SCHOOL TIMING

Sikul kum tawp leh kum thar kan lo hnaih leh ta. Sikul kai dan hun, School timing tihdanglam tumna lam thawm a ri leh ṭan ta. Mi ṭhenkhat leh pawl ṭhenkhat ten tihdanglam an sawi mawi leh tak avang leh, Sorkar thar hian inthlan campaign laia an thutiam, manifesto-te an tihlawhtling thei zel dawn a nih chuan kan tidanglam leh ngei dawn chuan a lang. 

Eng pawh kan tih dan ṭhin kan thlak hian, tih dan ṭha zawk leh dik zawk dang kan hriat chhuah vang a ni ṭhin. Tuna sikul kai dan hun kan hman mek hi a hmaa kan kal dan aia ṭha zawk dawn ni-a kan hriat vang kha a ni ngei a. Mahse, engati nge tunah hmana kan kal dan kha a ṭha zawk a, kan duh leh zawk kan lo tih leh tak? Hmana kan thlak danglam dawn khan uluk taka zirchianna rintlak a lo awm lo em ni le aw...?! 

Ram pum leh Hnam pum, chhung tin leh mimal tin nghawng tur thil hi chu i ti mai mai ṭhin lo ang u. Hetiang thil lian thamah hi chuan kil hrang hrang leh tehna hrang hrang aṭanga mithiamten uluk taka an zirchianna rintlak leh, mipui ngaihdan te pawh hi a zau thei ang berin lak ni ṭhin sela.

Tuna sikul kai dan kan hman mek hi traffic jam tihziaawm nana tih kha a chhan deuh ber ni khan a lang a, a tiziaawm leh chuang lo nge, tlem chuan a ziaawm phah deuh e tih, tute emaw leh eng pawl emawin an zir chiang tawh em? A ṭhatna leh ṭhat lohna lam ngaihtuah chiang hmasa lova vote duh vanga thil danglam tih tur zawn hrim hrim vang mai tein sorkar hian thutlukna lian tham siam mai lo sela. 

A ṭha lo zawk tur­ah chuan mahni thutiam tawh pawh ti lo ngam sela, ‘Kan lo tiam tawh si a, kan han ti phawt ang e,’ an ti a nih pawhin, a enchhin leh zirchian hun chhung bithliah sela, chumi chhung chuan a zir chiang tura ruatten uluk tak leh taima takin zir chiang ṭhin sela, tichuan hmasawnna tur thil ṭha chu a lo lang mai ang. Tin, khawpui leh thingtlang lam hi angkhat veka tih chi pawh a ni lo maithei.

Tuna sikul kai dan hun mil hian chhung­kaw tam takin kan daily routine kan her rem mek a, ngaiah kan neih leh tawh deuh mai a ni. Tuna kan kal danah hian a ram pum ang hian mi tinte hi kan thawh hma phah a, kan hunte kan hman ṭangkai phah a. Mimal tin, chhungkaw tin leh ram pum ang pawhin economy lamah kan ṭhat phah zawk em? kan hrisel phah sawt em? tih te pawh hi mithiam zawkte khan rawn sawi teh u - sorkarin thutlukna a siam hma hian.

Thil tih danglam zin lutuk hi chu a ninawm a, a hahthlak a, inzir chawp thar renga awm chu hma­sawn thei lova ngai leh ngaia kual kualna a ni duh hle.