Ṭawngṭai chhanna sawrkar thar!

Tun tum Mizoram MLA Inthlan ang reng renga kohhran leh mimal pawh kan ṭawngṭai nasat kha MLA Inthlan hun dangah a la awm ngai lo tiin mi ṭhenkhatin an sawi a, a dik mai thei. Keimah mimalah chuan a dik chiang khawp mai. Tun hma inthlanah khatiang tak khan kei ka la ṭawngṭai tam ngai hauh lo. 

Tun ṭuma Zoram kohhran leh mipuite kan ṭawngṭai nasat chhan nia ka hriat chu: 1. Mipuiten party sawrkar ni lo, mi tin huapzo sawrkar neih kan chak. 2. BJP kaltlanga Hindu sakhua leh nunphung kan rama a lo luh kan duh lo. 3. Kan ram hruaituten Patjian hming lam mai ni lova amah tihna tak tak nen ro an rel kan duh tawh. 4. Zoram tana Development sum lo lutte a nihna tur dik taka hman a niha, kan ram hian changkanna kawng a zawh ve theih tawh kan nghakhlel. 5. Heng bakah pawh hian ṭawngṭainaa kan dil tel engemaw zat a la awm ang. 

Kan ṭawngṭai chhanna chu: Zoram kohhran leh mipuite ṭawngṭai chhanna chu MNF sawrkar hneh taka a lo tling ta hi a ni. Ṭhenkhatin kan dil ang chiah a nih loh pawhin Pathian hian kan dil ang thlap kherin min chhang lo fo tih hriat tur a ni. Chuvangin, mi puitling leh Pathian ringtu dikte chuan tuna kan sawrkar thar hi Lalpan kan rama kum 5 chhung rorel tura min pek a ni tih hi kan pawm thlap a pawimawh khawp mai. Party ruih chilh lo, rilru fim tak hmang thiamte tan chuan tuna kan sarkar thar hi kan ṭawngṭai chhanna a ni tih hi pawm a har lo vang.

Sawrkar lak luh ni aṭang rengin an thawm a mawi a, kan ram tana kan CM Pu Zoramthanga thahnemngaihna tawngkam han hriat te hi a va thlamuanthlak em! He sawrkar hian Zoram tan thil ṭha tih a tum ngei niin kan hmu a, an la thar bawk a, an thothang pawh a tha hle mai. Kum 5 chhung tha thlah miah lova dik taka hna an thawh zel chuan Zoram mipuiten inthlan leh hunah pawh kan thlang lal zel ang tih a rinawm. 

Sawisel mai lovin ṭawngṭai rawh: Tun hma aṭangin ram  mipuite leh koh­hran hote pawh kan tih dik loh fo thinna chu kan sawrkar hrawn reng rengte ṭawngṭainain kan thawhpui tawk lo hle thin a, chutih laiin a sawisel lamah erawh kan tuan a tha fu thin thung. Tun chinah chuan hetianga kan lo tih dan phung hi sim ila, kan ram hruaitute tana regular taka ṭawngṭai thin hi Krista ringtuten kan tih makmawh leh ram tana kan rawngbawlna pawimawh ber pakhat a ni tih hi i hre thar leh ang u. 

Pathian leh kan ram tan: Kan ram neih chhun zim te hi Siamtu Pathianin keini Mizote tan ramri fel taka khamsakin min lo pe a. Kan vela hnam dangte kal kanin Chanchin Tha hmangin min rawn zawng chhuak a, hnama chhiar thamah min din a. Hmasanga Tuipui Sen tikang chattu Israelte Pathian chu keini Mizote Pathian a lo ni ta! Chuvangin, he kan ram leh hnam hi kan Pathian duh dana kan kal chuan kan nghetin kan him ang a, thinlung taka Pathian leh kan ram tana beitute chuan hmun laili an chang zel ang. 

Ram leh hnam veng him tura mawh­phurhna: Ram roreltu tura mipuite kaltlanga Pathianin a ruatte hi, thlan tlin an nih rual khan ram leh hnam hmasawnna leh himna atana mawhphurhna chu an kovah a innghat nghal a ni. Kan ram leh hnam tichhe tura min beitu leh min nektu hi chhung lam leh pawn lam aṭangin an lo chhuak zel dawn. Ramri ven him a pawimawh ang bawkin a chhunga chengte nun phung leh sakhua humhalh a tul bawk. Tuna kan sawrkar thar pawh hian heng thil kan ram tichhe theite hi an hai lo va, hma pawh an la chak hle mai a, a lawmawmin a thlamuanthlak tak meuh a ni. Chung zinga langsar zual pahnih khat chauh, tun sawrkar tharin hma an lak mekna leh lak zelna tur nia langte chu:

1). Zu leh drugs: Zu khap bur bakah ruih hlo ngaite enkawlna lam pawh kan CM zahawm tak hian a ngai pawimawh hle mai a, a va lawmawm em! 

2) Citizenship Amendment  Bill leh Hindutva: Kan hnam nun leh sakhua thlenga min tichhe thei Hindutva chawisangtute laka kan ram leh hnam humhalh hi kan ram roreltute mawh a ni bawk. BJP kal tlanga kan ram rorelna fawng vuantute zinga tel ve an tumna chu hnawlin, Mizo mipuite chuan hneh takin, “Pathian leh kan ram tan” titu MNF party chu kan lo thlang tling ta a nih kha. 

Tunah hian Central BJP chuan NEDA(North-East Democratic Alliance) kaltlangin Mizoram hi anmahni lam tang sawrkarnaah an ngai thlap thung a. A tir aṭanga an thil  tum pakhat chu MP inthlan lo awm turah Parliament in hnih thunun thei tur khawp MP neih tam a ni. Mizoramah pawh NEDA kal tlangin BJP MP neih an tum thu Himanta Biswas Sarma, NEDA Convener chuan a sawi chiang khawp mai. Chutih  hunah chuan India ram constitution thlenga tihdanglam theih pawh an inbeisei niin an sawi. Indian Constitution hi chu ti maia tihdanglam ngawt chu thil harsa angin lang mah se, amendment hrang hrang hmanga secular ram kan nihna leh thil dangte hi tihdanglam theih loh a ni lo. 

Tin, tunah hei Citizenship Amend­ment  Bill, kan CM ngeiin a tawp thlenga dodal a tum lah chu Mizo mipuite chauh ni lo, North-East state ho zawng zawngte leh India ram chhunga hnam tlem zawkte duh dan palzutin BJP sawrkar chuan he Bill hi Parliament-ah an pass ta rup mai le!!  Tunah chuan keini ramah ngei pawh dan rual lohvin Chakmate India khua leh tui ni turin an lo lut ruih ruih thei tawh  mai dawn a ni! Heng thil hrang hrangte ngaihtuah hian kan  MNF sawrkar hi NDA/ NEDA aṭang hian inhnukdawk  nghal ngam  se a va lawmawm dawn em! 

US President Donald Trump-an, “Ame­rica First”  tia huaisen taka Ameri­ca mipuite tana hma a la ang hian, Pathian rin chhana “Mizoram first” tia hma la ngam turin kan CM leh a thawhpui, kan ram hruaitute hi mipuite hian kan beisei tlat dawn a ni. Chutianga kan ram hi min hruai ngam a nih ngat chuan, ṭawngṭaia kan dil chhuah kan sawrkar hi ṭawngṭaina veka theihtawpa lo support  hi kan intiam tlat dawn bawk a ni.