Zan boruak tinuamtu Food Truck

Aizawl khawpui zan boruak hi sawi a ni fo a, mi tam takin kan lo hriat dan leh a taka kan hmuh ve chang pawhin khawpui zan boruak hi ‘boruak muanawm leh ralmuang, dan leh hrai zawm ṭha’ han tih tur chu a ni lem lo. Zu zawrh a ni emaw ni lo emaw khawpui chhung kawngpuite hi zuruiho leh zan lama mahni taksa zuarho, damdawi a hleihluaka tiho tuallenna emaw tih mai tur a ni. Hei vang hian mi tam tak chu khawpuiah zan boruakah chhuah an zuam vak lo ṭhin a ni. 

Mipa pawh a mal chuan zan leng ngam loh hun te kha a awm rum rum a nih kha. A chhan chu a huhova awm ṭhin, zu ruiho-te hian aia upa zah chu sawi loh, mi tu pawh mai kut thlak an hreh lo a, kut an thlak pawh kan hre fo a ni kha. Hei vang hian khawtlang mi tlawmngaite an duty phah fo a ni. Kristmas leh kumthar boruak a ni a, fa, nula leh tlangval fa neite tan phei chuan a ruk takin an huphurh ṭhin. Bike ring leh chak tak takin an tlan a, zuruia motor lo khalh tawk lah bo lo. 

Zan khat chu kan chhungin veng danga kan chhungte kan tlawh a. Dar 9:30 velah kan haw a, kan fateho rilṭam chu engnge ei tur awm ang aw? thingpui dawrte hi an la hawng ang em le? Keini ram khawpui vete hi chu 7pm vel hi chuan an in khar tawh ṭhin si a, tiin kan sawi nak nak a. Chanmari aṭangin kan phei zel a, kawngsirah an lo awm nak nak a, State Bank Main office building opposite, Mahatma Gandhi lim kawt kawng kual zau laiah hian motor hmanga ei leh in lo zuar, motor 4 vel an lo awm ṭhap a. Motor kalna dal si lovin anmahni dawrtute ṭhutna tur dawhkan an lo rem bawk a. Dawrtu pawh engemaw zat an lo awm a, kan hlim phian mai. 

Ka han hawi vel a, mi pangai tak tak, nula leh tlangvalte pawh an zan leng hlim takin thil an lo ei hlawm a, zan len pawh a va ti nuam em! Ka lo rin dan piah lam daih a ni a, zan tin phei chu kan hmu ve lo a, mahse, zu han rui a, damdawi rui emaw K.S. rawng kai lam pawh ka hmu miah lo. Kan chhungkua-in mahni duh zawng ṭheuh kan lam a, puar takin kan ei a. A hmuna kan ei bakah in lama ei tur engemawzat kan la hawn bawk a ni. Kan va lo changkang ve tawh em, dawr neitute lah chu an fel em em a. Henglai hmun hi a hma kha chuan hmun ṭawp taka kan sawi ṭhinna hmun kha a ni si a, hetiang hian Aizawl khawpui kawng lun laiah hian ei tur changkang tak tak hi zuar hlawm se a va nuam leh zual dawn em! 

October thla engtik zan ber nge ka hre tawh lo a, helai hmun hi kan kal leh chuan a lo reh duk tawh mai a. A piah deuhah nula, tlangval engemzaw zat an lo awm a. A thim lam pangah an lo bawr laih laih a, kan ngaihven deuh a, helai veng khawtlang hruaituten Food Truck din hi an phal tawh lo a ni awm e, tiin an lo sawi. Ka rilru te te chuan a va pawi ve aw! Veng tana hnawksak te hi helai hmunah hian an lo inzep leh pek nge? Nge an bengchheng zawk? tuten emaw ngai thei lovin an hek leh zawk nge? Mumal takin phalna an la lo em ni zawk? 

Helai hmun hi chu food truck te rawn lan hma pawhin hman aṭangin ruihhlo ti ṭhinho awm khawmna hmun a ni hrim hrim a, a changin khawtlang hruaituten an han hnawt kiang a, a hnuah an awm leh tho ṭhin. A enga pawh nise, khawtlang hruaitute hian chhan ṭha tak nen ti tawh lo turin an hrilh a nih a rinawm a, mah se ka ui hle mai. Veng dang kawngpui dungah chuan an la awm pheuh pheuh hlawm. Sawrkar leh khawtlang thuneitute hian mumal takin phalsak sela, an phalsak pawhin hetiang hian ruahmanna kalpui chungin food truck inzawrhna-in engnge nghawng a neih dante ngaihtuah pui ve se:-

1.    Khawpui ṭhang zel atan hetiang hi kan mamawh tawh a ni. In chhung restaurant leh hotel-te mai bakah open air-a ei tur tuihnai tak tak awm ṭhin hian nun a tihlim ve a, changkanna pakhat a ni bawk. Khawvel khawpui changkangah hetiang hi an tam tih kan hriat kha. 

