KUM THAR CHIBAI

Hringfate khawvelah hian, tumah hi inhmusit thei kan lo awm lo; a hnuhnung ber pawh a hmasa berah aṭan theih a, tuna dinhmun sâng tak chelha kan mi ngaihsan te ngei pawh hi, khutah an la awm thei. Khuta mite pawh, khitah an la awm ve thei a, a tu amah hi inhmusita in hnuaichhiah chi a ni lo. 

Pawlkût thla: Kumin chu kum thar ni-ah ni chhuak hmel thiang duhawm tak hmuh tur a awm a, kum ralmuang leh duhawm a ni ngei turah ngai ila. Pathian ṭihna nun nen kum bul kan chhiar tlan a duhawm hle. Kum thar hian malsawmna chhung tinte-ah her chhuahpui se. 

Shiv Khera'n thusawi ka hriat reng chu, “Hnehtute hian thil danglam tak an ti bik lo, an tih dan a danglam mai a ni zawk" tia a sawi hi a ni. Tihdan danglamin kohhran a siam ṭha a, sorkar danglamin change a thlen a, khawtlang danglamin hriselna a thlen thuizia hre chiangtute kan ni. Mahni dang­lam ngam hmasakna hian, kan nun leh ram pum kang fai hmasa ṭheuh rawh se. 

Tar chak lo te, natna ina a rùn mek te, mahni in lum aia damdawiin khuma nitin hun hmang tam zawk te, nitina ang khat ṭheuhva hringfate chunga rorel ṭhin - thihna ina a run mek lusûn chhungkua zawng zawngte tan kum 2019 hi kan kum ṭhat kum lo niin, kan malsawm dawn kum lo ni teh se. 

Hmangaihna lantir rawh: Tunlai khawvel thiamna sang tak karah hian, mahni ṭheuhin mahni hmunah kan tlei vek emaw tih tur khawpin kan hlim tawk a; mah se, kan hlimna erawh duhawm aiin huatthlala a ni deuh zawk ṭhin. Mahni hmun ṭheuha kan hlimna zawn danah a tawpah mahni vekin a sawhkhawk kan tuar leh a, a tawpah thihna leh manganna, rilru hahna leh phurritin min tlakbuak leh a, khua a var lo hle ṭhin. 

Chung te chu tlansanin kum 2019-ah chuan hma­ngaihna tam nun nen, mahni invawngfel ila, hlim sang chungin mi biangbiak uar thar ila, zahawm dera nung lovin zahawm takin nung mai ila. Pathian min pek hmangaihna hi sem chhuah uar ila, sem chhuah hi pun leh zualna a ni si a. 

Beiseina nung nen: Bei­sei­na nei lo tluka mi hlauh­awm an awm lo; beiseina thar neia nitin nun a duhawm ber. Beiseina thar nen; kum 2019-ah hian bul ṭan ila. Mi hlawhtling ti-a kan hriat tam zawkte hi, vawi tam lo hlawhchham tawh an ni asin. 

He khawvelah hian hausak vanga nuih tur ni se, kei chu ka nui ngai lo vang. Hmelṭhat avanga hlim tur ni phei se chuan, hlim turin ka awm tawh tawp nang! Mihring tung chhova kalte hi, kan thil lo tihsual tawh avanga tluk hlen tur ni se, tho tur ka'n awm tawp nang i. Mahse, hlimin kan nui a, hlimin kan tho va, kan tlu hlen ngai lo vang; kan tho leh ṭhin zawk tur a ni tlat zawk dawn lo'm ni? Siamtu'n engkim tuar thei tur leh, hneh thei bawk tura a din leh a duan a te kan lo ni. 

Beidawngin kûn reng lo la; ni a tla a, a pil hlen ngai lohna leiah hian kumkhaw daih harsatna a awm miah lo. Chumi hre reng chungin, Kumthar chibai leh, kum bul chhiar chhoh nuam vek ule.