MNF SORKAR FAKAWMNA

Mipuiin kan duh ber an ni hlawm ang a, hei MLA 40 chu kan thlang tling a. Tum dang ang lo takin mithar pawh 20 ngawt kan nei a ni a, mimal ang tak pawhin beiseina pawh a sang hlawm viau. India Constitution angin kum nga chhung mipui aiawha ram rawngbawlna hna thawk turte an ni a, an thiltih apiang chu a langsar tawh bik a ni. 

Pu Hawla kha kum 21 vel zet Chief Minister a ni a, a hun hnuhnung lam phei chu a ṭawngkam a mawi lo sawtin amah ngei pawh a inthlahdah tih a hriat a, sawi zui pawh a hlawh hle. Tunah MLA a han ni ta lo a, awmdan a thiam lo viau maithei a, a piangthar hlauh maithei bawk. A lehlamah chuan a kum a lo upa deuh tawh bawk a, heti hian a hun tawp a hmang ṭan der pawh a ni thei tho. A ngaihawm kan ti dawn nge hnara hlit phawi ang huai kan ti zawk dawn? 

Rorel thei turin MNF chuan MLA 26 an nei a, Dec ni 11-a vote chhiar a nih khan a ni la lain sorkarna siam thei dinhmuna an din thu a hriat nghal. Tichuan MNF Party a tling te chu inhmukhawm nghalin Legislature Party an din nghal a, Leader atan Zoramthanga a ni a, Dy. Leader atan Tawnluia niin Secretary atan Lalruatkima a ni. Hemi aṭang hi chuan hunawl nei hman miah loin sorkar hmasa Congress ten NEDP hna atana Work Order an lo pek tawh chungchang chu ngaihtuahna neih a niin ni 11 Dec. 2018 niah chuan LAD Director chuan order chhuahin NEDP hna atana work order la tawh, hna la ṭan lo zawng zawng te chu hna khawih lo turin tih an ni ta a. 

Hetiang hian MNF chuan sorkarna fawng an chelh hma hauhin thu leh hla an han nei ṭan nghal a. A tuk, ni 13 Dec, 2018 ah sorkar thuchhuak dang hriat a ni leh a, Finance Department aṭangin Administrative Dept leh Department hotu lu zawng zawngte lehkha thawn a ni a, work order, supply order, expenditure sunction leh budget allocation zawng zawng chu thu leh awm hma chuan tihtawp a nih thu hriattir an ni. Hei hi September thla a Congress sorkarin UD & PA aṭangin work order 826, VBC. 19.44 man, MSSC-in work order 81, vbc. 26.40 man, LAD aṭangin 216 - vbc. 3.6 man, leh RD aṭangin BADP hnuaiah work order 81, cheng vbc. 8.3 chuang man an pechhuak a, heng work order te hi 1,204 lai niin cheng nuai 5, 773.82 man hu zet a ni. 

He thil hi thil lian tham tak a ni a, nghawng pawh a neih len hmel viau. MNF MLA te hian sorkarna fawng an chelh hma hauhin heti hian an thuneihna an hmang nghal a ni a, a lawmawm zawnga ngaih tur nge ni anga thuneihna hmang hma deuha ngaih tur? - Dec. 15 ah swearing-in neih a nih chauh kha. Ni 18 Dec. a Cabinet meeting chuan Section 22 (I)(b) of The Mizoram Liqour (Prohibition & Control) Act, 2014 hmangin sorkar Department hmuna zu zawrhna hmun 9 chu a cancell bawk. Chung zu zawrhna hmunte chu:-

(1) Commandant 1st Bn. M.A.P

 (2) Commandant 2nd Bn. M.A.P 

(3) Commandant 1st IR Bn., Mualvum 

(4) Commandant 2nd IR Bn., Khawzawl 

(5) Commandant 5th IR Bn., Lungverh 

(6) Commandant General 

      MRHG & CD, Chawlhhmun

(7) Managing Director ZIDCO Ltd.

      Mizoram, Aizawl

(8) Managing Director, MAMCO Ltd. 

      Mizoram, Aizawl 

(9) Managing Director, MIFCO Ltd. Mizoram, Aizawl te hi a ni.

Hei hi campaign lai aṭang tawha tlangaupui niin zu permit tih tawp hi an lo tum sa reng a ni a, hna hmasa atan heti hian sorkar enkawl bik zu zawrhna hmun 9 te chu an permit cancel an ni. 

A tuk leh mai, December ni 19 ah pawh chuan SSA & RMSA hnuaia thawkte hlawh 2018 - 19 atan Rs. 3, 506. 00 lakhs zet chu pek chhuah turin order an chhuah leh bawk a ni. He cheng nuai 3,506.00 hi SSA leh RMSA hnuaia hnathawktute thla thum hlawh niin sorkar hmasain a pek mai theih loh a ni. Hetiang hi a detail tak chuan a ni:- SSA hnuai-ah UPS teachers - 1643; LPS teachers - 550; Instructors - 814; RC Staffs - 326; CRC - 171 Resource Teachers (IE) - 26 te an ni a, heng bakah hian Hostel 11 a thawk te, special trainer-te leh Office staff engemawzat an awm bawk. RMSA hnuaiah hian Headmaster - 92, Teachers - 506, Special Teacher (IEDSS) - 45 an awm. 

Sorkar hnuai a mi ni lo mimal zu zawrhna hmun 44 te  pawh Dec. 21 aṭangin Jan 14th thleng khar vek turin order chhuah a ni bawk a, Assembly hmasa berah zu khapna dan pass a ni ang tih a ni bawk. Bawngkawn lamah kawngpui chul mam a ni mek bawk. Hetiang hian sorkar thar chuan hma a la ṭan der tawh a, Christmas boruakin min nangching ta zawk mai pawh a. Kum thar lamah pawh hnathawh an neih thuai beisei ila; Zoram mipui tan hna han thawk tak tak teh se. Chutah chuan MNF sorkar hian Zoram siamṭhat an lo duh tak tak leh duh tak tak loh chu kan hre tawh ang a, an inzawrh laia an thutiamte pawh tihlawhtling thuai turin beisei bawk ang u.