2.    Engkima mawhphurtu leh enkawltu sawrkar hian kan khawtlang boruak en mil zelin ven an ngaih chuan an veng mai tur a ni. Engkim mai hi a felfai bik vek thei lo, chuvangin, police-te pawh heng an awm chhung hi chuan mi awm herhhoten buaina an siam lohna turin veng mai rawh se. 

3.    Food truck hi mi tam tak tan a ṭhat mai bakah mi tam tak tan eizawnna tling, thianghlim bawk si a ni. Eizawnna nei loten an hnenah eizawnna thianghlim tak an nei hi dodal loh tur a ni. Mi awm ṭha duh lote avanga hnawk kan tih ngawt chuan a fuh ber lo mai thei, mi awm ṭha duh lote hi chu dan leh hrai vawngtuten an thian fai mai tur a ni. A dawrtu tam zawk hi mi pangngai tak takte an ni tlat. 

4.    Kawngpui hrula food truck in zuarho hi a tlangpuiin chenna hnai lutuk an ni lem lo. Kan sawi mek, Assam Rifles Lammual leh Treasury Square inkar kawng hi mihring chenna a hnai lutuk lo a, chuti lutuka han hnawksak niin a lang lo. Hmun danga food truck phalna pek a nih dawn pawhin chenna in hnai lutuk ni lo se a ṭha mai thei. 

5.    Food truck inzuarte hian thianghlim takin ei tur tuihnai tak tak chauh zuar se. Kan ram buaina ber ruih theih thil hi a rukin an zuar tur a ni lo. Sumdawng ṭhenkhat, a ruka zu lo nei ru kiau hi an awm ṭhin a, a ruka damdawi lo zuar pawh an awm ṭhin. Kawngpui dung, dawr pangai emaw tihah te hian zu, ruihtheih thil leh thil dang lo zuar ru an awm ṭhin niin an sawi. A leina hre riau-te hi an awm tlat. Hetiang hi chu tih loh tawp tur a ni. 

6.    Khawpui chhung zan len nuam lo kan tih leh len ngam loh hiala kan sawi ṭhin kha food truck in zuarte hian an um bo a tih theih ve tlat. Ṭhalai tam tak, nu leh pate thlengin ei tur tuihnai zana han pan mai tur awmte hi a ti nuam a, ṭhalai khawilaiah emaw tek bona tur zawng engemawzat a hip khawp ve thei tlat bawk a ni. A dik tak chuan hetiang ang nun han hmanna hi kan nei lo lutuk a, hmun fianrial leh lenna nuama han lengte lah khawtlangin kan um chhuak zel bawk si. Lehlamah an lo zir lo ve bawk nen. Chuvangin, hetiang eizawnna thianghlim tak ti peih an awm chuan theihtawpin kan pui zawk tur a ni ang. 

A ṭha lam zawng hian ke chheh chhoh hi zir ve tawh ila. Chutihlaiin kan khawtlang boruak ti ralmuang lo leh kan kristianna nena nun bo chi reng reng hi chu tikiam turin kan ṭanrual a ngai. A ṭha lo lam do tur chuan kan ṭangrual ṭhap zel ang. Hmasawnna hi chi hrang hrang a awm a, tuna kan sawite pawh hi khawtlang nun tinuam zawnga hmasawnna pakhat a ni. 

Nun chep lutuka in siam te pawh hi a 

ṭha ber lo. Engkim mai khap beh tum pawh a 

ṭha ber lo, dan kengkawhtu an awm a, chung chuan buaina lo awm tur leh midangte tana hnawksakte chungah dan an lek kawh mai tur a ni. Sawrkar hi dan kenkawhna-ah chak se chuan kan khawtlang nun pawh hi tun ai hian a nuam ang. 

Mipui pawhin kan hlim tlan zawk nan dan kan zawm a ngai. Sawrkar a chak tawk loh fo avangin khawtlang leh NGO te kan buai ṭhin em em zawk a ni. 

Kan tihtur ṭheuh ti ila, buai lo tur kan tibuai lovang a, buai tur chu kan buaina tur dik takah kan buai mai ang. Dan kengkawhtu tura ruatten tih phal loh an tih bik fo chuan dan a hlawhtling ngai reng reng dawn lo a ni. 

- R.Zomawia