New Year

Puanven i sawi chhing ang - Tawngthu chhe lovah chuan kumthar tih vel chu tlem a upa lam deuh tawh chuan ngaiah kan nei tawh mai thei, ṭhalai lam tan erawh a hlimawm dangdai hle mai. Kum kal ta lama che ṭha vak lo, kan hnathawhna/ zirnaah te emaw kan awm nualin ka ring. Tuarna phena malsawmna an tih ang deuh, indawmkun mai lovin, hma lam hun beiseina nen thlir tum zawk ta ila. Kawng awm theih dan tur zawk pawh a ni mah mah. Hetih lai hian lusun khawhar te tan pawh phur awm vak loh mai thei, ṭawngṭaina nen hmalam thlir tum ta mai ila a fuh ber awm e. 

Kum upa lam tawh te tan pawh ngaia nei mai lovin hmachhawp (new year resolution) te han nei ve ta ila, mi a ti phur phian mai thei asin. Pathian rawngbawlna lama tlema buaina, harsatna nei te pawn hmelmapan min thik, huphurh tih hriain ṭan ila sauh sauh zawk ang. NGO hrang hranga thawktute, engmah hlep leh hmuh nei lo mah ila, midangte tana kan thawh hnual chuang lovin hmalam i pan sauh sauh zawk ang. Mitin, a bik takin harsatna, buaina tawk mek te, taima takin i thawk zel ang, puanven i sawi chhing sauh sauh zawk ang. 

I support ang - Sawrkar thar ṭha tak kan nei leh ta. An rorel dan in a zir chuan Mizoram chu ram nuam takah a chang ang a, zir loh erawh chuan ram rethei kan ni reng mai dawn a ni. Opposition lam te kan ṭan a ngai, an tih dik loh lai leh hmuh fuh loh lai te kan thur chhuah zat zat a pawimawh, tih dik loh chan hrim hrim lam erawh thil ṭha ber a ni ang em aw... Sawrkar hnathawkte kan pawimawh hle, hmalakna hrang hrang rinawm tak leh taima taka kan thawh a ngai. Corruption, sum insiam etc.tih vel te hi chu tlanbosan ngam ila, mahni hlawh bak hi chu, ti deuh tlat thei ila a duhawm ngawt ang. 

Contract, supply, hnathawk ṭhinte pawh hlep hnem tum lutuk lo ṭhin ila, a mawi tawk hlawh theih chuan duh tawk mai ila a va ṭha awm ve. Party mi leh sate pawh hi sawi kan kai ve ṭhin a nia, i intithu lutuk lovang u. Mizote chu sum kan duh, hmuh theihna tur a nih phawt chuan ringtu ṭha tak emaw kan tih pawh hi rin aiin a khaw hawi a zim riau zel. Kan sorkar hotute kan chim nasa lutuk ṭhin te pawh hi insum deuh ila, tichuan, heti zawng zawk hian sawrkar support i tum ang. 

I uar zel ang - Krismas vel bawr lai hi chuan thilpek kan uar hle mai. Veng tinah, khaw tinah a ropui hle mai. Ṭanpui ngai, mamawhtute tan chuan a lawmawm ṭhin ngawt ang. Pathian zarah kum bul kan han hmang chho leh ṭan dawn a, chanhai, riangvai etc. te tan chuan a huphurhawm viauin ka ring. Lehlamah chuan China thufingin- I ṭhenawm sangha hmeh tir i duh chuan sangha pe suh, a man dan zirtir zawk rawh, a lo ti ve bawk a. Ni e, ṭanpuina pek reng ringawt hi a fuh ber lohna lai pawh a tam ve hle ang. 

Hetiang hi ni mahse, loh theih loh hi a tam ve khawp a. Entirnan, Synod hospital ang te, Aizawl civil hospital ang te pawh, damlo harsa tak tak hi rin aiin an lo tam thei hle a ni. Thilpek hi tam lua awm lo tlem lua awm lo a ni a, a nuaih tela pe chi te, sing/ sang tel ang chia pek te a ni hlawm. Home leh center kan neih hote pawh hi donation ang chi hmanga kalpui an ni hlawm. Pathian lakah hian thil ṭha tih kan chak hlawmin ka ring, mahse, han tih vak ngaihna pawh a awm chuang leh si lo. Bible-in a sawi dan chuan heng mi te ber te chunga in tih hian ka chunga ti in ni e, a ti. Heng ṭanpui ngaite hi Pathian aiawh an lo ni reng a nih chu! 

I chiang ang - Nikum Presbyterian sundesikul zirlai tir lamah khan kan zir nualin ka ring. Rin aiin Israel fate kha an lo inchhui nasa, a ṭul a ni ang, hnamah an chiang hle. Vai kan tih hote pawh hi an tia lawm, khawi hmunah pawh awm se, an vai ngan mai a ni, an ti. Israel fate pawh kha an inzirtir ngun em em- aw, Jerusalem, nang ka theihnghilh ai che chuan, ka lei hi ka dangah bet rawh se, te an ti hial a ni. 

Keini hi han sawi ve ta ila. Kan pi leh pute chu sawi loh, tun hma deuh te phei kha chuan fate hming pawh hre kim mang lo kan awm awm asin. Kan thlahtute hi kan hre tlem awm asin maw le, fing, fel, changkang, inti viau si hian. Kan ṭawngte pawh hi a thamral mek niin a hriat. I in chhung khur thil hming te kha han chik mah teh. Kan ṭawnga awm ve reng si, mahse ṭawng dang hminga awm tlat kha a tam riau a nia. Kan hriat loh kar hian chimralin kan awm mek reng a ni.

Kan tu leh fate hming kan han phuah te pawh hi hnam dang hming kan uar mah mah lo maw aw. A ṭhen te phei hi chu hai mai palh awl te pawh a awm, an ti. Eng pawh nise, hnama chian hi hmasawn nan, ringtu nun atan, etc. ṭul leh pawimawh tak a ni. 

Thu tlanglawn te te kan han sawi lang leh ta teuh mai, kumthar atana ngaihtuahna thar min pe theitu ni thei se a lawmawm ngawt ang. Han chik deuh ta ila kumthar kan han thlen tak pawh hi nakin lawkah chuan a hlui a lo ni leh mai dawn. Kan thlah liam tak pawh kha hman lawka a thar kan tih tho kha a ni. New year chibai vek ule.