loh chuan a MNF candidate khan a tuar ve mai tur a ni. Kan AMC candidate te ai hian a sawm chhuaktu party hi kan en zawk tur a ni.

Congress candi­date pawh kan vote dawnin Pu Lalthan­hawla kan duh chuan kan vote mai tur a ni. Pu Lalthanhawla kan duh loh chuan a hnuaia mi kan vote hian a tawpah Pu Hawla tho kha kan vote tihna a ni leh tho tho ṭhin. ZPM pawh hi Pu Lalduhoma kan duh loh chuan ZPM candidate hi vote loh mai tur a ni a, Pu Lalduhoma hi kan duh a nih chuan ZPM candidate hi AMC atan kan vote tling tur a ni mai ang chu. 

Candidate hrang hrang an rawn in lan ṭan dawn a, mi ṭha ṭhiau zingah duhthlan dan awlsam ber chu, "Pu Zoramthanga pawl nge kan duh Pu Hawla pawl nge kan duh Pu Duhoma pawl," tiin AMC inthlan hi Aizawl mipui hian hmachhawn mai se, Politics hi a kal fim zawk lo maw? 

Engnge i ngaih ve dan leh ka ṭhian? 

- Robert L Khawlhring