JUMBLE SALE

He thu hi i hmuh aṭangin, i rilruah thawmhnaw hlui sale a ni tih i hriat nghal ka ring. Mizoramah chuan Inrinni hi sawrkar pisa chawlh ni a ni a, a tuk Pathianni a nih avangin mi nawlpui Bazar ni a ni. Bazar tura i kal chuan kawtthler lûn laiah, Jumble Sale an awm ang. Kan intihmuh a, hetianga thawmhnaw hlui hralh hi a hlawk a ni ang chu sum tuak nan kan sale ta mawlh mawlh mai le! 

Kohhran emaw 

ṭhianho emaw college a zirlaite’n sumtuakna atan hman kan intih hmuh tlat. Chhungkaw tam deuh thawmhnaw uar deuh tan chuan, he Jumble Sale hi pawl hrang hrang 

ṭanpuina atan emaw thawmhnaw hluihlawn nan a hmanraw ṭha tak a ni ve phawt mai. 

Jumble Sale hi thawmhnaw ṭhat dan a zirin pakhat Rs. 100, Rs. 50 leh Rs. 20 thlengin an zuar ṭhin a, a hahthlak rualin ṭhianho emaw pawla inhmangho chuan thil hlimawm ni si, pawl sumtuakna ṭha tak ni bawk si, hlawk bawk si a nih ka ring! 

Jumble tih thumal hi a tirah chuan verb (thiltih sawina) anga hman a ni. Chu chu kum 1520 chho vel khan 'awmze nei loa phusa' tihna a ni. Kum 1540 a lo her chhuah leh chuan a lo danglam leh hret a, 'phusa nuai nuai emaw awm nuai nuai' tih nan an hmang leh a ni. 

Kum zabi 17 naah phei chuan 'mipat hmei­chhiatna hmanpui' thup deuh hlek a, sawi nan an hmang bawk. Awmze dang dang sawi nana hman ṭhin a ni. 

Pu J.F. Laldailova fam Dictionary-ah chuan, Jumble Sale: n. ‘mi rethei ṭanpui nâna nepnawi khawn khâwm zawrhna’ tih a ni. Mizoramah erawh mi tam zawkin Jumble Sale kan kalpui dan hi a dik tawk lo. Jumble tih thumal hi chawhchawrawi tihna mai a ni a, Jumble Sale tih awmzia chu thil chi hrang hrang zawrh chhuah tiin kan hrilhfiah ang e. Saṭawng Dictionary lar tak, Oxford Dictionary chuan Jumble Sale hi ti hian a sawifiah: A sale of miscellaneous secondhand articles, typically held in order to raise money for a charity or a special event; a rummage sale.

Jumble Sale tih awmzia tak chu mi retheite tana sumtuakna tihna a ni ber. Ram changkangte thil chin ṭha, kan intihhmuh a, a lawmawm viau rualin kan ramah erawh pawl tam zawkin inhlawh nan, sum tuakna ṭha tak alawm tiin thawmhnaw hlui kan zawng khawm a, kan sale ta chur chur mai ṭhin a nih hi. He Jumble Sale kawh tum, mi rethei ṭanpui nana Jumble Sale huaihawt kan nih chuan a kawh tum kan tihlawhtling mai tur a ni. 

Jumble Sale hi mi tam zawk hian sum tuak nan kan hmang tlat. Hei hi inhlawhna a ni lo a, mi retheite ṭanpui nana thil lakkhawm zawrh chhuah a ni. 'Jumble Sale' awmze dik tak leh a hmanna turah hian hmang ila, a va duhawm em. 

Ram changkang zawkte thil ṭha tih kan entawn ta rau rau a nih chuan Jumble Sale an kal pui dan mi retheite ṭanpui nana kan sale aṭanga sum kan hmuh chhuahte kan pek chuan a va ṭha lehzual dawn em.  

- Vidpuia Hrahsel