Sangha man ve a chakawm part 2!

Nikum, December 17 khan Vanglaini chanchinbu lamah hian Pu Zoramchhana tih khan "Sangha man ve a chakawm" tih thupui a hmangin thu ngeiawm angreng tak ni thei, a lehlama bengvar thlak tak a rawn ziak a. Ka kha a part 2 ka rawn tui nih ve dawn a ni - ngaihtuahna sen a ngai e. 

"Mamit lama kan MLA zahawm tak pakhat chuan Mamit leh Phaizau khuaa MNF party hruaitu ṭhenkhatte nen Tut luiah, Phai­zau khawtlangin an humhalh huam chhungah lehnghal bomb hmangin sangha an man e, an ti a. 

Sawrkar Depart­ment ṭhenkhatin an bawhzui thu te, Police Station-ah FIR thehluh a nih thu te, Court lamah pawh complaint thehluh a nih thute kan hre leh zel a. 

Phaizau khawtlang pawhin press release meuh siamin an puangzar tawh a nih kha.... 

Luia nungchate, a bikin sanghate pawh lên leh lênkhang te, nghakuai leh lungrem hmangte bak chuan kan man duh tawh bik lo a; bomb hmang phei chuan kan bei ngai meuh tawh lo. Bomb hmanga beitute hi chu khaw­pui lam mi an ni deuh zel tawh asin. 

Kan MLA zahawm takin a zahawmna bosal ṭhaka a ṭhui­hruaite nen bomb hmanga sangha an man mai hian kan ngaihtuahna a tikal thui hle mai. Sawrkar dan kalha dik lo taka sangha an man tih a chiang a, thlalak nen lam a darh chung pawha hrem an ni lo a nih ngat chuan, kan entawn lo thei dawn lo; sangha leh nungcha dangte man kan inthlahrung duh tawh bik kher lo ang. 

"Min lo hrethiam dawn nia, sa kan ei ve châk tho alawm. Mahse, bomb hmang kher kher chuan kan man ve lo ang," tiin a rawn ziak a, hei hi ka tui hnih ve duh tak chu a ni. Khawtlangin an humhalh lai luia sangha an man kha a pawi lungrun tawh a, khawtlang zah­lohna lian tak a ni phawt. Chu chu ram hruaituin a tih miah loh tur a ni phawt a, chu aia la pawi chu bomb hmang kher khera sangha an man kha a ni leh a, kha kha a pawi em em a ni. 

Bomb hmanga sangha man hian an sangha khai chhuah theih chauh a that lova, sangha thi tam tak an hawn si loh a awm dawn a ni. Tin, luia nungcha dangte pawh an thi ve ṭeuh dawn si a, chu chu kan MLA zahawm tak leh a ṭhiante hian an dawn kim lo em ni le? 

Kan khaw lui humhalhah hian miin dan phal lohvin sangha rawn man ru dawn pawh ni se bomb hmanga an man loh chuan a hriatthiam theih dan dan a la awm ang. Ram hruaitu berin bomb hmanga sangha an man chung pawha sorkarin a hrem si loh chuan ṭhangthar zingah bomb hmanga sangha man hlauh­lohna a lo pian phah thei si a. 

- K Vanlalruata, Champhai