Kan ram rorel khawl

Thla kal ta mai khan kan inthlang zo a. Seat la tam ber MNF Party chuan sawrkar a siam a. Minister leh an chanpualte bakah, Speaker, Deputy Speaker, Deputy Government Chief Whip thlengin an invuah fel tawh. 

Mahse kan ram ro in rel danah hian mipuite’n chian loh kan nei nualin a lang. Kan mithlante hi ‘ram roreltu tur’ kan ti a. Assembly House-te pawh ‘ram rorelna sang ber’ kan ti bawk a. Mahse Minister-te leh Court lamte pawh a chang chuan heng ‘ram rorelna sang ber’ te ai ai hian an thu zawk te hian a hriat a. A chang leh ‘Governor thu thu’ te an ti leh lawi a. ‘Kan ram chu democracy ram, mipuite lalna leh thu berna ram a ni’ kan ti a. Mahse mipuite kan thu vakna lai leh kan lalna lai awmin kan hre si lo. He’ng hi sawifiah mai awlai lo tak, chhiar peihawm lo thama sawi duah ngai chi a ni. Mahse tawi deuhin, a thiam zawkte cho chhuak zawng talin sawi ka’n tum teh ang. Thu dik lo em kan sawi lo ang. 

Kan ramte ang democracy ram hi, mipuite rorelna leh lal berna ram tih ṭhin kha a dik a. A nih a khawilaiah hian nge mipuite’n ram ro kan rel a, kan thu ber? Kan ram ro inrel dan, a nihphung leh a ziarang tur tlangpui kan duh dan hi, mipuite’n ziakin ram dan pui (constitution)-ah, a tir aṭangin kan dah sa vek a. Kan zinga tam berin he thu dah hi mipuite thuchhuak a nih kan hre hauh lo maithei. Mahse kan ram dan pui thuhmahruai kha, ‘Keini India mipuite chuan India ram hi ..democratic republic …intluktlanna…rorel dikna … in-unauna…. ni turin he Constitution hi kan in pe e’ tiin a inṭan a. Heta ṭang hian, he ram hi mipui rorelna ram (democracy ram) ni tur leh, a inrelbawl nan pawh he Constitution, mipuite pawm ngei hi hmang tur kan nih a chiang a. He Constitution leh a peng, ram dante zawm zela ram kan kaihhruai hian, mipui thuin zawm hlawhin a lal a, mipuite pawhin ram ro kan rel tihna a lo ni a. Zawm a hlawh lohna apiangah erawh mipui rorelna namthlu-in, a zawm lotu mimal/ party rorelna hnuaiah kan ram chu a kun tihna a lo ni. 

He Constitution leh a ṭhuihruai ram dante hmanga ram rorel buaipui a, dah chungnung zeltu tur, ram rorel khawl lianpui, sawrkar (government) chu mipuite’n kan din ta a. Sawrkar-ah hian ram thuneihna chu hmun khata dah mai loin, hmun thum, Legislature, Executiveleh Judiciary-ah te kan ṭhen a. A ṭhen tin hian an chan lam ṭheuhah erawh thuneihna pumhlum an nei thung. He’ng a ṭhen tinte dinhmun leh nihphung hi state level-ah bik tawi te te-in lo sawi dawn ila -

Legislature - Constitution-ah hian ram inrelbawl dan tur, a tlangpui kaihhruaina a lang hlawm a. Nitin khawsak nana hman tur ram dan chipchiar erawh a leng vek seng lo. Chuvangin, Legislature lam hian Constitution thil tum leh tin zawn thlawp tlat zelin, hun lokal zel mila nitin ram rorelnaa hman theih tur, ram dan chipchiar (keini-ah chuan Mizorama hman tur) siam belhte leh siamṭhatte a hma ber a. Chutiang zelin sawrkar sum hman tur ruahman, kum tin budget pawh ram dan milin an passed hmasak vek zel a ngai. Heng a hna chanpual chinah hian Legislature hian ram dan chhungah thuneihna tawp a nei a, Executive leh Judiciary lam an inrawlh thei lo. 

Governor hian Legislature kalphungah thuneihna sang tak a nei bawk a. Legislature-ah hian mipuite’n kum 5 dana kan thlan MLA/ MP-te bakah, Legislative Assembly Secretariat-a thawktute an awm. 

Executive - hi, Constitution leh a hnuaia ram dante’n, ram tan ṭul leh tihtur a tih ang a tak chantir tura hmalakna lam a ni thung. Executive-a a hotu lu, thuneitu chu Governor a ni a, mahse Minister-te (Council of Ministers) thurawn ang zela hmalak a ni thung. Minister dinhmun hi thla 6 chhung bak MLA ni lo tan chelh theih a nih loh avangin Legislature lam aṭanga MLA thlan chhuahte’n an chelh ṭhin a. Executive hna chan hian ram tihhmasawn, ram khua leh tuite humhalh leh an chanvo chantirte bakah, ram chhung nitin inrelbawlte a huap vek avangin thawktu pawh a mamawh hnem a. Legislature lam leh Judiciary lama sawkar hnathawkte tiam loin, sawrkar hnathawk dang, Civil Secretariat leh Department hrang hranga Officers leh Staff zawng zawngte hi Executive ami te vek an ni. 

