COMMITTEE MAWNG PAWP

Kan ram hi NGO leh koh­hran peng hrang hrang tam lamah chuan khawvelah hian kan hniam ber tawp awm lo ve. Khaw/ veng tinah hian NGO awm ang ang leh Kohhran committee chin hi ṭhu khawm dawn ta ila, kan ṭhahnem tham fe ang chu. Pawl leh kohhran tan ṭhahnem ngai takin rorel a ṭul a, rorelna hmunah chuan mimal tute emaw chanchin, a ṭha lo lai thleng mai pawha sawi kai loh theih loh chang pawh a awm ṭhin. 

Hman kumah khan Games & Sport Association-ten kan in luahtu tur kan thlang dawn a. Uluk takin kan sawiho a, in luah diltute mizia leh khawsak phung nen sawi vek loh theih a ni lo va. Kan in luahtu atana ṭha ber tur kan thlan tukah chuan a chang ve ta loten an chanchin kan sawi dan nen min chhuahchhal nghal sak sak mai a; a zahthlak si, thinrimthlak bawk si - tih chi loh tak a ni. Mahse, pawl tana ding kan nih miau avangin zah fakah lu em va chhum suh kan ti ta vel mai mai a ni. 

A chang phei chuan a hun thlen hmaa puan miah loh tur thuruk (confidential) ang chite pawh a awm a; mahse, roreltu zingah thuruk sawi chak tlat kan awm chuan thuruk pawh a thuruk hlei thei lo va, a ruk tein tlang hriat a hlawh mai ṭhin. Hetiang committee mawng pawp kan tih ang chi hi NGO-ah mai ni lo, kohhran lian rorelnaah pawh hriat tur a awm a nih kha. Hetiang tih chingte hian kohhran/ pawl zahawmna an tibawrhbang thei hial a, an ngeiawm duh khawp mai. 

Rorelna hmunah chuan kan thusawi tum tifiah tur leh kan tan hmun tinghet turin zep nei lova thil sawite a ngai ṭhin. Heng zep lo va kan sawite lah hi mi dang kiangah chuan zep tlat chi a ni lawi si a. Kan ṭhahnemngaihna thusawi zawng zawngte nen lam kan sawi chhanaten an hriat leh vek chuan rorel leh pawh chakawm duh lo tak a ni. 

Chuvangin, hetiang tih chingte hi chu rorel khawlah ṭhu tlak an ni lo; a rang a ranga chawlhtir hi a himin a ṭha ber. A nih loh chuan committee member-te inkarah khi an siam vat mai a ni. NGO leh kohhran piah lamah sawrkhar lehkha pawimawh, mipui lamin kan hmuh hauh loh tur chi pawh kan hmu ta fo mai. Sawrkhar hmasa lamah khan inthlan dawn hnaihah SSA lehkha pawimawh, mipui lamin kan hriat atana sawrkhar hotute duh hauh loh tur kha a darh chiam mai a. A titu zar kha eptu lam leh SSA hnuaia thawk zirtirtu chuan an zo ngei mai a; mahse, thuneitute tan chuan thinrimthlak tak tur a ni. 

Tun hnaiah pawh kan chief minister leh education minister ten an mi duhsak zawngte an recommend-na lehkha kha a darh leh ta chiam mai a, duhsakna thuziaktu tan chuan a lawmawm hauh lo ang. Engtin nge sawrkhar lehkha pawimawh tak tak hi mipui hmuh theih tura social media lama a darh chiam theih ṭhin tih zawhna hi chhan har a ni lo; a thawktu leh khawihtute hnen aṭang lovin khawiah nge a darh tehlul ang ni. Hman deuh khan sawrkhar office pakhat ka dawr a. A khawihtu kha a awm lo chungin a dawhkanah chuan ka thu hriat chak lehkha pawi­mawh kha a lo inchap dal mai a. Hawi zawk zawk a, mi hmuh loh laia a thla han lak ruk zawk kha rilruah a lo lang hmasa ber a. Mahse, sawrkhar lehkha pawimawh keiin thla ka lo lak ruk kha danin a phalin ka ring si lo va, ka insum tluan thei ta hram a ni. A thawktuten min rawlruk vang ni chuang lo pawhin a darh palh ve thei tho a nih chu. 

Mak ka tih leh ṭhin pakhat chu, sawrkhar mi pawimawh bikte (top official) chauh rorel pawh a puangzar tura ruat ni hauh lote hmanga social media lama kan lo hmu zung zung zel hi a ni. Meeting-a telten an vawrh darh em turah chuan ka ngai lo va, mahse titu an awm ṭhin si a ni. Kan Assembly House zahawm taka an rel tur, MLA te pawhin an hriat hmaa lo darh maite phei kha chu thuneitute tan chuan khuk chem chem a, khuk ral daih a chakawm ang chu. 

Engpawh nise, committee mawng pawp leh sawrkhar lehkha pawimawh leak out ṭhin hi a lem chuang lo ve. NGO leh kohhran tan pawh kan thurel pawimawh tak tak, puanzar leh thup rih ngai ang chi a hun lo va mi dangin an lo hre ṭhin hi a huat thla la a; sawrkhar tan lek phei chuan ngawihpui mai mai chi niin a lang lo. 

Sawrkhar lehkha pawi­mawh, RTI hmanga dil chhuah pawh ni lo, an mi chhawr ṭhen­khatten a chhawrtu tihmualpho tuma social media lama an tidarh vel ṭhin hi chu a zia lo va, eng sawrkhar tan pawh ngawihpui mai chi a ni lo ve. 

- R.Lalfakawma, Seling