KA ṬHENAWM DAWRKAI

An dawr chu a dung feet 7 vel, a vang lam feet 5 vel chauh a ni. A aia lian zawka rel dan a awm lo. Dawr neitu hi ‘Pi Sangzuali’ kan ti mai ṭhin a, naupangho chuan ‘Pi Lawlaw’ an ti thung. A fapa tlangval Hlua nen chauha awm an ni a, bang insi chiaha awm kan ni. Midang in ṭhenawmte chu tukzan an inhmuh laiin keini ve thung chu kan inhmu khat hle a, chhun lama ka chhuah bo ziah vang a ni. 

An dawrah chuan eichawp thil, chaw­hmeh siam awlsam leh naupang duhzawng a tam ber a, branded thawmhnaw lam a awm lo a, damdawi lam pawh beisei chi a ni lo. Motor part lam phei chu a awm lo tawp.  An dawr awmna hi Aizawl hmun laili tak a ni a, step aṭangin engkim a ban phak vek. 

A chhungah pa lian deuh ṭhu sela a khat hmuk ang a, midang tan ṭhutna a awm kher lo ang. Nimahsela an dawr hi a lun loh phah chuang lo. 

An ṭawng kan hre pawh vek bawk a, zing tak (a neitute thawh hma) ah thenawm naupangte chuan dawr a la inkhar avangin In lamah kawngka rawn kik kauh kauh pah hian ‘Pi Lawlaw, thil kan lei duh’ an rawn ti ṭhin a, dawr neitu nu ber Pi Sangzuali hian ‘enge in duh?’ a ti a, khum aṭanga thoin chahbi a pe a, ‘kha tikhan lo han la rawh u’ a ti mai ṭhin. Naupangte chuan an duh an lei a, an haw san leh ta mai ṭhin a, hetiang hian inrintawk ngamna nen vawi tam an indawr a ni. 

A chang phei hi chuan naupangte hian ‘kha cheng 5 man thil ka la’ tih pahin cheng nga thir hi an rawn pe leh mai ṭhin, hetiang hi hmun dangah pawh ni vek sela ava nuam dawn em. Dawr tam takah CCTV kan dah fer fur a, a ṭangkai lutuk. Nimahsela ka ṭhen­awmte dawr atan chuan a ngai ve lo. Kan thenawm naupangte hi chhungkaw ṭha tak aṭanga seilian an ni tih a lang reng a, an nu leh pate an fakawm a ni. 

Shillong kan awm laiin kan Hostel bul chiaha In sak laiah nilum kan ai a, ka kiangah chuan mipa naupang pakhat hi a awm ve bawk a, chutia kan awm lai chuan cheng 5 a chhar a, ‘kha cheng 5 ka chhar, nei rawh’ min rawn ti a, ka rilru a ti kal thui hle mai. 

Ka rilru ah chuan ‘A seilenna chhungkuaah naupang hriatthiam tawkin pawisa chhar loh tur’ tih an inhrilh a nih ngei te ka ringin chu chu a rilruah a vawng reng a nih ka ring a ni. 

Ka ṭhenawmte dawrah hian naupang duhzawng chi an zuar ve nual a, nitinin naupangte pawhin an dawr a, nimahsela a ruka lak theih mai thil tam tak a awm a, an la duh hauh lo. 

Kei hi kam hlei mi tih takah a khat tawkin ‘khawimaw kuhva rah seh tur min lo pe teh’ te ka ti zauh ṭhin a, a lo awm remchan loh pawhin a rah lian te min la phel sak mai a, a va nuam ṭhin em. He hringnun hi nau­pang ber aṭanga kum upa ber thleng hian thinlung lama in­hmangaihna leh in­rintawnna hian a lo ti nuam ber a nih hi.