Republic Day Boycott thuh leh Amit Shah pawndum sin ṭhulh

Mizo ka nihna anga ka thinlung min khei tlattu thil pakhat a awm a, a ni, thil pahnihin a ni min kap tlat ni. Pakhatna chu Citizenship Ammendment Bill duh loh vanga kumin January 26-a Republic Day boycott tura All NGO Joint Committee an inring vek tawh hnu ṭhulh tir an nih dan kha a ni a, a pahnih lehna chu Union Home Minister Amit Shah lo zin CAB duh loh vang bawka All NGO in pawndum nena lo hmuah a tum thu an ṭhulh leh kha a ni. 

Khami pahnih kha lo ti puitling ta ni ila chu tuna Parliament thlasik ṭhutkhawma CAB sawiho tur pawh hi a ram pumin kan ngaihven ang a, eng ang pawhin min pass khum pawh ni se he rama cheng Mizote hi chuan CAB kan pawm lo tih hi India hian a hre tur a ni a - phengphehlepa khua a tlai zo ta si. 

Mizote tluka khawtlanga inawpna nei ṭha leh an thu kan zawm tlan tur pawl zahawm nei hi an awm love, tiin kan mithiamten tun hma khan an sawi ṭhin a, kan YMA ang leh a thlukpui hi eng state-ah mah a awm ve lo an tih ṭhin kha ka la hre reng. Chu YMA chu politics lamah chuan ṭan lam nei lo a ni ṭhin a, chumi awmzia chu ṭan loh lam pawh a nei lova, hlauh bik pawh a nei lo tihna ni tur a ni. January-a Republic Day boycott tum vek tawh ṭhulh leh a nih dan kha chhui chhuah ni ta tak tak se, tunge mawhphurhna la ngam ang le? 

Vawi khat tih sualah kan in siam ṭhat loh chuan a vawi hnihna kan tih sual leh chuan miin kan chungah rinna an nghat ngam tawh dawn lo. CAB hmui pui pu leh a au ring ber Home Minister Amit Shah a lo zin a, "CAB kan kal pui leh dawn," titu BJP-a an President leh thluak bur ber nia hriatin an sawi a, chu chu Mizo Pawndum nen mai khan lo hluak ṭhap ila, an thil tum an sut emaw sut lo emaw chu ka sawi thei lo; mahse kan duh loh thu kha chiang takinhre ve se a ṭhat nen, Pawndum sin kha kan han ṭhulh leh ta rup mai a. Kha kha kan hotute khan a ṭhatna an hria a ni chek ang a, tun thleng hian kei chuan ka la ui. 

Sapṭawnga, "Sorry, you missed the bus," an tih zawng zawng hi Mizote hian kan hotute zarah kan chang ta niin a lang. Ka ui vawng vawng. 

- Lalramnghaka, Dinthar