Kum thar leh moral reformation

Pathianni mai ni lo, ni tin duh tâwka inchei hnua kan han chhuakte hi kan nalhin kan rimtui veng veng thei hle mai. Kan in chhûng leh lirtheite pawh an mâwiin an nalh hlawm hle. Mahse, kan nun leh kan rilru erawh a mâwiin a rimtui ve si lo! Zofate kan buaithlâk êm êmna pakhat chu ringtu inti vek, Pathian thu hre êm êm vek, hun remchâng siamsak ni phei ila pulpit tlânga sermon thlâk thei vek tur, thil dik leh dik lo hre hrang vek tawh kan ni chunga rinawm tak leh dik taka thil tih âia dik lo deuha thil ti tlat zêl leh ti hreh miah lo kan ni lawi si hi a ni. A thu chauha kristian an tih ang chi kan nih avângin rilru puthmang siam ṭhat kan mamawh hle.

Rilru puthmang dik lo siam thar leh hi duh mah ila thil har tak, zu leh ruihhlo ngawl vei ang deuh hi a ni. A chhan chu rei tak chhûng thil dik lo leh ṭha loin kan rilru a lo chiah hneh tawh avângin. 

Tun hma chuan lirtheia kan intihpalhte hian hrehawm ti tak leh inthlahrung takin ngaihdam kan indilin kan inbawihsâwm ṭhin kha a ni a, tunah erawh chuan mihring emaw an thil emaw kan tih palh paw’n kan intlan bosan ta zel a nih hi!

Rilru puthmang dik loh chhan hrang hrang a awm thei ang. Pathian duh dân kan ngaih pawimawh loh vâng te, zirtirna ṭha kan zawm duh loh vâng te, internet leh kan chhehvêla mi thil dik lo leh ṭha lo tih kan hmuh leh hriat fo vâng te, nawmsakna kan duh vâng te, mahni hmasial vâng te, ṭhian ṭha lo kawm vâng te, awhna vâng te, châkna vâng te, mahni inenfiah nachâng kan hriat loh vâng te, zilhtu kan neih loh vâng te, zilhhautute zilhhauna kan ûksâk loh vâng te, thuawih loh vâng te, mâwl vâng leh a dang dangte.

Chhûngkua, kohhran, pâwl, zirna in, vantlâng punkhawm­na leh media hrang hrangah zirtirna ṭha tak kan dawng mawlh mawlh reng. Mahse, hêng kan ṭhatna tur leh felna tura kan infuihnate hi a dikin a ṭha hle mai tiin kan duh tâwk a, kan zawm duh chuang si lo. Hnial kan hrât êm êm ringawt. Fakna âiin sawisêlna thuziak leh thusawite hi kan lâwm zâwk a, mahni ṭha si lo leh insiam ṭhat tum chuang si lo hian kan ṭhatna tura kan insêlnate hi mi dang kan bel zung zung zêl. 

Kan dik lohna kan sawite hi bengkhawna insiam ṭhat ahnêkin a ṭhenin kan haw zâwk a, eng nge an nih bik, in nih bik, mi nunah inrawlh loh a ṭha tiin ṭha kan tih anga khawsak zui zêl kan duh zâwk avângin kan rilru puthmang a lo dik lo ṭhin a lo ni.

Rilru puthmang dik lo siam ṭhat nâna pawimawh ber chu Pathian thu awih hi a ni. Kan eizawn dân te, kan hna thawh dân te, kan sumdâwn dân te, kan thil tih dân hrang hrangte leh kan nun dân thlengin Pathian thu nên a inmil em tih hi kan ngaihtuah fo a pawimawh. 

Pathian duh dân kan ngaih pawimawh chuan dân kan zâwm ang a, kan duhâm lo ang a, kan rinawm ang a, dik takin thil kan ti mai dawn a lo ni. Tin, rilru puthmang dik lo put zahthlâkzia kan hriat a pawimawh. Dik lo leh mâwi lo taka thil ti reng chung sia kan zak miah lote hi kan insiam ṭhat theih loh chhan pakhat a ni.

Mimal leh hnam ze ṭha lo, thil tih dân dik lo tia kan sawite hi insiam ṭhat nâna hman hi thil pawimawh tak a ni bawk. Sêlna leh fuihna bengkhawn duh lote hi mi chapote an ni tlângpui. Mi fing chuan a bengkhawn a, a insiam ṭha mai ṭhin. Rilru puthmang siam ṭha tur chuan tum a ngai a, bul ṭantu nih a ngai bawk. Mi dang insiam ṭhat hun kan nghah chuan kan insiam ṭha ngai lo ang.

Cancer leh AIDS natna mai ni loin rilru hrisêl lo natna hian zofate min rûn mêk a ni. Ram tereuh tê, mihring tlêm tê, zahthlâk khawpa rilru hrisêl lo pu kan tam ta mai hi a zahthlâk. Kan lan dân leh ṭawngkamah chuan kan fel hmêl hlawm viau; nimahsela, chhûngril takah chuan kan ni leh si lo. Hetia kan sawi tâk avâng hian mi zawng zawng kan rilru a chhe vek tawh tihna a ni lo. Mi fel leh ṭha tam tak kan awm a, kan pun belh mêk zêl. Chûng mite chu kan ram damna an ni. 

Nikum krismas dâwn khan pa pakhat chuan a vawk vulh lai talhin Isua châwimâwi nân a thlâwnin mi a sem vek a ni âwm e. Naupang pakhat chuan a pa thi tawh hnêna silai lem a duh thu a ziahna lehkha them chu hmuin mi rilru ṭha 

ṭhenkhatten chu naupang chu zawng chhuakin khawngaih thilpêk an pe bawk a ni âwm e. Ṭhenkhatin an FB status-ah duhsakna thilpêk pêk âwm mi an hriat mai loh avângin an ṭhiante hnênah chutiang mi an hriatte chu hrilh turin an ngên a, Isua ropui nân thilpêk an hlân a ni âwm e. Krista ropui nâna thisen a thlâwna pete pawh an awm bawk. 

Naupang tam tak dawhthlâk tur leisaktu pawh an awm. Thinlung mâwi leh duhawm a va ni tehlul êm! He kum tharah hian rilru put hmang dik leh hrisêl neih i tum ṭheuh ang u.