Ka beisei loh ministry insiam dan

Keini vote khat nei ve che che hian MNF ministry a lo din chiah khan Cabinet Minister tur leh Minister turte, an portfolio turte thlengin Whatsapp lamah kan lo inrin siak ve nasa mai a. Keimah chang ni lovin kan ṭhian zahova MNF te ngei pawhin an ring dik lo ve nasa mai a, a chhan ni theite nen zeldin thubawl deuhva titi chhunzawm zel a chakawm a ni.

Chief Minister hian minister a ruat dawn hian party mi pawimawhte a rawn nge rawn lo tih hi inhnialna hmasa ber a ni nghal phawt a, a rawn a nih pawhin Pu Tawnluia leh Pu R Tlanghmingthanga chiah hi a rawn ni ngeiin a rin theih a, tuna an inrem dan en hi chuan Pu Tawna nen an ruat a nih hmel. 

Deputy Chief Minister Pu Tawna’n Home Department a enkawl lo hi in­tihhniam tumna lam ni lovin a taksa chak tawk loh vang leh a kum upat tawh vang a nih a rinawm. 

Chutah tak chuan Dr R Lalthangliana hi Home Minister ni awm tak zawk a nih laia Pu Lalchamliana zawk Home Minister a ni ta hi ‘vangvat kai’ a nih vang nge, Pu Zoramthanga chawlh hnuah Pu Thangtea lo lian tur dan tumna zawk? tihte hi kan sawi dan a ni a. Chhim lam tana lungawi thlak loh tak chu Pu Zorama, Pu Tawna dawt chu Pu Thangtea a nih hmel tawh nen Home Ministry hi Pu Chama kutah an dah daih a ni. 

Pu Lalruatkima hi Cabinet Minister ngei tura rin a ni a, hei hi chu a chiang sa tluka ngaih a ni. A chhan chu MNF kha Pu Ruatkima hi awm lo ta se 2013-2018 inkarah khan an ral ti tih thei ang khan an lang hman a, Pu Ruat­kima awi nun hi a ni. 

Cabinet a chang lo hi amah chu chhungril takah a lungawi lo ngei dawn a, a chhan chu ‘seniority’ anga kalin Lalchhandama Ralte hnungah an dah a, mahse party seniority en ta se Pu Lalrintluanga Sailo (vangvat kai ngei) pawh Minister of State chang phak lovin hman ni lawka MNF ve det det kha minister te an nih tir leh bawk si a. 

Pu R Lalzirliana Cabinet Minister a ni a, Pu Lalrinliana Sailo Speaker a ni a, Pu Ruatkima Minister of State maia an dah hi chu kan ṭhianho rin loh dan a ni. 

Tin, Lalnuntluanga a han Minister nawlh mai pawh kha kan rin loh zinga mi a ni a, a hre chiangte chuan Pu Zorama ukul a nih bakah a pa hi MNF Block hruaitu hlun a ni a, Champhai lam mi, khi lam aiawh tura an dah angin an sawi. 

Ṭhenkhat chuan Lunglei lamin Cabinet pahnih an chan avangin Champhai vuivai lohna tur tiin an sawi ve bawk. Eng pawhnise Minister tharte hi duhsakna sang ber ka hlanin kumthar chibai ka buk ṭheuh a ni.