TUIZEM SEM POLITICS

Tun hnaiah AMC inthlan vuakvetah tuizem sem a lar hle a, a dawngtu chhungkaw tan a lawmawmin, hmalakna ṭha tak a ni. Tuizem sem hi AMC inthlan campaign nan an hmang em ni? tih mai turin veng ṭhenkhatah chuan AMC candidate-te sem tir an ni a, ruling party unit te pawh an phusa hle a ni awm e. 

Mipui chhiah pek tling­khawm hmanga hma­laknaah hian MNF AMC candidate te leh an Unit te hian inrawlhna tur pakhatmah an nei lova, thuneihna hmansualna tenawm tak a ni zawk. A dawngtute an lawm­puiawm a, mah se, party fund ang maia mipui sum hman a, campaign-na ang thawthanga mipui chhiah pek tling khawm kan sawngbawl duh hian kan politics chhiatzia a tarlang chiang hle. 

Chhiah lak hi sawrkar sum tuak ve dan leh sum hmuhna ber a nih thu kan Chief Minister ngeiin Assembly House-ah a puang chhuak a. Chhiah petu chu mipuite kan ni a, khua leh tui ṭha chuan ṭha takin chhiah a pe tur a ni, chhiah kan pek aṭanga eng emaw zat chu kan tan bawk rawn kir lehin, khawtlang leh ram hmasawnna leh tihchangtlunna tura hman a ni ta ṭhin a ni. Hei hian tun hnaia AMC tuizem sem kha MNF party hmalakna ni lovin, mipuite chan tur dik tak, mipuite thawhkhawm a ni tih a tilang chiang hle zawk a ni. 

I tuizem dawn avang khan MNF party hnena i vote hlu tak pek kha i ba lova, i chanpual liau liau a ni. I chanpual liau liau chu inthlan dawn ṭepah tlai takah an rawn pe chauh zawk che a ni. Tuizem i dawn avanga i vote an rawn beisei a nih ngat phei chuan, i chhiah pek ngei hmang khan lei an tum che tihna a ni a, an hmusit hle che tihna a ni. 

Mipui hnena tlaktlum duh avanga central aṭanga sum hailut thei bik riau anga insawi, a tak taka han chhui dawna belhchian dawl leh si lo te  pawh hi tuizem politics nen hian a politics hniamzia a inang deuh reng a tih theih awm e. Chung zinga pakhat chauh chu han sawi ila, ni 18.12.2020-a MNF-in an thu chhuaha SYS Dept-in state sum 2019 aṭanga la hmang lo anga an insawi hi dawt chiang bal a ni. 

2019-20 Supplementary Demand-ah khan nuai 1796.35 zet SYS khan a dil belh a, nuai 144.84 kha Central (CSS) niin a dang zawng nuai 1651.51 kha state sum ngei a ni bawk. Chu mai a ni lo, CSS nuai 144 aṭanga nuai 50 phei hi chu central aṭanga Social Welfare sum dawn tur State Games atân an pawh pen a ni nghe nghe. 

Tin, SYS tân hian SEDP aṭangin nuai 519.60 zet dil belh a ni a, heta ṭang hian infiamna bungraw leina atâna nuai 90 an hman te, an hmai uân-pui êm êm Leisekawt Field siamna leh bang remna atâna nuai 245 an hman te, Sakawrdai Mini Sports Complex atana nuai 21 an sen leh N Vanlaiphai Football Field Pavillion sakna nuai 50 zet an dil belha an hman zawng zawngte kha a hranpaa an hai chhuah ni lovin SEDP sum vek a ni. Heta ṭang pawh hian central aṭanga sum hailût thei bik riau anga kan Sports Minister a insawi ṭhin pawh hi mipui bumna mai a ni tih a chiang hle. In vengah AMC inthlan denchhena eng eng emaw a rawn tiam a nih pawhin ngaihdan chin tawk lo thiam ila a ṭha awm e. 

Politician-te hian an vote duh luata mipuite hnenah thu dik chanve leh dawt hrilh hi sim rawh se, politics hi thil ṭha ti tura intlansiakna a ni a, dawt insawi siakna emaw, lemchanna tur emaw a ni lo. 

- J.Lalramnghâka (Jeru-a)