Written by
- F. Lal Thanzuala. 9436141242

KRISMAS CHUNCHANGA WHAT THE BIBLE SAYS!

Pawinṭ hrang hrangin Krismas thu hi i lo ngaihtuah teh ang u. A hmasa berin Krismas lawm hmasatute zingah khan sorkar milian te, mi hausate leh sakhaw hotute leh lehkha thiam dangte an tel hauh lo tih i hmu ngei ang. Pathianin a hrilh ve lo tlat mai! Keini’n kan ngaih pawimawh hlawm tehlul nen!

Pathianin a Fapa lo piang lâwm hmasa tura a thlan chhuahte chu hna hnuaihnung thawktu, mi zingah pawha tel ṭha ve pha lo, berampute an ni (Luka 2:5,8,10). Tel âwm tak tel tlat si lote chu Pharisai-te leh lehkha ziaktute kha an ni. An sakhaw hruaitute Pathianin a kal kân tlat kha ‘awm’ chu a awm a ni. "Mihring chuan pawn lama lan dan an en ṭhin a; Lalpa erawh chuan thinlung lam a en zawk ṭhin a ni," (1 Samu 16:7) tih kha ngaihtuah chhuak ila. Mi hausa ringawtte leh sorkar milian ringawtte leh lehkha thiam tak ringawtte hi Pathian thinlungah hian an lian lo tih kan hriat a ṭha.

Rev. Lalthangliana Hnamte hla phuah, "Kan thinlung hi Bethlehema ran thleng hmun anga a tlawmin, Lal Isua a lo lang ṭhin a, tun hi hun lawmawm chu a ni e," tih hi a va dik em! Kan Lal Isua hi mi ropuite inah ni lovin ran thlengah a ni a pian dawn! Chu chu Bible min hrilh dan a ni. Thinlung milian leh hausa thinlungah a piang dawn lo, hna tlawm tak thawk, khua pawha awm ve hman lo leh vantlang zinga tei khawthawng ngai lo berampute kha Pathian Fapa thu hrilh hmasak ber an ni ta (Luka 2:20). 2026 Krismas-ah hian i thinlung kha a lo milianin a lo hausa rilru palh ang e; Pathian Fapa hi i mis palh ang e!

A pahnihnaah chuan, khang berampu tlemtê hnenah khan Van mipuite khan hrilhlawkna hla zu han rem ta mup mup mai a! Khawvela mi zawng zawngte tan Pathian lalram hla, Lal Isua’n a lalram a dinna tur hla kha an rem ta a ni. Chungnung bera Pathian a awm hi remna awm theihna bulpui chu a ni.

Lal Isua chuan misualte chhandamna hna a thawh zawh hnu khan Vanah a chho ta a, rorêl tûrin, lalram din turin a lo chhuk leh dawn a. Chutah chuan "Lei chunga a lawm em em mihringte hnenah remthu leng rawh se" tih kha (Luka 2:14) a lo thleng dik tawh ang. He remna hi thlarau lam piantharna, Pathian nên kan inremna thu a ni phawt a. Chumi zawhah chuan khawvel pumpuia inremna tawpin-tai nei lo lo thleng tur sawi lawk lehna a ni (Isaia 9:7). Tunah chuan khawvelah remna thu a lêng hlawl lo, ti rawh u maw! Kristian pawl hrang hrang chenin kan inmelh sâlâ rûn chu a nih ber hi! Inngeih hi a thlarau a ni.

A pathumnaah chuan, Krismas hun hi chhungkaw retheite lungngaih leh rilru hrehawm hun a ni! Nu leh pa rethei tê tê, hmeithai rethei tê tê te, vanduaina avanga mangang êm êmte hian an fate tan thawmhnaw leina tur an nei zo lo, an rilru a va hrehawm ṭhin em! Chuvangin, Pathian malsawmna i dawn, ama ṭanpuinaah i thawh chhuah sum leh pai kha Lal Thar lo piang lawm ve nan heng mi retheite tan hian i thawh chhuahpui dâwn lâwm ni?

