Ram hruaitu lehkha ziah sak tih kha...

Vanglaini November ni 15 a chhuak, "Ram hruaitute lehkha ziah sak kha a pawi" tih thupui hmanga K. Lalduhsaka thu rawn ziah kha tlem han sawi ve ka duh a. Minister chauh lo pawh MLA te party hruaitute, VCP, Local Council Chairman te pawh hian lehkha an ziak ṭhin a. Politician kher lo pawh sawrkar hnathavik officer te, YMA te, MZP leh MSU te, MHIP Ieh MUP etc. te pawhin recommend-na hi an ziak ve fo mai. 

Sorkarah pawh ziaka thil kal vel hi sorkar hna kalphung a ni. Block leh Unit level-ah pawh ziaka recommend pek chu tih dan phung pangngai a ni. Eng Sorkar pawh hi piang se, Minister-in recommend a pek lohna Ministry hi a awm ngai lo vang. Education Minister Pu Lalchhandama Ralte-in 'Ka duhsak no 1', "Ka Iptepui banna" tih pahnih khat a lo ziak chu kan ngaimawh hle mai maw. 

Education Minister hi a thuziakah hian a hawihhawm ka ti ngawt mai. "Hei hi lak ngei nise" emaw "Hei hi lak ngei tur a ni" te han ti se a thu a dengkhawng a, a lo dawng­sawngtu tan a nuam lo thei. Minister duhsak no 1 chu lak ngei a ngaih hmel a, la ngei se a duhna ṭawngkam erawh paidam a nuam deuh. "Iptepui banna" tih hi politic-ah chuan thil thar a ni lo. 

Politician zawng zawng hian iptepui banna an nei vek. Sorkar hnathawk bial fang leh official tour nei te pawh hian iptepui banna an nei duah ṭhin. Politician tam tak hian an Party mi leh sa ni kher lo pawh Iptepui banna tur an zawng thiam hle a, tifuh ngial ngial pawh an awm. Miin Iptepui banna a hman chhan chu vote an duh vang a ni a, eng kawng emaw taka chhawr ṭangkai a, lamṭanga siam an duh vang a ni ber. Iptepui bannate na na na chu a nel pawh an lo innel a, an tlin pawhin tlin loh pawhin an inchhawr tawn nge nge ṭhin. 

Pu Chhantea'n Iptepui banna a theihnghilh lo hi a fakawm thlawt. Inthlan campaign laia a tihbuai chhungkua, a tlin loh hlauva phe dawr dawr, ei leh in leh mutbu te, a thawmhnaw bal chena lo suk sak diamtute hi hlamchhiah ta se dem tur zawk chu Pu Chhantea hi a ni ang. "Ka Iptepui banna" tih hi ṭawngkan hawihawm tak, thu pe tak si a ni a, a van han ril e aw. 

Mi 91 zet zirtitu laknaah ram khat lu ber Chief Minister-in pakhat emaw leh a changtu Minister-in pahnih emaw lek an recommend ve a. CM leh Education Minister-te hian uchuak takin thil an ti pawh a ni lem lo, Minister-te chuan recommend-na te chu an ziak ve ang chu. Engmah ti thei lova an kut phuar tlat tumna hi thil dik a ni lo. Minister-te recommend-na 2/1 lo lang hian zirlaite rilruah hnualna leh a ṭha lo zawnga hna a thawh chiamna a lang lem lo. 

Minister thuziak a ruka thla lo la a, sorkar kalphung pela social media a vawrh darhtu hi a dik lo ve zawk. 

- Varthanzama, Republic Vengthlang