Written by
- Dr. C. Lalrampana

Zirnaah Mizoram kan la ziaawm em?

Kum 2025-a Mizorama ziak leh chhiar thiam tehna chu 98.2% a ni a, hei vang hian India rama ziak leh chhiar thiam tam berna a ni. He rate hi 2023-24 Periodic Labour Force Survey (PFLS) data atanga lak a ni a, May 2025 khan official-in puan a ni.

Hetih lai hian Unified District Information System for Education Plus (UDISE) Report 2024-2025 hian India hmarchhak state-a sikul chhuahsan zat hriat theihna report a pek dan hi a tawi zawngin tarlang ila a ṭha awm e.

Assam: lower primary–3.8% (6.2%-ah a tlahniam), upper primary–5.0%–(8.2%-ah a tlahniam), secondary–17.5% (25.1)-ah a tlahniam. Hmarchhak state dangte: Mizoram–primary 10.8%, upper primary 11.6%, secondary 17.4%. Arunachal Pradesh – primary 4.8%, primary chung lam 5.1%, secondary 18.3.

UDISE report chuan Assam-a level hrang hranga dropout rate tlahniam a tarlang a, primary dropout rate hniam zawkah a tlahniam tih a tarlang bawk. Report chuan Assam-a transition rate, retention rate leh gross enrollment ratio (GER) lama hmasawnna a awm thu a tarlang bawk.

Hmarchhak state dang, Mizoram leh Arunachal Pradesh pawhin sikul bansan an tam thu an sawi a, zirlai hmasawnnaa an kal zel theihna tura targeted intervention neih a tul thu an sawi.

Hmarchhak state ṭhenkhatah chuan dropout rate a tlakhniam laiin, absolute number erawh a la sang a, a bik takin secondary level-ah chuan a sang hle. Report chuan retention rate tihsan leh dropout rate tihhniamna tura hmalakna nghet tak dropout rate sang nei 3 zingah a pawimawh thu a tarlang.

Hetihlai hian, data thar ber chuan Mizorama higher secondary (class 11–12) dropout rate chu kum 2025 hian 3.8% a ni tih a tarlang a. November 2025 atanga report chuan Mizoram hian hmarchhak state zawng zawng zingah school dropout rate sang ber a ni tih a tarlang a, mahse, hemi tehkhawng atana figure chiang tak erawh chu tarlan a ni lo.

Secondary sang zawk (classes 11–12 ah kum 2025 khan Mizoramah dropout rate 3.8% a ni. November 2025-a report pakhat chuan Mizoram hian hmarchhak state zawng zawng zingah school dropout rate a nei sang ber a, mahse, state pumpui tana rate bik a ni lo tih a sawi. October 2025 aṭanga hmeichhe report hran chuan, hmeichhe naupang zingah zirlai sikul bansan tamna rate sang tak chungchangah hmeichhia an tam tih a tarlang a, a bik takin zirna sang zawk leh technical field-ah a ni.

Mizoram literacy rate sang ber kan nih laia higher secondary lama kan dinhmun leh annual dropout rate North East state zinga sang ber nihna kan hauh hi inchhuan vakna chi niin a lang lo. Ber nihna inang lo leh inpersan lutuk kan han nei hi thil mak tak chu a ni.

Meghalaya Chief Minister Conrad K Sangma chuan Nov. 11, 2025 sikul 206 zirlai awm miah lohna an neih thu leh, zirlai 10 hnuai lam nei sikul 2,269 an awm thu a sawi a, zirtirtu serial vat a tul thu a sawi bawk. Ri Bhoi Synod College-a classroom thar hawnna, Umsaitsning-a thu a sawinaah Chief Minister chuan, sorkar chuan zirlai hamthatna lam ngaihtuah chungin, zirna kalphung lama structural issues awmte chu a hmachhawn a ngai a ni, a ti.

Heng sikul zawng zawnga hnathawkte hlawh leh sikul thuamna sum senso tam turzia leh sawrkar chawi belh tam turzia hi chhut chhuah ngam pawh a ni lo hial awm e. Meghalaya dinhmun ngaihtuah hi chuan Mizoram hi chu kan la ziaawm viau a tih theih awm e. Sawrkar hnathawk aikal (proxies) la tun thleng pawhin an la awm nual niin sawi a tam hle.

Sikul in, infrastructure leh facility etc. ah te, literacy rate-ahte sang viau mah ila, lehkhathiam tak tak erawh kan la tlem hle niin a hriat theih. All India Services Exam hian a tlangpuiin Civil Services Examination (CSE) a kawk a, chu chuan Indian Administrative Service (IAS) leh Indian Police Service (IPS) ang chi hna ropui tak tak thawk tura lakna a ni.

CSE hi Union Public Service Commission (UPSC) chuan a kaihruai a, all India service dang, a bik takin Indian Forest Service (IFS) leh group A leh B civil service-te tan pawh a ni bawk. Recruitment process-ah hian multi-stage exam a awm a, chutah chuan preliminary leh main written exam-te pawh a tel a, chumi hnuah interview neih a ni bawk thin. Hei tak hi a ni, kan Mizo thlalai lehkhathiam rualte’n an hlauh êm êm thin chu?

Hetihlai hian, kan vela kan tribal-puite chuan huaisen taka hmachhawnin an pawm chilh a, an bei ngat ngat a, a tawpah an hlawhtling nge nge ṭhin. Mizo lehkhathiamte erawhin an hlau tlat a, an hmachhawn ngam meuh ṭhin lo. Hei vang hian all India service kan tlem sawt ta hle a ni. Kan literacy rate sanzia ngaihtuah chuan heng service hrang hrangte hi hui zo vek thei awm tak kan ni a, mahse, kan lang pha ve ngai meuh lo a ni ber.

Chuvangin, literacy rate sang ber, NE state zinga annual dropout rate sang ber kan nih bawk si avang hian All India Service Exam kan hmachhawn ngam ta lo em ni le? Kan zirlaite leh zirlai zo tawh lehkhathiamte bakah sawrkarin ṭan a lak nasat a ngai e.

- Dr. C. Lalrampana