PAWISA NAWI

Kan ramah hian mimal sumdawnna thila LC/ VC ten an puih nasat ber zing­ah fas dealer leh retailer-te hi a ni. 

Mipui mamawh, a tel lova khawsak theih loh (essential commodity) a nih miau avang hian  sumdawnna dang nen chuan khaikin rual loh a nih ngei mai. Gas/ buhfai sem dawn apiangin  a sem hun tur leh a man (rate) veng tinah LC/ VC tlangauten an puang a, mipui tana puang an nih rualin a semtute tan hlei hlei a ṭangkai bawk. 

"Pawisa nawi ken vek tur a ni" tih lai erawh hi chu gas semtu leh retailer tana awlsamna liau liau a ni thung. Mipui hnena puan tel ziah hi a chuangtlai mai piah lamah mipuite min over rule mah mah ti te pawhin a ngaih theih awm e. Mi pangngai chuan pawisa nawi an neih phawt chuan an keng tlangpui a, a keng lote chuan an neih loh vanga keng lo an ni tlangpui bawk. 

Payment system-ah hma kan sawn zel a, electronics payment system pawh kan uar chho zel a. Gas dealer leh retailer-te hian cash payment bakah e-payment an hman hi a hun tawh khawp mai. Mipuiten payment option duhthlan tur kan neih hi a ṭul hle. 

"Pawisa nawi ken vek tur a ni" tih  puan tel fo ngai lovin gas distributor/ retailer-ten card swipe machine an in chhawp ang a, pawisa nawi neiten an duh leh cash-in a pe ang a, card hmanga pe duhten card an swipe mai ang. A semtute tan pawisa nawi harsat­na a sutkian mai bak­ah, mipuiten awlsam takin a man dik tak kan pek theih phah dawn bawk a  ni. 

A bik takin khaw­puiah leh District capital-ah ngat phei chuan internet connection pawh a changtlung thawkhat viau tawh a, gas/ buhfai man te hi a laklawh em em mai si a. A semtu leh  a leitu mipui tan pawh a man zat ang thlap thlap pawisa nawi neih reng  a theih loh ṭhin avangin payment  system hi her danglam a hun viau tawh mai. 

Enge kan ngaihdan ni ve le? 

- Chhungpuia Renthlei