Executive hian a hna chanpual chinah hian ram dan chhungah thuneihna tawp a nei a, Legislature leh Judiciary lam an inrawlh thei lo. 

Judiciary - hi Supreme Court-in a ho a. Constitution leh a hnuaia ram dante dah chungnung a, ram chhung thiltih kawng engkimah ram dan zawm lohna leh palzutna lo awm ṭhinte namthlu a, a aia ram dan zawk tun din zel lam hi an hna a ni a. Ram dan ang lo emaw, palzut zawng emaw, a thlawp lo zawng emaw-a thiltih reng reng chu, tu tih pawh ni se, sawrkar thil a ni emaw, pawl thil a ni emaw, mimal thil pawh thiatin, ram dan angin a tih ṭhat tir thei. An bukna chu ram dan aṭang veka a dik leh dik lo teh a ni a. Judiciary hi dan siamtu an ni lo a (Dan siamtu chu Legislature lam an ni), mahse ram dan bung leh chang tinte thu ken leh an awmze dik, official-a sawi fiah theitu an ni thung. Heng a hna chanpual chinah hian Judiciary hian ram dan chhungah thuneihna tawp a nei a, Executive leh Legislature lam an inrawlh thei lo. 

Judiciary-ah hian Courts (District Courts-te leh High Court)-te, chuta roreltu Judges/ Justices-te bakah Courts-a hnathawktu dangte an awm. Hetiang hi kan rama mipui rorel khawl awm dan tlangpui chu a ni mai awm e. 

Heta kan hmuh ang hian, mipui rorelna ramah chuan thuneitu sang ber chu mipuite kan ni. Kan rorelna thu pawh Constitution leh ram dan ang zela ram kaihhruai hi a ni mai. 

Chumi a taka kengkawhtu atana kan siam sawrkar hnuaia Legislature, Executive leh Judiciary-te hian an hna chanpual zawnah ṭheuh thuneihna pumhlum an neih vek avangin, MLA leh Legislative Assembly lam chauh ni loin, an vai hian ‘ram roreltu’ emaw, ‘ram rorelna sang ber’ emaw tia koh theih vek an lo ni a. Amaherawhchu, ram rorel an khawihhona-ah pakhat thil tihin a dang hna chanpual a khawih tel chang chuan an inngaihchan tawn erawh a ṭul fo. Amaherawhchu, kan Minister-te hi chu, a chunga kan hmuh ang khian, a ṭhen hnih, Executive-ah leh Legislature-a thuneikawpan nihavangin, an thuneihna leh thiltihtheihna mai bakah, ram tana an mawhphurhna pawh a zau bik lo thei lo. 

He’ng aṭang hian Legislature, Execu­tive leh Judiciary-te, an zavaia ṭobul leh an laimu chu mipuite thuchhuak, ram danpui leh a hnuaia dan siam belhte hi an ni tih a lang. Tin, an tum ber (an goal) ṭheuh pawh, chu’ng ram dante chu ram rorel nan hman a, kawng engkima dan dah chung nun a ni. Chuvangin, he’ng Legislature, Executive leh Judiciary-a hotu chanchang, President, Vice President, Governors, Ministers, Justices, Judges, MP, MLA tu pawh hian, an dinhmun an luah dawnin he’ng ram dan laka rinawm tur leh, he’ng dan ang chauha ram rorel a, dah chungnung leh hum tlat tur hian, tihtak meuhin thu an tiam vek a ni. 

Mi ṭhenkhatin mipui rorelna chu, kum 5 dana MLA/ MP tur kan thlan ṭhin lai chauh hi emaw an ti ṭhin. Mahse hei hi a dik lo. MLA thlanah chuan mipuite’n kan aiawha Legislature leh Executive lama ram rorel tura kan mi dahte kan ennawn mai a ni. Judiciary lam pawha huam lo. Mipui rorelna erawh chu tumah thliar lova engtiklai paw’n ram dan zawma ram chhung rorel engkim tih a nih avangin huam loh leh hun lai bik (inthlanlai ni hnih khat chauh angte hi) a nei lo. Chutianga mipui rorelna siam ṭhin ram apiang chu a ni, he khawvela a taka kan hmuh ṭhin ang hian, ram hmasawn, changkang leh ram nuam lo ni ṭhin chu - ram dan zawma rorelna-ah eirukna, induhsak bingna, inthliarna leh thil ṭha lo dangte’n hmun an chang thei si lova. 

He’ng aṭang hian, mipuite’n kan ram nihphung leh a ziarang bakah, kan ram hruaitute hian enge an tih tur, tih loh tur, ram an hruai dan tur, an mawhphurhna leh, ram leh mipuite pawhin enge an lak aṭanga kan hmuh tur leh kan beiseiturte pawh kan hre chiang deuh awm e.