Nationalism zir ṭha leh rawh se

Kum tam tak Mizoram leh Assam ramri mai bakah, kan sawi rik fo ṭhin, Inner Line Reserve Forest 509 Square mile, Mizoram ta ngei mai, Hla-ah te hial pawh siam hlawh khawpa Mizo mipuiin kan vei em em chungchangah, kum tam tak kal tawh aṭang khan sawrkar kan hrawn tawhten sawrkar laipui koh eih tur khawpin hmalakna an nei ngai lova. NGO level leh Opposition Party level aṭang chuan India sawrkar koh eih a harsatzia chu kan hre vek awm e. 

November ni 28, 2018 (Nilaini) ah vanneihthlak takin India Prime Minister Narendra Modi Aizawlah a lo kal hlauh mai a. Hetah hian Mizoram leh Assam Ramri bakah, Inner Line Reserve Forest 509 Square Miles chuang a hma la tura All Political Party leh NGO te tel vekna in an din, Joint Action Committee on Inner Line Reserve Forest Demand chuan Joint Memorundum, Political Party zawng zawng leh NGO lian zawng zawng aiawhte hming sign thlapna chu Narendra Modi hnenah hian an thehlut ta a. 

He lehkha kal zelah hian Union Home Ministry chuan, December ni 24, 2018 (Thawhtanni) khan Mizoram leh Assam Chief Secretary ve ve te bakah Surveyor General of India te chu, Mizoram JAC on Inner Line Reserve Forest Demand Joint Memorundum thehluh chungchanga an ngaihdan comment te thehlut tura hriattirna, lehkha hman­hmawh thlak tiin a thawn chhuak a. He lehkha pawi­mawh hi, Mizoram Chief Secretary chuan January ni 7, 2019 (Thawhṭanni)-ah lo dawngin, Principal Secretary, Home Department-ah a thawn nghal a. January ni 9, 2019 (Nilaini)-ah Principal Secretary, Home Department chuan a lo dawng leh a, hemi ni la la hian a pawimawh em avangin Additional Secretary, Home Deptt-ah thawn nghalin, Addl. Secretary chuan he mi ni vek hian a lo dawng ve nghal a ni. 

He lehkha pawimawh tak mai rang taka chhan tur hi, Mizoram Sawrkar, MNF Minis­try chuan thla 9 leh ni 15, a vaiin ni 275 zet chu, chhan­na leh comment pe miah lovin a up bo ta veng veng mai a. October ni 4, 2019 (Zirtawpni)-ah JAC on Innner Line Reserve Forest Demand Chairman Pu Ngurbiakvela hnen a thleng ve ta chauh a ni. Anni hian October ni 17, 2019 (Nilaithawhṭanni) khan MUP Building, Upper Khatla-ah Urgent Meeting an ko a ni. 

Meeting-ah hian political party zingah MNF leh BJP party aiawh an kal lo a. NGO zingah MHIP an absent bawk. Central YMA erawh JAC on Inner Line Reserve Demand-ah hian an tel lo hrim hrim a; moral support pek an duh tawk niin sawia ni. Kum tam tak 'Ram leh hnam humhalh' tia kumpuanah meuh nei ṭhin, Mizo tawh phawt min phuarkhawmtu CYMA an tel ve thei lo hian ngaihtuahna a ti thui hle mai. Mi ṭhenkhatin an sawi fiamthu, CYMA hruaitute zingah MNF support ru tlat an awm nia sawi hi dâwt ni hram se a lawmawm ngawt ang. 

JAC on Inner Line Reserve Demand Urgent Committee hian Joint Resolution siamin, he thu kal zelah hian October ni 18, 2019 (Zirtawpni) khan Aizawl Press Club-ah thuthar thehdarhtute an kawm nghal a. Joint Meeting Resolution point 4 an siamte chu khawvel hriatah an puang chhuak ta a ni. An resolution-ah hian, Mizoram Sawrkarin January ni 9, 2019 (Nilaini) daih tawh Urgent Comment pek ngai thla 10 deuh thaw an hup bet tlat an hriatthiam loh thu leh an dem thu te, eng vanga hei leh chen hup bet nge an nih Mizoram mipui hriata puangzar tura an phutna te, Assam sawrkarin Mizote ta leh ram, Inner Line Reserve Forest 509 square miles hun rei tak a lo enkawl tawh chu, a neitu Mizoram sawrkarin enkawl ve tawh se, rang tak leh chak takin hemi tipuitling tur hian Mizoram sawrkarin hma la tura an tihna te a ni. 

District Council kan nih lai aṭang daih tawha Assam sawrkarin Inner Line Reserve Forest square miles 509 huam chhung aṭanga Assam sawr­karin chhiah a lo lak tawh, vawiin thlenga min pek let tak loh chu, Mizoram sawrkarin Assam sawrkarah ṭhîng tura an tihna te, JAC on Inner Line Forest Demand rawn chungin Mizoram sawrkarin Union Home Ministry aṭanga lehkha lo kal chhanna leh comment October 2019 chhung ngeiin pe rawh se tia Mizoram sawrkar, MNF Ministry an phutnate a tel bawk. 

Hetiang taka Mizoramin kan vei em em, kumkhua, naupang tê tê pawhin an hre vek tawh ang tih rinhlelhawm miah lo, YMA banch leh mimal tam takin music video-ah hialte an siam phahna tling, kan mithiam rual leh ram veitu tam takin lehkhabu hrang hang an lo siam leh ziah phahna tling, chanchinbu hrang hrangah mi tam takin article an ziah sup sup phan tham tling a ni a. He issue avanga zirlai pawl leh NGO dangte, political party-te pawhin opposition an nih lai apianga an in vei siak, an sawrkar hnua an theihnghilh leh ṭhin si, Inner Line Reserve Forest 509 sq. miles, kum 1875 daih tawha British awpna hnuaia awm India sawrkarin a lo siam tawh, kan thlahtute'n min lo sual chhuahsak tawh la let leh tur hma la ngam lo MNF Ministry kal duh dan hian Mizo hnam min vêl a, mittui dan a van harsa em. 

Dan lova Bangladesh aṭanga lo lut Chakma-te um chhuak tura kum 40 deuh thaw state kan nih hnuah pawh vawiin thlenga pakhat pawh ûm chhuak tura ke la pên lo, ramri chungchangah pawh an sawrkar laia hma la duh tak tak lo, Mizo nationalism neitu nia insawi ṭhin, 'Chinghne beram vun sin' ṭhin MNF party hian Mizo nationalism hi an sawi ve tawh tur a ni lo. Chutiang sawi leh tur chuan an nute pum chhungah lutin piang nawn leh phawt rawh se. 

Chutiang bawkin, Congress party pawh hi, an sawrkar laiin MNF party ang tho hi an nih dan a ni. Mizo ṭhalai rualte thisen lum kan inven zawh loh hma ngei hian, he ram siam ṭha tur hian piangtharin harh chhuak mawlh tawh teh se. Tih ngam loh, lal loh hlauhna vang ngawta mipuite min bum ching party pahnih hruaitute hi mihring dana mual an liam hnuah an tu leh fate engtin nge awm se an tih tih hi anmahni ṭheuh inzawtin inenfiah ngam rawh se. 

Mizoram hi Mizote ta chauh a ni. I ram leh hnam chhan la, khawvelin an dem lo vang che.

- James L Chhakchhuak