MLA HARSA!

Ni 21 November 2019 khan Mizoram MLA rualte chuan lungrual takin an hlawh an tisâng a, an hlawh an tihpunna hi 130% a ni. Hlawh tihsan nia MLA hrang hrangte thusawi ngaihthlâkin hetianga hlawh tihsan zai an rel chhan lian ber chu an bial mipuite an ngaihtuahtuah avanga an lo harsat tak em vang tia khaikhawm theih a ni. 

Sailo Lal hmasaber Za­hmuaka kha Lusei ho khan khua leh tuite humhim tur leh an tana rorel turin an ṭah awh a, Lal ni tur khan a tlawmgai a ni ber mai. Tichuan, khua leh tuite tana a hun pum a pek avang khan fathang leh thil dang kha a phut vang pawh ni loin, a khua leh tuite khan awm an tih vang zawkin an pe/ chhung ta a nih kha. Tichuan, Lal ban an nih hma thlengin kha dan kha chhunzawm a ni ta a ni. 

Tunlaia kan Lal, MLA te erawh hi chu kan MLA ni tur leh min ngaihtuahtu tur atana tlawmngai tura kan ṭah awh an ni ve lo a. "In hma-ah kan ding tlat ang" tia min tiam a, kan tana a peka rawn inpe an ni. Amaherawhchu, inpe an nih avang ngawta hlawh neih loh chu thil dik a ni bik lo a, dan pawhin an hlawh lak a phalsak a, an phu tawk chu an la ngei tur a ni bawk. 

An bial mipuite tana luan chhuah hi an tih tur ni ngeia langte zinga mi a ni ve thung. Kan rama thil mak tak chu, an bial mipuite tana luangchhuak viaua an insawi ṭheuh lai a, an luan chhuah avanga MLA tlachhe ta sawi tur an awm lo hi a ni. 

An luan chhuah thu an sawi ruala ngun taka an ṭawngkam ngaihthlak erawh kha chuan, kan pute ho tan hian an mipuite hi rawngbawlna ni loin phurrit mai kan ang riau mai!  An chhuanlam lian berte zinga mi ruang phurhna motor lah MLA LAD fund aṭanga an lei phalsak an ni tawh bawk si. Hetiang a lo nih takah chuan MLA LAD fund aṭanga ruang phurhna tur lei phalsakna pawh hi tihtawp tur niawm tak a lo ni ta. 

Hetih lai hian, India rama state zawng zawngte sorkar leiba neih zat chawhrual chu Mizoram leiba neih zat zatve aia hniam vek a ni. Kumin June 13-a chief minister Pu Zoramthanga'n kum 2019-20 atana Mizoram budget a pharhnaa tarlan danin, kum 2019-20 chhungin Mizoramin leibá cheng vbc. 455.58 a neih belh tura rin a ni a, chu nen chuan sorkar kum kal mek tawp, March 2020-a Mizoramin leibá a neih zat tura chhût chu cheng vbc. 8,447.92 a ni. 

Kan MLA te hian kan leiba hi lungkham takzet se chuan, an luang chhuak duh a nih pawhin an MLA hlawh aṭang kher lo hian an luang chhuak thei ang tih hi a rinawm. A chhan chu MLA mi 40 zinga 36 (90%)-te chu rosum cheng vaibelchhe khat aia tam nei an ni a, MLA 40-te rosum neih zat chawlhrual chu cheng vbc. 4.84 a ni. MNF MLA 26 zinga 22 (85%) chu cheng vbc. khat nei tling an ni a; Congress pary (INC) aṭanga thlan tlin mi pangate rosum chu cheng vaibelchhia a tling vek. ZPM MLA pariatte leh BJP MLA pakhatte pawh rosum cheng vaibelchhia nei tling vek an ni. 

MNF MLA 26-te rosum neih zat chawhrual chu cheng vbc. 4.97 a ni a, INC MLA pangate rosum neih zat chawh­rual chu cheng vbc. 5.13 a ni. ZPM MLA pariatte rosum neih chawlhrual chu cheng vbc. 4.39 a ni a, BJP MLA pakhat rosum neih zat chu cheng vbc. 3.31 a tling. 

Amaherawhchu, anmahni berin harsat phah riau anga an inngaih tlat chuan an thu a ni a, a tisang theitu pawh anmahni bawk an ni. An harsatna ber an hlawh tihsan a ni ta a, an bial mipuite tan thil ṭha tih intihsiakin an phe suau suau tawh turah ngai ila, an hna pawh a ṭha sawt turah mipuite chuan kan ngai a, kan lo thlir a ni. 

- Ramengi Pa