Written by
- Lalthansanga

Sawrkar leh damdawi in inremna

Politics vang a ni nge, private hospital aṭangin hiattu an awm nge phei chu ka hre lo va, a diltu lamin an bei ngawrh bawk a, MUHCS chungchanga Synod Hospital leh Mizoram sawrkar inremna thuthlung chu kan lo hre ta a, inenkawlna leh test chi hrang hrang mante pawh kan lo hre ta. A lawmawmah ngai ang.

Ṭhiante bulah pawh ka lo sawi ve fo chu, MUHCS chungchanga Mizoram sawrkar leh Synod Hospital inremna a ni emaw, Max Hospital, Apollo Hospital, Vellore CMC, etc te nena an inremna emaw, damdawi in dangte nena an inremna emaw hi hriat kher kan phût turah ka ngai ve lem lo va. Sawrkar sum, mipui sum hmanna pawh ni se, third party kaihhnawih a nih avangin RTI Act hnuaia dil chhuah theih loh zingah tel pawh ni se, a awm ka ti viau thei.

Chutihrualin, sawrkarin damdawi inte hnena damlote enkawlna bill a pek chhuah zat leh a kaihhnawih thilte, sawrkar sum hmanna erawh chu chipchiar taka pek chhuah theih ngei turah ka ngai thung. Engpawhnise, court thupek angin sawrkarin Synod Hospital nena an inremna thuthlung a pe chhuak ta a, a lawmawm hrim hrim e.

Synod hi bei châk ve hrim hrim te, sawiselna tur remchang zawng ve hrim hrim hi mi tam tak an awm reng niin a lang a, Synod Hospital-in MUHCS an zawmna tura sawrkar nena thuthlung an ziah chungchangah pawh, sawrkar dem an awm a, Synod lam dem tum ngar ngar an awm. Sawrkarin Christian Hospital leh damdawi in dang ṭhenkhatte rate a pawmpui aiin Synod Hospital rate a pawmpui zat a san zawk avanga sawrkar leh Synod lam dem ta pawh an awm nual niin a lang.

Sawrkar leh damdawi in an indawr a, an inpawm tawn theihna angin an inrem a ni mai, tih hi kei ka ngaihdan a ni a. MUHCS-a Synod Hospital rate hman mek hi sawrkar nen an indawrnaa an pawm dun theih ang zat a ni a, Christian Hospital-in rate an hman pawh an inbiakna aṭanga an inremsiamna, an pawm dun theih dan ang a ni mai. Chutiang zelin, private hospital dang, MUHCS zawmtute rate pawh a ni ang.

Tunah hian private hospital zingah MUHCS la zawm lo eng emaw zat an awm a. Pawl anga thu leh hla an neihah chuan, Synod Hospital rate ang sawrkarin a pek theih chuan MUHCS zawm tura an inpeih reng a ni âwm e. Pawl anga 'Synod rate ang' tih ngawt hi a ni thei lo. An pawlah hian mimal damdawi in lian leh changtlung, mipui pawhin an pan nasat leh khawl leh hmanrua pawh nei ṭha deuh te an awm a. Chutihlaiin, tlabal ve tak tak, mipui pawhin an pan tam lo, damlo enkawl pawh nei tlem ve tawh takte an awm bawk. Chungte chu rate inang tlanga inremna ziahpui chi a ni mawlh lo.

Engpawhnise, MUHCS la zawm lo private hospital-te hian zawm ve ngei se ka lo ti khawp mai a, sawrkar nen inrem thei ngei se a duhawm a ni. MUHCS an zawm a nih chuan a chhawrtu tur ber chu mipui an ni a, sawrkar leh private hospital-te tan pawh hlâwkna a ni bawk ang.

- Lalthansanga