Hming thlak a ṭha mai em?
MNF sawrkarah khan Adviser to CM an awm a, Congress sawrkarah khan Parliamentary Secretary kan lo nei tawh a. Tuna kan hrawn mekah hian Adviser to CM kan nei leh hlawm a, chanvo inpekna a nih bakah, minister-te hna eng emaw zatah an ṭanpui thei tura ngaih a ni. Kan hotute’n an tih chu a ṭul a ni mai a, lo sawisel ngawt chu misual nihna pawh a ni thei.
Kan CM hmasa khan khawi laiah emaw a zin ṭumin a kalna hmuna mite hriat thiam loh zawng eng eng emaw a sawi ni awm tak a ni, eng tin tin emaw ka lo hre ve a. Ṭum khat leh pawh kan CM hmasate zinga mi India ram khawiah emaw ni khuallian a ni a, ani khan extempore speech a nei ta mai a, Mizo lo awm vete an zak deuh ni awm tak a ni.
Ṭum khat chu ruling party mi, mi fel tak pakhat ka zawt a, adviser an nei nual sia, kan CM-te hi hetiang angahte hian an adviser-te hian an advise ve thin lo em ni, ka ti a. Ani chuan, "Advise teh nang, an adivise ngam teuh lo, an hlauh nak a laia," tiin min chhang! Sawrkar leh politics lam thilte hi kan hre lo ve hle a lo ni.
Adviser to CM kan ti a, an hna hming, designate anga kan CM-te an advice ngam lo a nih si chuan hming mawi leh zahawm tak an put hi tihdanglam a ṭha lawm ni aw, ka ti. Congress sawrkar laia an tih ang khan parliamentary secretary tih kha ni leh mai se; chanvo pawimawh tak kan inpe duh a nih chuan. Ngaihdante hi kan lo nei ve ṭhin a, mi huatthu kan sawi em lo ang chu maw!
Hmanlai Hebrai ho ngaihdan sawi kai ta ila. Hebrai ho ngaihdanah chuan hming hi a pawimawh riau mai a, a chhan chu hming hian a putu nunphung leh thiltih a hril zel turah an ngai. Hming vanduai tak pakhat kan hmuh chu Nabala kha a ni. Nabala kha a hausa fu nâin, a mâwl tlat mai a, Davida mi tirhte kha a lo hau mai mai a, Davida ngei pawh kha a zahlo chauh ni lovin, pute lak ata tlanbo ang te khan a sawi mai a, ropui lo takin a thih phah ta a ni. Hosea tih te, kan Lalpa ngei pawh 'Krista' tih a ni te hi an hming leh an hnathawh a inmil ṭha hle a nih hi.
Tu mai pawh hi thu râwntu mamawh lo kan awm lo ti ila, a sual awm lo ve. Keini ang mai mai hi chu engmah tih tur leh thutlukna pawimawh siam tur nei kan ni lo va, chutihlaiin, party hotu berte, ram hruaitu lu chinte hi chu an pawimawh a, thutlukna siam tur tam an neih ṭhin avangin thil eng emaw hunah te chuan thu ràwntu ṭha tak an nei ṭhin se la; an zawm leh zawm loh erawh chu thuhran. An zâwm vak lo a nih pawhin, a thu ràwntu pawhin hrehawm ti lovin, kei chu ka bâng mai ang, ti kher lo se la.
CM an ni emaw, minister leh party hotu ber an ni emaw, a ṭul huna thurawn pe theitu mamawh ṭheuhah ngai ila. An chhung hnaivaite emaw, party mite emaw, thurawn pe duhtute’n thu an ràwn theih nan inhawng ve thung se. Kan Bible-ah pawh, Ephatha (lo inhawng rawh) tih a awm kha.
- Lalbiaksanga