Pathian lalrama lut turte kha, "Heng ka unau tê berte zinga mi pakhat chunga in tih chu ka chunga tî in ni," tih a nih kha. "Ka Pa vohbikte u, lo kal ula, khawvel siam ṭan tirh ata in tana lalram buatsaih chu chang rawh u,” tiin kan Lal Isua’n a la hrilh dawn tih a nih kha (Matt 25:34,46b). Mi mangangte zawng chhuak tura i feh chhuah a hun ṭan ta e! Kohhrante pawh hian a sang tel mai ni lovin, a sing tel telin feh chhuak teh u le! Nang thla tin hlawh la ṭhin pawh kha, i hlawh i kham hle a ni lawm ni? Khawvel bank-a dah pung mai lovin, Vana Lal Isua Bank-ah dah dan zawng rawh!

Hei hi vawng tlat teh, mi harsate ṭanpuina i pek kha Lal Isua’n asin lo dawng ni! "Ka mi tê berte chunga in tih kha ka chunga ti in ni," a tih kha! Lal Isua a ni i pek kha! Ui reng reng suh, i pe thei kha lawm zawk rawh! Krismas hun hi rethei fate’n hahdam tak leh lawm taka an hman ve theih nan vâk chhuak rawh le! Lalpa malsawmna i dawn kha ‘share’ ve teh le. I tan pawh thlarau lam lawmna nasa takah a chang zel dawn a ni!

Thil i pe dawn a nih chuan i neih ṭha berte zinga mi ngei kha pe ang che aw, i kawl chul tawh hnu ni lo; i neih theih hram chuan. A chhan eng nge ni? A dawngtu tur kha Lal Isua a ni tlat! Khawchhak mifingte khan an robawm an hawng tih a nih kha! I dahṭhat rauh rauh ngei kha phawrh rawh! Magi (meijai) hote khan ro hlu rangkachak, beraw leh murra, cheng tam tak man a nih kha an pek.

Thawnthu pakhat hi i la hre lo ang. Mi pakhat chuan rethei tak pakhat hnênah thawmhnaw a pe a, ani chu lawm takin a kal liam ta. A petu nu chu a lawm ta hauh lo, a ngaihtuaha a lawm lo telh telh ta mai. Eng nge ni a chhan? A thawmhnaw pek tak aia ṭha tak tak thar tak tak a neih ṭeuh si a, thawmhnaw hlui la ṭha ve tak tak tho a pek kha, a thlarau chan a lawm lo a ni! A ṭha tak tak, a tharte pawh kha engati nge i pêk loh tih khan a rilru a tihrehawm a lo ni! I thilpek dawngtu tur kha Lal Isua a nih avangin i neih ṭha ber kha pe ngei ngei ang che!

A tawp berah chuan, kan Krismas hman dan hi Mizo ze mil leh kan tun hma tih dan ṭha tak takte kha hlamchhiah lovin i tharthawh leh teh ang u. Kan Krismas hi a Sâp zo dawn! Krismas tree, Santa Claus thlasik vûr lem, Krismas pangpar bik leh colour bik, et cetera. Mizo ze pakhat–hnam dang tih dan thîk zung zung lo hian, a nghet chu la ni lo mahse kan lo tih fo tawh–Krismas chhang chhum leh kan te, urlâwk zan kan tih, Krismas dik tak zawk, zana tlaivar ngei ngei, thil dangte nen.

Hetiang hian Mizote chuan Krismas an hmang ṭhin tih theih turin kan Mizo tih dan hi phuahin i chawisang tel ang u. Hnam nihna kan bosal chuan kan Kristianna pawh hian a tuar thei a ni. Tunah pawh hian kan hmasawnna hna tam tak hian kan Mizona a tidal mek a nih hi. Eng vângin nge Pathianin Israel fate kha Jentail hnam nupui pasala neih a awih miah loh? Kha daih kha a ni ve asin!

- F. Lal Thanzuala. 9436141242