Thla khat la tling lo sawrkar

Mizoram sawrkar, MNF President Pu Zoramthanga kaih­hruai chu thla khat pawh a tlin hmain thutlukna leh hma­lakna hriat tur a awm ta nual a, mipui tana 

ṭha tak tak pawh a awm chiang mai. Chutih rualin, ngaih ti ṭha lo deuhtu pawh a awm ve tho bawk awm e.

Kan hriat angin, MNF sawrkarin hna an thawh tirh phat aṭanga hmalakna thâwm ring leh mipui bengverh ber chu - zu zawrh chung­changa an thu­tlukna hi a ni âwm e. 

Kan hriat angin, Cabinet meeting hma­­sa berin zu zawrh chungchangah thutluk­na thar siamin, sawrkar agency ṭhenkhata zu zawrh chu an titawp nghal a, zu hralh chhuah a nih loh nan ni 25 chhung vel dry day an puang nghal bawk a. Tun January 10-a Cabinet meeting vawi hnihnain dry day chu ni 55 dang atan a puan belh leh bawk.

Kumin January 10 khan Cabinet meeting chuan thutlukna lawm­awm tak an siam leh a; chu chu, blood processing fee lak tihtawp a ni. Hei zet hi chu a lawmawm tak zet mai. Sorkar thutlukna ka fak tak zet zet e.

MNF sawrkar thara langsar dang leh chu, Aizawla kawng chhâwng siam bawhzui thu a ni. Aizawla kawng chhâwng siam chung­chang hi kan Chief Minister hian a tuipui hle a, nikuma Mizoram inthlanpui neih hma leh campaign lai aṭangin, MNF hotute leh candidate dangte'n an sawi ve miah lo (?) chung pawha a tuipui leh a sawi tam a ni. Chungte vang chu a ni mai thei, CM Pu Zoramthanga chuan, CM a nih aṭanga chawlhkar hnih pawh a liam hmain a bawhzui a, Aizawl hmun 

ṭhenkhata kawngpui pêngṭhuama kawng chhâwng siam dan tur a en chûk chûk a nih kha. Pu berin a tuipui miau a, a la hlawhtling mahna.

Chanchin thara kan hmuh angin, CM-in kawng chhawng siamna tur a en kualnaah hian consultancy firm pakhat, NPEC Con­sultancy hotute an tel ve a. Engti tiha tel ve nge an nih hre lo mah ila, rilruah zawhna erawh a awm.

Kawng chhâwng chu siam lo ni ta tak tak se, NPEC chuan plan leh drawing te an siam dawn tihna a ni em? Kawng chhâwng chu an siam dawn tihna a ni em? Ni ta se, tender chhuah loin consultancy firm an ruai mai dawn tihna a ni em? Nge, an lo ruai ṭan reng tawh zawk? Tender chhuah loha rawih ni ta se, pu ber hian a duhsak bik em vanga koh leh rawih an ni ang em? Corruption a inṭan nghal der tihna a ni em? Rilru-ah zawhna, chhan mai theih si lo a tam hle.

Sawrkar thar hma­lakna hrang hrangah hian, a thuneitute rinhlelh hrim hrim lam ni loin, mipuite'n beng kan chhit a, mit kan lên reng a ngai awm e.