NERM MALSAWMNA

North East Riders Meet (NERM) Mizo­ramin a thleng leh ta reng mai. A vawi 11-na (11th NERM) a nih rual hian a thlengtu tur club, Aizawl Thunders (The Aizawl Bullet Club) te kum 10 tlin­na a lo ni ve chiah bawk nen, a va lawm­awm em! 

‘Riders Meet’ ah hian thir hlang khalh motorcycle kan tih bikah pawh hian Royal Enfield company siam chauh tel theihna a ni a; company dangte tan pawh chona lian tak niin ka hria. He meet lo len chho zelna chhan pawh Aizawl Thunders hi a ni pakhat a; Aizawl Thunders hi India rama club upa ber a nih avang hian club dangten an entawn viau a ni. 

11th NERM hi Chalfilh, Vanzau-ah November 26-28 hian nghah a ni a; North East riders meet tih a ni tak na a, all India meet a ni mah zawk. Hmarchhak aṭang hian rider ka ni inti chin chu an lo kal vek ang. Tin, West Bengal, Jamshedpur, Haryana, Delhi, Hyderabad, Chhenai, Maharashtra, a tam mai. Europe leh America bakah Bhutan leh Nepal aṭangin za rual vel lo kal tura beisei a ni bawk. 

Chungho chu khawiah nge thlen an duh tih ngaihtuah la, eng thil nge an duh ang? An lei duh zawng i nei a nih chuan i in hralh ṭeuh mai ang. Khawiah nge kal zel an duh ang? Tour package siam i nih chuan hun ṭha lutuk a ni. Paying geust siam i nih chuan hun rangkachak a ni. Hiker i nih chuan a thlengtu branch-te hi zawh chian a, i contact leh website te tih lan tir dan ngaih­tuahna hun a va ni tehlul em. I kawngka lo hawng zau teh khai. NERM hi bulṭanna leh kawng hawnna a ni thei e. 

Riders mi 1800 chuang registration ti zingah 1600 hi vai/ hnam dang an ni. Motorcycle 1600 chuang rawn khalh kha hmuhnawm thlira i thlir ringawt chuan a hmuhnawm tih zawng kha i chan a ni mai e. Mahse, an sum leh pai lo dawn dan i ngaihtuah thleng a nih chuan malsawmna a ni thung - chu chu touri­sm chu a ni mai. Inren taka NERM kan kal hian Rs 20,000 - 30,000 hi chu kan seng ngei ngei ṭhin. A tlem berah mi pakhatin kan Zoram ram chhungah sing hnih vel hmang ral turah ngai ta ang ila. Chhiarkawp hmangin mi 1600 x 20000 = Rs 3,20,00,000/- a ni. Hei hi a tlem bera chhut chauh a ni. Kar khat chhunga hnamdang sum leh pai kan ram chhunga lo lut tur hi sawrkara lut tur pawh ni lo, mimal/ sumdawngte hnena lut tur vek; an thil leina aṭanga mimal kuta thleng tur a ni leh nghal! 

Sawrkarin Win­ter Festival (Thla­sik Kut) siam a tum pawh hi he NERM zawh hlim chu ni ta se riders zingah hian chhim nghal duh an tam khawp ang le. 

- Crossa Kosbek, Aizawl