CYMA Kumpuan leh NIT Mizoram

Central YMA khawmpui lianin kum 2020 hi “Zirna Uar Kum”-ah a puang a, zirna kawnga kan zirlaite an tlakhniam sawt dan enin thil lawmawm tak a ni. CYMA meuhin hma a lak chuan hmasawnna kan hmu ngei ang. CYMA in “Zirna Uar Kum” a puan chhan ber chu All India Service leh Central Service lamah Mizo kan lan theih tak meuh loh vang a ni ngei ang a. Kan hnam dinchhuah nan thil pawimawh tak a ni reng a ni. Amaherawhchu, helamah chauh hian hma lak ngai emaw kan ti mai ang tih a hlauhawm hle. 

Field hrang hrangah hma lak kan mamawh hle. Entir nan - Medical College kan neih ve - Zoram Medical College hi han tilian tak tak dawn se chuan hna sang thawk pha, medical lama mithiam kan la nei mumal hauh lo. Chutiang zelin field dangah pawh mithiam sawi tur kan la nei chau hle. Vanneihthlak takin zirna tluang pangngai (ti mai ila) lamah chuan University ṭha leh hmasawn chak pawl tak - Mizoram University kan nei hlau hi a lawmawm tak zet a ni. 

Hmanhmawh taka hma kan lakna tur pawimawh tak pakhat chu NIT Mizoram dinchhuah nana hmalak hi a ni ngei ang. NIT hi zirna hmun (Institute) changkang bika ngaih a nih avangin ‘NIT ṭha pangngaia zirchhuakte chuan hna hmuh loh a awm lo’ tia sawi theih hial a ni awm e. India ram chhung mai ni lo, foreign countries-ah pawh hna hmuh a awlsam hle. Chuti taka institute ṭha, kan khawpui daia rawp ral ṭep lawi si hi a dinhmun leh a harsatna tawh mek i lo en teh ang. 

NIT Mizoram hi Ministry of Human Resources Develop­ment, Govt. of India-in Dt. 30.10.2009 leh Dt. 3.3.2010 a order a chhuah - India ram hmun hrang hrangah NIT 10 din tura tih a nih angin kum 2010 khan din a ni a. NIT leh IIT hi India Parliament meuhin Institute of National Importance-a a dah bik an ni a, NIT hi India ram pumah 31 chauh a awm a ni. Chuti taka Parliament pawhin a ngaih pawimawh ni si, NIT Mizoram hi a dinhmun a chhe hle mai a, khawtual mi pawhin India rama zirna ngaih hlut leh duat bik kan nei tih hi kan hre hlawm hrih lo a ni awm e. 

NIT, Mizoram hi Lengpui-a an Campus nghet tur pawh Dt. 13.10.2012 khan Shri Kabil Sibal, khatih laia  Union minister of Human Resource Development, Communication and Information Technology, Government of India-in a lungphum pawh a lo phum daih tawh a ni. 

Mizorama NIT kan neih ve hi chu hmasawn lam pan loin a rawih chhe mai ang tih hlauhawmin a awm ta. NIT Mizoram awi nung leh tur hian anmahni maiin an sut kian theih loh harsatna lianpui mai an lo nei reng mai a. Lengpui-a an campus hmun tura ram pek dan hi a lo fuh tawk lo va, an campus develop tura hma an han lak chiah chuan harsatna lianpui mai an tawng ta. Mizoram sorkarin ram a pek hi Notified Riverine Reserved Forest area a rin luh a lo nih avangin hma lak phal a lo ni hauh lo mai a. Hma la thei tur chuan India sorkar-in Riverine forest area a a puan hi suttir leh phawt a ngai a ni. Chumi tihfel a nih chuan building leh an mamawh hrang hrang din nan hian sum leh pai lamah harsatna engmah awm tur a ni lo: a hmanna tur taka hman a nih phawt chuan. 

NIT Mizoram tihmasawn tur chuan institution-a a hotu ber - Director tling leh ṭhahnemngai, khual khua aṭanga rawn thawk mai mai lo neih a pawimawh hle. Hei erawh hi chu Riverine Reserved Forest area a puan a nihna hi sut a nih phawt chuan hma chak takin a lak theih dawn avang leh a hmun hi Airport bul mai, hahdam leh awlsam taka thlen theihna hmun a nih avangin Director ṭha neih hi a har hauh lovin a rinawm. 

Sawi hram chakawm chu NIT ṭha nei tura STAM hmalakna hi a ni awm e. Anni hian NIT hi Thenzawl-a dah tura tih a nih khan, awlsam taka mithiamin an tlawh zung zung theihna tur hmun - Lengpuia dah a ṭul thu leh Thenzawl chu Agriculture and allied subjects hmunpuia khek zawk a ṭhatzia sawiin press meet te an lo nei tawh a. An General Conference-ah pawh vawi hnih lai NIT Mizoram hmasawnna tur hian theih ang anga hma lak ni se tiin an lo passed tawh a ni. 

Lengpui-a NIT Mizoram lung phum a nih ṭum pawh khan sawm an nih angin an lo tel a. Kum 2015 pawh khan NIT Campus, Lengpui rama hmalakna hi uluk takin an lo en tawh a ni. Amaherawhchu, sorkar level a hma lak a nih loh chuan NIT Mizoram harsatna hi a lian em a, NGO pakhat mai tan chuan tih ngaihna tak a awm lo a ni awm e. 

CYMA meuhin a buaipui erawh chuan sorkar pawhin chak taka hma lain, NIT ṭha tak, kan ṭhalaite tana hna zahawm siam theitu tur kan nei thuai turah i beisei ang u. 

- R. Lalengmawia