Sports lovers kan lawm alawm

Mizoram State Games chu kum 1985 hnuah thar thawh a han ni dawn ta a, sports ngainatu tan chuan hei lo liama lawmawm hi sawi tur a awm tawh chuang lo. A chhan chu he mi hmang hian sports lamah nasa takin hma kan sawn dawn a, chu bakah sports boruak a lian ve hrim hrim tur pawh hi lawmna tur tling tawk a ni.

Mi ṭhenkhatin an sawiselna sum a tlem, tih hi chu a dik thawkhat. Bial pakhat tan Rs 50,000 zel an pek hi chu football team pakhat enkawlna pawh a daih lova, ballboot man phei chu a daih lova, jersey ngawr ngawr, ball leh practice refreshment pawh a daih kher lovang. 

Thingtlang hla tak aṭanga Aizawla lo kal turte chu an zin man pawh a daih kher lovang. Mahse sports-ah kan tui tak tak a nih chuan pawisa hmuhna dang hi dap ve mai tur a ni a, chuvangin pawisa tlem vanga ngui tur a ni lovang, infiamna kan dah pawimawh a nih ngai chuan. 

Chubakah kan sports lar fal bik Football, Volleyball, Boxing, Basketball tih vel hi chuan MPL-te an nei a, Volleyball League tih velte an nei. A nei ve lo athletics, contact sports hrang hrang, weightlifting, hockey etc tan hian State Games hi lar chhuahna hun ṭha a ni a, hei hi kan hmuh hmaih em ni kil tinah State Games hi hre chiang lova an sawisel ringawt mai ni. 

Thil pakhat, a hun (timing) thu hlaah chuan a chawp­chilh ve hret chuan kei pawhin ka hre ve deuh. Nakkum February vela neih tur chu ni se pla­yers pawh an fit ngawtin ka ring a, “Krismas hmaa intawl len suau suau ringawt an ngaihtuah a. Mipui hmaah Sports Minister leh tu tu emaw intihlar chiah an focus,” an tih hi chu politics inchirh­thehna mai mai a niin ka hre thung. 

Ngun taka an ngaihtuah hnuah a remchang bera an ngaih hunah State Games hi an ruat a, tih leh a awm a nih chuan hei chu a timing vak lo. Krismas dawnah chuan tih tawh loh ni se, tih hi ka ngenna a ni ve thung. 

- Lalremruata